《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十一章

作者 巴克禮普世版小組 2015.03.15

Lín tio̍h o̍h góa, chhin-chhiūⁿ góa o̍h Ki-tok.

Tà Thâu-kin ê Kui-tēng
2 Góa tio̍h kā lín o-ló, in-ūi lín put-sî ē-kì-tit góa, koh chun-siú góa thoân hō͘ lín ê kà-sī. 3 M̄-koh góa ài lín bêng-pe̍k, Ki-tok sī só͘-ū cha-po͘-lâng ê thâu, cha-po͘-lâng sī cha-bó͘-lâng ê thâu, Siōng-Chú sī Ki-tok ê thâu. 4 Cha-po͘-lâng tī kong-kiōng tiûⁿ-só͘ kî-tó á-sī thoân hok-im ê sî, nā tà thâu-kin chiū bú-jio̍k i ê thâu Ki-tok. 5 M̄-koh cha-bó͘-lâng tī kî-tó á-sī thoân hok-im ê sî, bô tà thâu-kin chiū bú-jio̍k i ka-kī ê thâu, chiū-sī i ê tiōng-hu, in-ūi chit-khoán ê cha-bó͘-lâng kah thâu-mn̂g hō͘ lâng thì khí-lâi ê cha-bó͘-lâng kāng-khoán. 6 Cha-bó͘-lâng nā bô tà thâu-kin, thâu-mn̂g tio̍h chián khí-lâi. Kì-jiân kā chián thâu-mn̂g á-sī thì thâu-mn̂g khòaⁿ-chò kiàn-siàu, chiū tio̍h tà thâu-kin khah hó. 7 Cha-po͘-lâng bô eng-kai tà thâu-kin, in-ūi i sī Siōng-Chú ê hêng-siōng kah êng-kng, m̄-koh cha-bó͘-lâng sī cha-po͘-lâng ê êng-kng. 8 In-ūi cha-po͘-lâng m̄-sī tùi cha-bó͘-lâng chō chhut-lâi, m̄-koh cha-bó͘-lâng sī tùi cha-po͘-lâng chō chhut-lâi-.ê. 9 Cha-po͘-lâng m̄-sī ūi-tio̍h cha-bó͘-lâng chiah chhòng-chō, cha-bó͘-lâng sī ūi-tio̍h cha-po͘-lâng lâi chhòng-chō-.ê. 10 Só͘-í cha-bó͘-lâng ê thâu tio̍h tà thâu-kin lâi piáu-sī tùi koân-ui khut-ho̍k ê kì-hō, mā sī ūi-tio̍h kèng-ùi thiⁿ-sài ê iân-kò͘. 11 M̄-koh tī Chú ê lāi-bīn, cha-po͘-lâng su-iàu cha-bó͘-lâng, cha-bó͘-lâng mā su-iàu cha-po͘-lâng. 12 In-ūi cha-bó͘-lâng sī tùi cha-po͘-lâng chō chhut-lâi-.ê, cha-po͘-lâng mā sī tùi cha-bó͘-lâng seⁿ ê, m̄-koh bān-bu̍t lóng sī tùi Siōng-Chú chō chhut-lâi-.ê. 13 Lín tio̍h ka-kī phòaⁿ-toàn: cha-bó͘-lâng bô tà thâu-kin lâi tùi Siōng-Chú kî-tó, kám ū sek-ha̍p? 14 Chiàu lâng pún-sèng, lâu tn̂g-thâu-mn̂g sī cha-po͘-lâng ê kiàn-siàu. 15 M̄-koh cha-bó͘-lâng lāu tn̂g-thâu-mn̂g sī i ê êng-kng, in-ūi tn̂g-thâu-mn̂g thang chò i ê jia-phè. 16 Nā ū-lâng siūⁿ beh piān-pok, góa chí-ū ē-tàng kóng, tī goán kah Siōng-Chú ê kàu-hōe kan-taⁿ ū chit-khoán kui-kí.

