《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十二章

作者 巴克禮普世版小組 2015.03.22

Sèng-Sîn ê Un-sù
1 Hiaⁿ-tī chí-mōe ah, koan-hē Sèng-Sîn ê siúⁿ-sù, góa ài lín liáu-kái khah chheng-chhó. 2 Lín chai lín iáu-bōe sìn Chú ê sî chhut-chāi lâng ín-iú khì pài bē kóng-ōe ê ngó͘-siōng. 3 Só͘-í góa ài lín bêng-pe̍k, siū Siōng-Chú ê Sèng-Sîn kám-tōng ê lâng bē kóng, "Iâ-so͘ tio̍h siū chiù-chó͘." Bô siū Sèng-Sîn kám-tōng ê lâng mā bē kóng, "Iâ-so͘ sī Chú." 4 Un-sù ū bô kāng, m̄-koh siúⁿ-sù un-sù ê Sèng-Sîn sī kāng chi̍t-ê. 5 Sū-hōng ū chin-chē khoán, m̄-koh sī sū-hōng kāng chi̍t-ê Chú. 6 Kang-chok ū chin-chē khoán, m̄-koh hō͘ lâng ū lêng-le̍k khì chò ta̍k-hāng tāi-chì ê sī kāng chi̍t-ê Siōng-Chú. 7 Sèng-Sîn hián-bêng tī ta̍k-lâng sin-chiūⁿ sui-jiân chi̍t-lâng chi̍t-khoán, m̄-koh bo̍k-tek lóng sī ūi-tio̍h beh hō͘ chèng-lâng tit-tio̍h lī-ek 8 Ū-lâng tùi Sèng-Sîn tit-tio̍h thoân hok-im ê tì-hūi ê, ū-lâng tùi kāng chi̍t-ê Sèng-Sîn tit-tio̍h tì-sek. 9 Koh ū-lâng tùi kāng chit-ê Sèng-Sîn tit-tio̍h sìn-sim, ū-lâng tùi kāng chi̍t-ê Sèng-Sîn tit-tio̍h i-pēⁿ ê un-sù. 10 Ū-lâng tit-tio̍h kiâⁿ sîn-jiah ê lêng-le̍k, ū-lâng tit-tio̍h thoân Siōng-Chú hok-im ê un-sù, ū-lâng tit-tio̍h hun-pia̍t chin-sîn kah ké-sîn ê un-sù, koh ū-lâng tit-tio̍h kóng kok-chióng ōe-gí ê un-sù, ū-lâng tit-tio̍h hoan-e̍k kok-chióng ōe-gí ê un-sù. 11 Chiah-ê lóng sī kāng chi̍t-ê Sèng-Sîn teh ūn-chok, chiàu I ka-kī ê ì-sù chiong bô-kāng ê un-sù hō͘ ta̍k-lâng.

Chi̍t-ê Seng-khu Ū Chin-chē Ki-thé
12 Chhin-chhiūⁿ seng-khu sī chi̍t-ê, m̄-koh ū chin-chē ki-thé. Seng-khu ê ki-thé sui-jiân chin-chē, m̄-koh seng-khu chí-ū chi̍t-ê, Ki-tok mā sī án-ne. 13 Bô-lūn Iû-thài-lâng á-sī Hi-lia̍p-lâng, lô͘-lē á-sī chū-iû-sin, lóng tùi kāng chi̍t-ê Sèng-Sîn niá-siū sé-lé lâi chiâⁿ-chò chi̍t-thé, mā kiōng-tông niá-siū kāng chi̍t-ê Sèng-Sîn. 14 Seng-khu m̄-sī kan-taⁿ chi̍t-ê ki-thé, ū chin-chē ki-thé. 15 Kha nā kóng, "Góa m̄-sī chhiú, só͘-í bô sio̍k seng-khu." Kha bô in-ūi án-ne chiū bô sio̍k seng-khu. 16 Hīⁿ-á nā kóng, "Góa m̄-sī ba̍k-chiu, só͘-í bô sio̍k seng-khu." Hīⁿ-á bô in-ūi án-ne chiū bô sio̍k seng-khu. 17 Choân seng-khu nā lóng sī ba̍k-chiu, beh ēng sím-mi̍h lâi thiaⁿ? Choân seng-khu nā lóng sī hīⁿ-á, beh ēng sím-mi̍h lâi phīⁿ? 18 Kî-si̍t Siōng-Chú chiàu I ê chí-ì, chiong ta̍k-ê ki-thé sûi-ê an-tì tī seng-khu. 19 Nā pah-thé lóng kāng khoán, ná ē-tàng chiâⁿ-chò chi̍t-ê seng-khu? 20 Seng-khu sui-jiân ū pah-thé, seng-khu khiok-sī kan-taⁿ chi̍t-ê. 21 Ba̍k-chiu bē-tàng tùi chhiú kóng, "Góa bô su-iàu lí." Thâu-khak mā bē-tàng tùi kha kóng, "Góa bô su-iàu lín." 22 Kî-si̍t hiah-ê khòaⁿ khí-lâi khah nńg-chiáⁿ ê ki-thé tian-tò koh-khah ū pit-iàu. 23 Lán khòaⁿ-chò khah bô kùi-khì ê ki-thé, lán tian-tò tio̍h kā in khah chiàu-kò͘. Hiah-ê khah pháiⁿ-khòaⁿ ê ki-thé, lán tian-tò tio̍h kā in khah koan-sim. 24 Hiah-ê khah hó-khòaⁿ ê ki-thé bô su-iàu táⁿ-pān. Siōng-Chú chiong seng-khu an-tì hó-sè, hō͘ hiah-ê khah bô tiōng-iàu ê ki-thé koh-khah siū chun-tiōng. 25 Án-ne chiah hō͘ seng-khu bē hun-lia̍t, tian-tò hō͘ pah-thé hō͘-siōng chiàu-kò͘. 26 Chi̍t-ê ki-thé nā siū-khó͘, pah-thé chiū tâng siū-khó͘. Chi̍t-ê ki-thé nā tit-tio̍h êng-kng, pah-thé chiū chò-hóe hoaⁿ-hí. 27 Lín sī Ki-tok ê seng-khu, ta̍k-lâng sī seng-khu ê ki-thé. 28 Siōng-Chú tī kàu-hōe só͘ an-tì ê, tē-it sī sù-tô͘, tē-jī sī sian-ti, tē-saⁿ sī kàu-su, koh ū kiâⁿ sîn-jiah ê, ū i-pēⁿ un-sù ê, pang-chō͘ lâng ê, tī-lí sū-bū ê, kóng ta̍k-chióng ōe-gí-.ê. 29 Ta̍k-lâng kám lóng sī sù-tô͘? lóng sī sian-ti? lóng sī kàu-su? lóng kiâⁿ sîn-jiah-.ê? 30 Kám lóng ū i-pēⁿ ê un-sù? Kám lóng ē kóng ta̍k-chióng ê ōe-gí? Kám lóng ē hoan-e̍k bô-kāng ê ōe-gí? 31 Lín tio̍h pek-chhiat him-bō͘ koh-khah tōa ê un-sù. Taⁿ góa kā lín chí-sī chi̍t-tiâu siōng-hó ê lō͘.