《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第七章

作者 巴克禮普世版小組 2015.02.15

Hun-in ê Būn-tê
1 Koan-hē lín tī phoe lāi-bīn thê-khí ê būn-tê: lâng bô kiat-hun khah hó. 2 M̄-koh in-ūi lín ū chi̍t-kóa îm-loān ê tāi-chì, só͘-í ta̍k-ê cha-po͘-lâng tio̍h ū ka-kī ê bó͘, ta̍k-ê cha-bó͘-lâng mā tio̍h ū ka-kī ê ang. 3 Cha-po͘-lâng tùi bó͘ tio̍h chīn chò ang ê gī-bū, cha-bó͘-lâng tùi ang mā tio̍h chīn chò bó͘ ê gī-bū. 4 Bó͘ tùi ka-kī ê seng-khu bô chú-koân, i ê chú-koân chāi-tī in ang. Siāng-khoán, ang tùi ka-kī ê seng-khu bô chú-koân, i ê chú-koân chāi-tī in bó͘. 5 M̄-thang hut-lio̍k tùi-hong ê su-iàu. Nā-sī ūi-tio̍h beh choan-sim kî-tó, hō͘-siong tông-ì chiū thang chiām-sî hun-khui. Āu-lâi iû-goân tio̍h chò-hóe tòa, chiah bián-tit in-ūi bē-tàng khòng-chè ka-kī ê chêng-io̍k, tì-sú siū Sat-tàn ê iú-he̍k. 6 Góa kóng ang-bó͘ thang chiām-sî hun-khui, sī ín-chún, m̄-sī bēng-lēng. 7 Góa ài ta̍k-lâng lóng chhin-chhiūⁿ góa bô kiat-hun, m̄-koh ta̍k-lâng tùi Siōng-Chú niá-siū ê un-sù bô kāng-khoán. Ū-ê chit khoán, ū-ê hit khoán. 8 Tùi hiah-ê bōe kiat-hun kah kóaⁿ-hū, góa khǹg in nā ē-tàng chhin-chhiūⁿ góa siú to̍k-sin sī hó. 9 M̄-koh nā bē-tàng khòng-chè ka-kī, chiū tio̍h kiat-hun. Lêng-khó kiat-hun, pí hō͘ io̍k-hóe sio khah hó. 10 Í-keng kiat-hun ê lâng, góa bēng-lēng lín, kî-si̍t m̄-sī góa, sī Chú ê bēng-lēng: cha-bó͘-lâng m̄-thang lī-khui in ang. 11 Nā lī-khui, chiū tio̍h siú to̍k-sin. Nā bô tio̍h koh kah in ang hô-hó. Cha-po͘-lâng mā m̄-thang pàng-sak in bó͘. 12 Tùi kî-tha ê lâng góa kóng, m̄-sī Chú kóng: Nā lâm-sìn-tô͘ chhōa bô sìn Chú ê lâng chò bó͘, in bó͘ hoaⁿ-hí chò-hóe tòa, chiū m̄-thang kā i pàng-sak. 13 Nā lí-sìn-tô͘ kah bô sìn Chú ê lâng kiat-hun, ang hoaⁿ-hí kah i chò-hóe tòa, mā m̄-thang kā in ang pàng-sak. 14 Bô sìn Chú ê cha-po͘-lâng in-ūi chhōa sìn Chú ê lâng chò bó͘ ē tit-tio̍h Siōng-Chú ê chiap-la̍p. Kāng-khoán án-ne, bô sìn Chú ê cha-bó͘-lâng in-ūi kè sìn Chú ê ang ē tit-tio̍h Siōng-Chú ê chiap-la̍p. Nā m̄-sī án-ne, lín ê kiáⁿ-jî chiū bô sio̍k Siōng-Chú, kî-si̍t in sī kui-sio̍k Siōng-Chú. 15 M̄-koh bô sìn Chú ê lâng nā beh lī-khui, chiū chhut-chāi i lī-khui. Tī chit-khoán ê chêng-hêng, sìn Chú ê ang á-sī bó͘ chiū bô siū hun-in ê iok-sok. Siōng-Chú ho͘-tiàu lán sī ài lán pêng-an kòe ji̍t-chí. 16 Lín tio̍h chai, sìn Chú ê cha-bó͘-lâng kiám-chhái ē kiù ka-kī ê ang. Tio̍h chai, sìn Chú ê cha-po͘-lâng kiám-chhái ē kiù ka-kī ê bó͘.

Tio̍h Pó-chhî Siū Tiàu Hit Sî ê Sin-hūn
17 Ta̍k-lâng tio̍h chiàu Chú siúⁿ-sù ê un-sù, chiàu Siōng-Chú kéng-tiàu ta̍k-lâng ê bo̍k-tek lâi seng-oa̍h. Che sī góa kàu-tō kok kàu-hōe ê chún-chek. 18 Siū kat-lé liáu-āu chiah chiap-siū ho͘-tiàu ê lâng m̄-bián am-khàm kat-lé ê kì-hō. Siū ho͘-tiàu ê sî iáu-bōe siū kat-lé ê lâng mā m̄-bián khì siū kat-lé. 19 In-ūi ū siū á-sī bô siū kat-lé lóng bô iàu-kín, siōng iàu-kín ê sī chun-siú Siōng-Chú ê kài-bēng. 20 Ta̍k-lâng tio̍h pó-chhî siū-tiàu hit sî ê sin-hūn. 21 Lí chò lô͘-lē ê sî lâi siū-tiàu sī-bô? M̄-bián kòa-ì, m̄-koh nā ū ki-hōe tit-tio̍h chū-iû, tio̍h pá-ak ki-hōe. 22 In-ūi siū Chú kéng-tiàu ê lô͘-lē sī hō͘ Chú tháu-pàng ê chū-iû-lâng. Siāng-khoán, siū Chú kéng-tiàu ê chū-iû-lâng sī Ki-tok ê lô͘-po̍k. 23 Lín sī Siōng-Chú ēng tāi-kè bé lâi-.ê, m̄-thang chiâⁿ-chò lâng ê lô͘-lē. 24 Hiaⁿ-tī chí-mōe ah, ta̍k-lâng tio̍h tī Siōng-Chú ê bīn-chêng pó-chhî lín goân-lâi ê sin-hūn.

