《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第二章

作者 巴克禮普世版小組 2015.09.13

Chhut-sí Ji̍p-oa̍h
1 Kòe-khì in-ūi lín pōe-ge̍k Siōng-Chú, lêng-sèng í-keng sí-khì. 2 Hit sî, lín kin-tòe chit sè-kan ê pháiⁿ hong-sio̍k teh seng-oa̍h, koh sūn-ho̍k thian-kài ê chiáng-koân-chiá, chiū-sī chit-má teh koán-hat hiah-ê pōe-ge̍k Siōng-Chú ê lâng hit-ê siâ-sîn. 3 Kî-si̍t goán í-chêng mā lóng kah chiah-ê lâng kāng-khoán, sūn-ho̍k su-io̍k teh seng-oa̍h, chiàu ka-kī jio̍k-thé ê su-io̍k kah ì-liām teh kiâⁿ-ta̍h. Goán kah kî-tha ê lâng lóng kāng-khoán, chù-tiāⁿ tio̍h siū Siōng-Chú ê hêng-hoa̍t. 4 M̄-koh Siōng-Chú ū kàu-gia̍h ê liân-bín, ēng ke̍k-tōa ê chû-ài teh thiàⁿ lán. 5 Tng lán iáu teh pōe-ge̍k Siōng-Chú, lêng-sèng í-keng sí ê sî, to̍h hō͘ lán kah Ki-tok tâng-chê koh-oa̍h. Lán tùi Siōng-Chú ê un-tián lâi tit-kiù. 6 Thong-kòe lán kah Ki-tok Iâ-so͘ kiat-liân, Siōng-Chú hō͘ lán kah I tâng-chê koh-oa̍h, chò-hóe tī thiⁿ-téng chiáng-koân. 7 Án-ne sī beh tùi sè-sè tāi-tāi piáu-bêng I kàu-gia̍h ê un-tián, chiū-sī thong-kòe Ki-tok Iâ-so͘ tùi lán hián-sī ê chû-chû. 8 In-ūi lín sī khò Siōng-Chú ê un-tián tùi sìn lâi tit-kiù, m̄-sī khò lín ka-kī, sī khò Siōng-Chú ê un-sù. 9 Kì-jiân m̄-sī khò ka-kī ê kiâⁿ-ta̍h, chiū bô sím-mi̍h thang khoa-kháu. 10 In-ūi lán sī Siōng-Chú chhòng-chō ê, I thong-kòe Ki-tok Iâ-so͘ lâi kái-chō lán, ài lán kiâⁿ hó-sū. Che sī Siōng-Chú chá to̍h chún-pī ài lán án-ne khì chò.

Tī Ki-tok Lāi Chiâⁿ-chò Chi̍t-thé
11 Só͘-í lín chiah-ê chhut-sì to̍h sī Gōa-pang-lâng ê, hō͘ hiah-ê kiò-chò siū kat-lé ê Iû-thài-lâng kā lín chheng chò bô siū kat-lé. In ê kat-lé chiū-sī lâng ēng chhiú tī seng-khu kiâⁿ kat-lé. 12 Hit sî, lín bô kah Ki-tok kiat-liân, bô sio̍k Siōng-Chú ê soán-bîn, bô hūn tī Siōng-Chú èng-ín ê bêng-iok, tī chit sè-kan bô ǹg-bāng, mā m̄-bat Siōng-Chú. 13 M̄-koh lín chiah-ê í-chêng lī-khui Siōng-Chú hn̄g-hn̄g ê lâng, chit-má khò Ki-tok Iâ-so͘, thong-kòe I ê sí í-keng kah Siōng-Chú chhin-kīn. 14 In-ūi Ki-tok chò lán hô-pêng ê goân-thâu, I ēng ka-kī ê seng-khu thiah-húi hō͘-siōng tùi-te̍k ê chhiûⁿ, hō͘ Iû-thài-lâng kah Gōa-pang-lâng ha̍p chò-hóe, 15 I hùi-tû chō-chiâⁿ pí-chhú oan-siû ê Iû-thài-lâng kài-bēng ê lu̍t-hoat kah kui-lē, sī beh hō͘ siang-pêng thong-kòe I lâi chhòng-chō chi̍t-ê sin ê lâng, thang hô-pêng chò-hóe seng-oa̍h. 16 Koh thong-kòe si̍p-jī-kè tû-khì pí-chhú ê tùi-te̍k, hō͘ siang-pêng chiâⁿ-chò chi̍t thé, thang kah Siōng-Chú hô-hó. 17 Án-ne Ki-tok lâi thoân hô-pêng ê hok-im hō͘ só͘-ū ê lâng, pau-koat lín chiah-ê í-chêng lī-khui Siōng-Chú hn̄g-hn̄g ê Gōa-pang-lâng, kah chhin-kīn Siōng-Chú ê Iû-thài-lâng. 18 Thong-kòe Ki-tok, lán nn̄g-pêng ê lâng lóng ē-tàng tùi kāng chi̍t-ê Sèng-Sîn lâi chhin-kīn Thiⁿ-Pē. 19 Só͘-í lín Gōa-pang-lâng bô koh chò gōa-bīn ê lâng, m̄-sī chhut-gōa-lâng. Lín í-keng sī Siōng-Chú chú-bîn ê tông-pau, chò Siōng-Chú ke-lāi ê lâng. 20 Lín kah Iû-thài-lâng kāng-khoán, khí-chō tī sù-tô͘ kah sian-ti ê tē-ki téng-bīn, Ki-tok Iâ-so͘ ka-kī mā chò chhù-kak-thâu siōng tiōng-iàu ê chio̍h-ki. 21 Kui-ê kiàn-tio̍k-bu̍t khò Ki-tok lâi kiat-ha̍p, hō͘-siōng chiap-liân, chiām-chiām khòng-tián chiâⁿ-chò sèng-tiān lâi hiàn hō͘ Siōng-Chú. 22 Óa-khò Sèng-Sîn ê pang-chō͘, lín mā chò-hóe siū khí-chō lâi chiâⁿ-chò Siōng-Chú só͘ tòa ê só͘-chāi.