Chú ê Boán-chhan
17 Taⁿ góa beh kā lín chí-sī ē-bīn chiah-ê ōe, m̄-sī kā lín o-ló, in-ūi lín ê chū-hōe si̍t-chāi sī iú-sún bû-ek. 18 Tē-it, góa thiaⁿ-kóng lín chū-hōe ê sî ū kiat-tóng hun-phài. Góa siong-sìn ū chi̍t-pō͘-hūn sī sū-si̍t. 19 Lín tiong-kan bián-put-liáu ū bô-kāng ê ì-kiàn, án-ne chiah khòaⁿ ē chhut siáⁿ-lâng ê ì-kiàn khah chèng-khak. 20 Lín chū-hōe ê sî, pēng m̄-sī teh chia̍h Chú ê boán-chhan. 21 In-ūi lín ta̍k-lâng kóaⁿ-kín chia̍h ka-kī tòa-lâi ê mi̍h. Kiat-kó ū-lâng pak-tó͘ iau, ū-lâng chiú-chùi. 22 Lín tòa chhù-ni̍h kám bē-tàng lim-chia̍h? Lín sī teh khòaⁿ-khin Siōng-Chú ê kàu-hōe, mā beh hō͘ bô thang lim-chia̍h ê lâng kiàn-siàu sī-bô? Góa tio̍h tùi lín án-chóaⁿ kóng? Tùi chit-hāng tāi-chì, góa bô beh kā lín o-ló. 23 Góa tùi Chú só͘ niá-siū ê, góa mā thoân hō͘ lín, chiū-sī Chú Iâ-so͘ hō͘ lâng chhut-bē hit mê ū the̍h piáⁿ, 24 kám-siā Siōng-Chú liáu-āu kā piáⁿ peh-khui, kóng, "Chit-ê sī Góa ê seng-khu, ūi-tio̍h lín hi-seng ê, lín tio̍h chiàu án-ne lâi kì-liām Góa. 25 Chia̍h liáu-āu koh phâng poe, kóng, "Chit-ê poe sī sin ê iok, ēng Góa ê hoeh siat-li̍p ê, lín ta̍k-pái lim ê sî, tio̍h chiàu án-ne lâi kì-liām Góa." 26 Án-ne lín ta̍k-pái chia̍h chit-ê piáⁿ, lim chit-ê poe, sī teh piáu-bêng Chú ê sí, ti̍t kàu I koh chài-lîm. 27 Só͘-í nā bô ēng kèng-khiân ê sim lâi chia̍h Chú ê piáⁿ, lim Chú ê poe, bô ha̍p-gî ê, sī teh siat-to̍k Chú ê seng-khu kah hoeh. 28 Ta̍k-lâng tio̍h séng-chhat ka-kī, chiah thang chia̍h chit-ê piáⁿ, lim chit-ê poe. 29 Lâng nā bô chheng-chhó chia̍h-piáⁿ lim-poe kah Chú seng-khu ê koan-hē, chia̍h chit-ê piáⁿ lim chit-ê poe chiū-sī ka-kī teh jiá-lâi sím-phòaⁿ. 30 In-ūi án-ne, lín chiah ē chin-chē lâng soe-lám kah phòa-pēⁿ, mā bē-chió lâng sí-khì. 31 Lán nā seng séng-chhat ka-kī, chiū bē tì-kàu siū sím-phòaⁿ. 32 M̄-koh lán siū Chú sím-phòaⁿ sī teh hō͘ Chú kā lán kéng-kài, chiah m̄-bián kah sè-kan-lâng chò-hóe siū tēng-chōe. 33 Só͘-í, góa ê hiaⁿ-tī chí-mōe ah, lín chū-chi̍p beh chia̍h Chú ê boán-chhan ê sî, tio̍h hō͘-siōng thèng-hāu. 34 Nā ū-lâng iau, tio̍h tī chhù-ni̍h seng chia̍h, chiah bián chū-hōe soah piàn-chò siū Siōng-Chú sím-phòaⁿ. Kî-tha ê tāi-chì tán góa khì lín hia ê sî chiah lâi kái-koat.