《巴克禮普世版聖經（試讀本）》

 | | | 轉寄

巴克禮普世版（試讀本） 提摩太前書第四章

作者 巴克禮普世版小組 2016.02.28

Ké ê Kàu-su
1 M̄-koh Sèng-Sîn bêng-bêng kóng, tī āu-lâi ê sî-kî beh ū-lâng khì-sak sìn-gióng, ì-ài hiah-ê bê-he̍k lâng ê siâ-lêng kah kúi-sîn ê kà-sī. 2 Chit-khoán ê kà-sī sī tùi kóng pe̍h-chha̍t ê lâng ê gūi-siān lâi-.ê. In ê liông-sim í-keng hō͘ Mô͘-kúi ēng jia̍t ê thih-ìn ù chò kì-hō lâi kui-sio̍k Mô͘-kúi. 3 In kìm-chí kè-chhōa, kìm-kài chi̍t-kóa chia̍h-mi̍h, chiū-sī Siōng-Chú só͘ chhòng-chō, beh hō͘ sìn koh liáu-kái chin-lí ê lâng ēng kám-siā ê sim lâi niá-siū-.ê. 4 In-ūi Siōng-Chú só͘ chhòng-chō ê mi̍h lóng sī hó, nā ēng kám-siā ê sim lâi niá-siū, chiū bô chi̍t-hāng sī kìm-khī. 5 Só͘-ū ê chia̍h-mi̍h thong-kòe Siōng-Chú ê ōe kah lâng ê kî-tó chiū chiâⁿ-chò sèng-kiat.

Ki-tok Iâ-so͘ ê Hó Chhe-ēng
6 Lí nā chiong chiah-ê tāi-chì thê-chhéⁿ hiaⁿ-tī chí-mōe, chiū ē chiâⁿ-chò Ki-tok Iâ-so͘ hó ê chhe-ēng, ēng só͘ sìn ê tō-lí kah só͘ sūn-ho̍k hó ê kà-sī lâi tit-tio̍h pôe-ióng. 7 Tio̍h khì-sak chho͘-sio̍k ê ōe kah bô-iáⁿ bô-jiah ê thoân-soat. Ūi-tio̍h kèng-khiân ê seng-oa̍h, tio̍h kè-sio̍k chhau-liān ka-kī. 8 Chhau-liān seng-khu ū tām-po̍h-á lī-ek, m̄-koh kèng-khiân tùi ta̍k-hāng tāi-chì lóng ū lī-ek, in-ūi ū èng-ín thang tit-tio̍h hiān-kim kah chiong-lâi ê oa̍h-miā. 9 Chit-kù ōe lán thang siong-sìn, ta̍t-tit lán oân-choân chiap-siū. 10 Ūi-tio̍h chit-ê bo̍k-tek, lán lô-khó͘ phah-piàⁿ, in-ūi lán ê ǹg-bāng chāi-tī éng-oán oa̍h-miā ê Siōng-Chú, I sī jîn-lūi ê Kiù-Chú, te̍k-pia̍t sī sìn-tô͘ ê Kiù-Chú. 11 Lí tio̍h chiong chiah-ê tāi-chì kā in khoàn-bián kah kà-sī. 12 M̄-thang in-ūi lí ê siàu-liân hō͘ lâng khòaⁿ-khin, tio̍h tī kóng-ōe, hêng-ûi, thiàⁿ-sim, sìn-sim kah sûn-kiat chò sìn-tô͘ ê bô͘-hoān. 13 Tio̍h tì-ì tha̍k Sèng-keng, khoàn-bián kah kà-sī, ti̍t-kàu góa lâi. 14 M̄-thang hut-lio̍k lí só͘ niá-siū sio̍k-lêng ê un-sù, chiū-sī thong-kòe sian-ti ê ōe kah tiúⁿ-ló-thoân ê hōaⁿ-chhiú sù hō͘ lí-.ê. 15 Lí tio̍h tì-ì choan-sim khì chò chiah-ê tāi-chì, hō͘ chèng-lâng khòaⁿ-tio̍h lí ê chìn-pō͘. 16 Lí ka-kī tio̍h kín-sīn, mā tio̍h chù-ì lí ê kà-sī, siông-siông koan-sim chiah-ê tāi-chì lâi chò, in-ūi án-ne chò chiah ē kiù lí pún-sin kah thiaⁿ lí ê kà-sī ê lâng.