《巴克禮普世版聖經（試讀本）》

 | | | 轉寄

巴克禮普世版（試讀本） 提摩太前書第三章

作者 巴克禮普世版小組 2016.02.21

Kàu-hōe ê Léng-tō-chiá
1 Lâng nā him-bō͘ chò kàu-hōe ê léng-tō-chiá, i sī ì-ài hó ê kang-chok, chit-kù sī chin-si̍t ê ōe. 2 Só͘-í chò léng-tō-chiá eng-kai tio̍h bô khoat-tiám, chí-ū chi̍t-ê bó͘, m̄-thang hò͘ⁿ-chiú, tio̍h an-hūn siú-kí, toan-chèng, hó khoán-thāi chhut-gōa lâng, gâu kà-sī, 3 bô in-ūi chiú-chùi lâi jiá-sū, bô iá-bân, hoán-tńg tio̍h un-jiû, bô sio-cheⁿ, bô tham-châi, 4 gâu koán-lí ka-kī ê ka-têng, hō͘ kiáⁿ-jî sūn-ho̍k, sū-sū kèng-tiōng. 5 In-ūi lâng nā bē-hiáu koán-lí ka-kī ê ka-têng, ná ē-hiáu chiàu-kò͘ Siōng-Chú ê kàu-hōe lè? 6 M̄-thang hō͘ chho͘-sìn ê lâng chò kàu-hōe ê léng-tō-chiá, kiaⁿ i ē chū-khoa, soah hām-lo̍h kah Mô͘-kúi só͘ siū kāng-khoán ê sím-phòaⁿ. 7 Kàu-hōe léng-tō-chiá mā tio̍h tī kàu-hōe-gōa ū hó miâ-siaⁿ, chiah bián tú-tio̍h lâng ê húi-pòng soah hām-lo̍h Mô͘-kúi ê lô-bāng.

Kàu-hōe Léng-tō-chiá ê Chō͘-chhiú: Chip-sū
8 Chò chip-sū ê mā kāng-khoán tio̍h toan-chong, bô siang-bīn-ōe, bô hò͘ⁿ-chiú, bô tham put-gī ê chîⁿ, 9 tio̍h ēng chheng-khì ê liông-sim lâi chhî-siú ò-biāu ê tō-lí. 10 Chit-chióng lâng mā tio̍h seng hō͘ in chiap-siū khó-giām, nā bô thang hiâm chiah thang hō͘ in chò chip-sū. 11 Chò chip-sū-niû ê mā tio̍h toan-chong, bô kóng lâng ê pháiⁿ-ōe, bô hò͘ⁿ-chiú, ta̍k-hāng tāi-chì tiong-si̍t. 12 Chip-sū tio̍h chí-ū chi̍t-ê bó͘, gâu koán-kà kiáⁿ-jî koh gâu koán-lí ka-kī ê ka-têng. 13 In-ūi hó-hó chīn chip-sū ê chit-bū, ka-kī ē tit-tio̍h hó miâ-siaⁿ, mā chiah ē-tàng hó-táⁿ káng-lūn Ki-tok Iâ-so͘ ê tō-lí.

Ko-chhim ê Ò-biāu
14 Góa siá chiah-ê hō͘ lí, sī ǹg-bāng góa pún-sin liâm-piⁿ ē-tàng khì lí hia. 15 Nā-sī iân-chhiân bān khì, chit-tiuⁿ phoe ē-tàng hō͘ lí thang chai tī Siōng-Chú ê ke eng-kai tio̍h án-chóaⁿ seng-oa̍h. Chit-ê ke chiū-sī éng-oán ê oa̍h-miā Siōng-Chú ê kàu-hōe, mā-sī chin-lí ê thiāu-chio̍h kah tē-ki. 16 Tāi-ke lóng kong-khai sêng-jīn lán sìn-gióng ê ò-biāu sī jōa-ni̍h-á tōa: chiū-sī Iâ-so͘ hián-hiān chò lâng, ū Sèng-Sîn lâi chèng-si̍t, chhut-hiān hō͘ thiⁿ-sài khòaⁿ, tī gōa-pang soan-iông, hō͘ sè-kan-lâng siong-sìn, siū chiap-la̍p khì tī thiⁿ-téng êng-kng.