To̍k-sin kah Kóaⁿ-hū ê Būn-tê
25 Koan-hē to̍k-sin ê būn-tê, góa bô siū Chú ê bēng-lēng, m̄-koh góa í-keng tit-tio̍h Chú ê liân-bín lâi chiâⁿ-chò chīn-tiong ê lô͘-po̍k, góa thê-chhut ka-kī ê ì-kiàn. 26 Khó-lī bo̍k-chêng ê kan-lân ê chhù-kéng, góa siūⁿ lâng iáu-sī pó-chhî hiān-chōng khah hó. 27 Nā í-keng chhōa-bó͘ chiū m̄-thang siūⁿ beh chū-iû. Nā iáu-bōe chhōa-bó͘ chiū m̄-thang siūⁿ beh chhōa. 28 M̄-koh lí nā chhōa, m̄-sī hoān-chōe; chāi-sek-lí nā kè, mā m̄-sī hoān-chōe. M̄-koh in hit chióng lâng beh tī jio̍k-thé tú-tio̍h hoān-lān; góa sī teh kò͘ lín. 29 Hiaⁿ-tī chí-mōe ah, góa kā lín kóng, sî-ji̍t teh-beh kàu à, só͘-í tùi taⁿ í-āu, ū bó͘ ê tio̍h chhin-chhiūⁿ bô bó͘; 30 teh thî-khàu ê chhin-chhiūⁿ bô teh thî-khàu; hoaⁿ-hí ê chhin-chhiūⁿ bô teh hoaⁿ-hí; bé mi̍h-kiāⁿ ê chhin-chhiūⁿ bô tit-tio̍h sím-mi̍h; 31 teh ēng sè-kan ê mi̍h ê chhin-chhiūⁿ bô teh lām-sám ēng,in-ūi chit sè-kan ê hiān-chōng teh-beh kòe-khì à. 32 Góa ài lín lóng bô-hoân bô-ló. Bô chhōa-bó͘ ê lâng koan-sim Chú ê tāi-chì, bo̍k-tek sī beh hō͘ Chú hoaⁿ-hí. 33 M̄-koh ū bó͘ ê lâng chhau-hoân sè-kan ê tāi-chì, bo̍k-tek sī beh hō͘ bó͘ hoaⁿ-hí, soah hun-sim. 34 Bô kè ê cha-bó͘-lâng kah siáu-lí koan-sim Chú ê tāi-chì, sī beh hō͘ i ê seng-khu kah sim-lêng lóng sèng-kiat, m̄-koh kè-ang ê cha-bó͘-lâng chhau-hoân sè-kan ê tāi-chì, bo̍k-tek sī beh hō͘ in ang hoaⁿ-hí. 35 Góa án-ne tùi lín kóng sī ūi-tio̍h lín ê lī-ek, m̄-sī beh kā lín sok-pa̍k, sī ài lín chò ha̍p-gî ê tāi-chì, thang choan-sim ho̍k-sāi Chú, bô sè-kan-sū ê kiáu-jiáu. 36 M̄-koh nā ū lâng siūⁿ-kóng ka-kī tùi-thāi bōe chhut-kè ê cha-bó͘-kiáⁿ bô eng-kai, cha-bó͘-kiáⁿ nā í-keng chhiau-kòe kiat-hun ê nî-lêng, eng-kai tio̍h chiàu i ê ì-sù hō͘ i kiat-hun, án-ni chò m̄-sī hoān-chōe. 37 M̄-koh i nā bô put-tek-í ê tāi-chì, sī chhut-tī ka-kī ê koat-sim, koh ē-tàng khòng-chè ka-kī ê ì-chì, koat-tēng bô beh hō͘ cha-bó͘-kiáⁿ kiat-hun, án-ne chò sī hó. 38 Chóng-kóng chi̍t-kù, hō͘ ka-kī ê cha-bó͘-kiáⁿ kiat-hun sī hó, bô hō͘ i chhut-kè koh-khah hó. 39 Tiōng-hu iáu oa̍h-teh ê sî, hit-ê cha-bó͘-lâng tio̍h siū sok-pa̍k. Tiōng-hu nā sí-khì, i thang chū-iû kè i só͘ ì-ài ê lâng, m̄-koh tio̍h kè hō͘ sìn Chú ê lâng chiah thang. 40 I nā bô koh kè sī koh-khah ū hok-khì. Che sī góa siūⁿ-hoat, chóng-sī góa siūⁿ goa mā ū siū Siōng-Chú ê Sèng-Sîn khé-sī.