《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第一章

作者 巴克禮普世版小組 2015.09.06

1 Góa Pó-lô sī hōng Siōng-Chú ê chí-ì chò Ki-tok Iâ-so͘ ê sù-tô͘, siá phoe hō͘ tòa tī Í-hut-só͘ sio̍k Ki-tok Iâ-so͘ tiong-si̍t ê sìn-tô͘. 2 Goān lán ê Thiⁿ-Pē Siōng-Chú kah Chú Iâ-so͘ Ki-tok siúⁿ-sù lín un-tián kah pêng-an.

Sio̍k-Lêng ê Hok-khì
3 Tio̍h o-ló lán ê Chú Iâ-so͘ Ki-tok ê Thiⁿ-Pē! In-ūi I thong-kòe Ki-tok chiong thiⁿ-téng ta̍k-chióng sio̍k-lêng ê hok-khì siúⁿ-sù hō͘ lán. 4 Tī chhòng-sè í-chêng, Siōng-Chú to̍h thong-kòe Ki-tok kéng-soán lán, hō͘ lán tī I ê bīn-chêng chiâⁿ-chò sèng-kiat bô khoat-tiám ê lâng. 5 In-ūi Siōng-Chú thiàⁿ lán, chá to̍h koat-tēng beh thong-kòe Iâ-so͘ Ki-tok hō͘ lán chiâⁿ-chò I ê kiáⁿ-jî. Che sī chiàu I ê chí-ì, mā sī I só͘ hoaⁿ-hí-.ê. 6 Lán tio̍h o-ló Siōng-Chú êng-iāu ê un-tián, in-ūi I chiong só͘ thiàⁿ ê Kiáⁿ pe̍h-pe̍h siúⁿ-sù hō͘ lán. 7 Thong-kòe Ki-tok ê sí lán tit-tio̍h kiù-sio̍k, chōe-kòa tit-tio̍h sià-bián. Siōng-Chú ê un-tián si̍t-chāi hui-siông hong-hù. 8 I chiong chit-ê chhiong-chiok ê un-tián sù hō͘ lán, ēng ta̍k-chióng ê chhong-bêng tì-hūi, 9 chiàu I só͘ ì-ài ê chí-ì hō͘ lán chai, I chá to̍h koat-tēng beh thong-kòe Ki-tok lâi oân-sêng I ò-biāu ê kè-ōe. 10 Sî-kî nā kàu, Siōng-Chú beh oân-sêng chit-ê kè-ōe, chiū-sī beh chiong thiⁿ-téng kah tē-chiūⁿ ê pī-chō-bu̍t lóng chiâⁿ-chò chi̍t-thé, hō͘ Ki-tok chò it-chhè ê thâu. 11 Ú-tiū bān-bu̍t lóng chiàu Siōng-Chú ê kè-ōe kah chí-ì lâi oân-sêng, Siōng-Chú chiàu I chá to̍h tiāⁿ-tio̍h ê chí-ì, thong-kòe Ki-tok kéng-soán lán chò I ê chú-bîn. 12 Án-ne sī beh hō͘ goán chiah-ê seng kui-hiòng Ki-tok ê lâng lóng chheng-chàn Siōng-Chú ê êng-iāu. 13 Tùi lín lâi kóng mā sī án-ne, lín ū thiaⁿ-tio̍h chin-lí ê sìn-sit, to̍h sī hō͘ lín tit-kiù ê hok-im. Lín ū sìn, Siōng-Chú chiū chiong I só͘ èng-ín ê Sèng-Sîn siúⁿ-sù hō͘ lín, chò lín kui-hiòng I ê kì-hō. 14 Sèng-Sîn pó-chèng lán sêng-chiap Siōng-Chú só͘ èng-ín ê sán-gia̍p, ti̍t-kàu hō͘ kui-sio̍k Siōng-Chú ê lâng tit-tio̍h oân-choân ê chū-iû. Lán tio̍h chheng-chàn I ê êng-iāu.

Pó-lô ê Kî-tó
15 In-ūi án-ne, góa chi̍t-ē thiaⁿ-tio̍h lín tùi Chú Iâ-so͘ ū sìn-sim, koh tùi só͘-ū ê sèng-tô͘ ū thiàⁿ-sim, 16 chiū put-sî ūi-tio̍h lín kám-siā Siōng-Chú. Góa mā tī kî-tó tiong siàu-liām lín. 17 kî-kiû lán ê Chú Iâ-so͘ Ki-tok ê Siōng-Chú, êng-iāu ê Thiⁿ-Pē, siúⁿ-sù Sèng-Sîn hō͘ lín ū tì-hūi kah khé-sī, thang koh-khah chhim-ji̍p jīn-bat Siōng-Chú. 18 Góa khún-kiû Siōng-Chú khui lín ê sim-lêng, hō͘ lín thang chai I soán-tiàu lín ê ǹg-bāng sī án-chóaⁿ, I tùi sìn-tô͘ só͘ èng-ín ê chiok-hok sī jōa-ni̍h-á hong-hù. 19 Koh hō͘ lán chai I ê koân-lêng ūn-hêng tī lán chiah-ê sìn-tô͘ tiong-kan sī tōa kàu sím-mi̍h thêng-tō͘. 20 Chit-ê tōa koân-lêng chiū-sī hō͘ Ki-tok tùi sí-lâng tiong koh-oa̍h, koh hō͘ Ki-tok tī thiⁿ-téng chē tī I ê chiàⁿ-pêng. 21 Koh tī hia koán-hat só͘-ū ê chip-chèng-chiá, chiáng-koân-chiá kah koân-le̍k-chiá. I chhiau-oa̍t kim-sè kah lâi-sè it-chhè koân-pèng ē-tàng chheng-ho͘ ê thâu-hâm. 22 Siōng-Chú koh hō͘ ú-tiū bān-bu̍t khut-ho̍k tī Ki-tok ê kha-ē, koh hō͘ I chò kàu-hōe ê thâu, lâi thóng-tī it-chhè. 23 Kàu-hōe sī Ki-tok ê seng-khu, sī hō͘ Siōng-Chú só͘ chhiong-móa ú-tiū bān-bu̍t ê Hit-ūi Ki-tok só͘ chhiong-móa.