《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第15章

作者 巴克禮普世版小組 2011.07.10

1, Hit sî ū Hoat-lī-sài-phài ê lâng kap keng-ha̍k-kàu-su, tùi Iâ-lō͘-sat-léng lâi chiū-kūn Iâ-so͘, kóng,
2, Lí ê bûn-tô͘ siáⁿ-sū hoān-tio̍h kó͘-chá lâng ê liû-thoân? in-ūi chia̍h ê sî in bô sóe chhiú.
3, I chiū ìn kóng, Siáⁿ-sū lín iā tùi lín ê liû-thoân lâi hoān-tio̍h Siōng-chú ê bēng-lēng ah?
4, In-ūi Siōng-chú kóng, Tio̍h kèng lín ê pē, lín ê bú; koh ū kóng, Mē pē á-sī mē bú ê, tek-khak tio̍h hō͘ i sí.
5, Tān-sī lín chiū kóng, Kìⁿ-nā lâng tùi pē á-sī bú kóng,
6, Lí pún só͘ ē thang tùi góa tit-tio̍h ê lī-ek, í-keng hiàn-khì; hit lâng chiū choa̍t-tùi bô kèng i ê pē. Lín chiū tùi lín ê liû-thoân í-keng hòe Siōng-chú ê tō-lí.
7, Ké-hó ê lâng ah, Í-sài-a chí lín lâi ū-giân ê chin-chiàⁿ tio̍h; i kóng,
8, Chit-ê jîn-bîn ēng chhùi-tûn chun-kèng góa; Tān-sī in ê sim lī-khui góa hn̄g-hn̄g.
9, In kèng-pài góa sī khang-khang, In-ūi in ēng lâng só͘ bēng-lēng ê chò kà-sī lâi kà-sī lâng.
10, Chiū kiò chèng lâng lâi, kā in kóng, Lín tio̍h thiaⁿ lâi hiáu-ngō͘.
11, M̄-sī tùi chhùi ji̍p-ê ē hō͘ lâng ù-òe; chiū-sī tùi chhùi chhut-ê, chit-ê ē hō͘ lâng ù-òe.
12, Hit sî bûn-tô͘ chiū-kūn lâi kā I kóng, Hoat-lī-sài-phài ê lâng thiaⁿ-tio̍h chit-ê ōe, chin m̄ goān, lí chai mah?
13, I ìn kóng, Kìⁿ-nā chai-chèng ê mi̍h m̄-sī góa ê Thiⁿ Pē só͘ chai-chèng ê, boeh pu̍ih i ê kun.
14, Chhut-chāi in; in sī chhiⁿ-mî teh chhōa lō͘ ê. Tān-sī chhiⁿ-mî kā chhiⁿ-mî ê chhōa lō͘, nn̄g ê teh-boeh poa̍h-lo̍h hām-khiⁿ.
15, Pí-tek ìn I kóng, Chit-ê phì-jū, chhiáⁿ kā goán kóe-bêng.
16, I chiū kóng, Lín iā iáu-kú bē hiáu-ngō͘ mah?
17, Kiám bē hiáu-tit, kìⁿ-nā tùi chhùi ji̍p ê, lo̍h tī pak-tó͘, lâi pàng tī chhè-tî ah?
18, Tān-sī tùi chhùi chhut ê; sī tùi sim-lāi hoat-chhut; chiah-ê hō͘ lâng ù-òe.
19, In-ūi tùi sim hoat-chhut pháiⁿ liām-thâu, hêng-hiong, kan-îm, su-thong, thau-the̍h, lām-sám kiàn-chèng, pòng-to̍k;
20, chiah-ê sī hō͘ lâng ù-òe; tān-sī bô sóe chhiú lâi chia̍h, bē hō͘ lâng ù-òe.
21, Iâ-so͘ tùi hia chhut-khì thè-khì kàu Chhui-lô Se-tùn ê kéng-kài.
22, Tú-tn̄g ū Ka-lâm ê hū-jîn-lâng chhut in ê kau-kài, âu-kiò kóng, Chú ah, Tāi-pi̍t ê kiáⁿ-sun, lîn-bín góa; góa ê cha-bó͘-kiáⁿ hoān-tio̍h kúi, chin kan-khó͘.
23, Iâ-so͘ bô ìn i chi̍t kù. I ê bûn-tô͘ lâi, kiû I kóng, Tio̍h kah i khì, in-ūi i tī lán ê āu-bīn teh âu-kiò.
24, I chiū ìn kóng, Góa hōng chhe, bô m̄-sī chiū-kūn Í-sek-lia̍t ke sit-lo̍h ê iûⁿ nā-tiāⁿ.
25, Hū-jîn-lâng lâi pài I kóng, Chú ah, pang-chō͘ góa.
26, Tān-sī I kóng, The̍h kiáⁿ-jî ê piáⁿ, hiat hō͘ káu-á, sī m̄ ha̍p.
27, Hū-jîn-lâng kóng, Chú ah, tio̍h; in-ūi liân káu-á iā ē tit chia̍h in ê chú-lâng toh-kha ka-la̍uh ê piáⁿ-iù.
28, Tùi án-ne Iâ-so͘ ìn kóng, Hū-jîn-lâng ah, lí ê sìn tōa à; chiàu lí só͘ ài ê, kā lí chò chiâⁿ. Tùi hit sî i ê cha-bó͘-kiáⁿ í-keng hó.
29, Iâ-so͘ lī-khui hia, kàu Ka-lī-lī-séng hái-piⁿ; chiūⁿ soaⁿ teh chē.
30, Ū chē-chē tīn ê lâng chiū-kūn I, sòa tòa pái-kha ê, chhiⁿ-mî ê, é-káu ê, phòa-siùⁿ ê, kap chē-chē pa̍t khoán ê lâi, hē tī I ê kha-chêng; chiū i-hó in.
31, Tì-kàu chèng lâng gông-ngia̍h; in-ūi khòaⁿ-tio̍h é-káu ê kóng ōe, phòa-siùⁿ ê lóng hó, pái-kha ê kiâⁿ, chhiⁿ-mî ê khòaⁿ-tio̍h; chiū kui êng-kng Í-sek-lia̍t ê Siōng-chú.
32, Iâ-so͘ kiò I ê bûn-tô͘ lâi, kóng, Góa lîn-bín chiah-ê lâng, in-ūi in í-keng kap góa tòa saⁿ ji̍t; iā bô mi̍h thang chia̍h; góa m̄ kam hō͘ in iau-iau khì, kiaⁿ-liáu in lō͘-ni̍h ià-siān.
33, Bûn-tô͘ kā I kóng, Goán tī khòng-iá, tùi tó-ūi ū hiah chōe piáⁿ thang hō͘ chiah chōe lâng chia̍h pá?
34, Iâ-so͘ kā in kóng, Lín ū jōa chōe piáⁿ? ìn kóng, Chhit ê, kap tām-po̍h sòe bé hî.
35, Chiū hoan-hù chèng lâng chē tī tē-ni̍h;
36, The̍h hí chhit ê piáⁿ kap hî, chiok-siā peh, kau hō͘ bûn-tô͘, bûn-tô͘ chiū hō͘ chèng lâng.
37, Lóng chia̍h kàu pá; khioh só͘ chhun ê sut-á, té-móa chhit nâ.
38, Chia̍h ê, hū-jîn-lâng gín-ná í-gōa, kiōng sì-chheng lâng.
39, Kì-jiân hō͘ chèng lâng sì-sòaⁿ, chiū chiūⁿ chûn, kàu Má-ka-tàn ê kau-kài.