《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第六章

作者 巴克禮普世版小組 2015.02.08

Sìn-tô͘ Tiong-kan ê Hun-cheng
1 Lín tiong-kan ū-lâng kah lâng ū kiù-hun ê sî, ná-ē bô tī sìn-tô͘ ê bīn-chêng kiû kái-koat, khiok kò khì bī-sìn-chiá ê hoat-koaⁿ? 2 Lín kám m̄-chai sìn-tô͘ beh sím-phòaⁿ sè-kan? Kì-jiân lín beh sím-phòaⁿ sè-kan, kám bē-hiáu sím-phòaⁿ sió-khóa ê tāi-chì? 3 Lín kám m̄-chai lán liân thiⁿ-sài to beh sím-phòaⁿ? Chit sè-kan ji̍t-siông ê tāi-chì koh-khah bián kóng! 4 Chit-khoán tāi-chì, lín kám thang kau hō͘ kàu-hōe-gōa ê lâng kā lín phòaⁿ-koat? 5 Góa án-ne kóng sī beh hō͘ lín kám-kak kiàn-siàu. Lín tiong-kan kám bô chi̍t-ê ū tì-hūi ê lâng thang phòaⁿ-toàn sìn-tô͘ tiong-kan ê kiù-hun? 6 Kèng-jiân ū sìn-tô͘ kò sìn-tô͘, sīm-chì kò kàu bī-sìn-chiá ê bīn-chêng. 7 Kî-si̍t lín tiong-kan ū sio-kò, í-keng piáu-sī lín ê tōa sit-chhò. Ná-ē m̄ lêng-khó hō͘ lâng oan-óng? Ná-ē m̄ lêng-khó siū khek-khui? 8 M̄-koh lín tian-tò oan-óng lâng, khek-khui lâng, sīm-chì tùi kàu-hōe-lāi ê hiaⁿ-tī chí-mōe mā án-ne chò. 9 Lín kám m̄-chai put-gī ê lâng bē-tàng chò Siōng-Chú Kok-tō͘ ê chú-bîn? M̄-thang khi-phiàn ka-kī. Bô-lūn sī îm-loān ê, pài ngó͘-siōng ê, hoān kan-îm ê, chò lâm-chhiong ê, hò͘ⁿ lâm-sek ê, 10 chò chha̍t ê, tham-sim ê, hò͘ⁿ-chiú ê, húi-pòng ê, chà-khi ê, lóng bē-tàng chò Siōng-Chú Kok-tō͘ ê chú-bîn. 11 Lín tiong-kan í-chêng ū-lâng sī án-ne, m̄-koh óa-khò Chú Iâ-so͘ Ki-tok ê miâ kah lán ê Siōng-Chú ê Sèng-Sîn, lín í-keng sé chheng-khì chiâⁿ-chò sèng-kiat, kah Siōng-Chú ū hô-ha̍p ê koan-hē.

Ēng Seng-khu Êng-kng Siōng-Chú
12 Ū-lâng kóng, "Ta̍k-hāng tāi-chì góa lóng thang chò." M̄-koh m̄-sī ta̍k-hāng tāi-chì lóng ū lī-ek. Góa mā thang kóng, "Ta̍k-hāng tāi-chì góa lóng thang chò." M̄-koh góa bô beh hō͘ jīm-hô tāi-chì kā góa khòng-chè. 13 Ū-lâng kóng, "Chia̍h sī ūi-tio̍h pak-tó͘, pak-tó͘ mā sī ūi-tio̍h chia̍h." M̄-koh Siōng-Chú lóng beh kā chit nn̄g hāng húi-hoāi. Seng-khu m̄-sī ūi-tio̍h îm-loān, sī ūi-tio̍h ho̍k-sāi Chú, Chú mā ē kiong-kip lán seng-khu ê su-iàu. 14 Siōng-Chú ū hō͘ Chú tùi sí koh-oa̍h, mā ē ēng I ê koân-lêng hō͘ lán koh-oa̍h. 15 Lín kám m̄-chai lín ê seng-khu sī Ki-tok ê ki-thé? Án-ne góa kám thang chiong Ki-tok ê ki-thé piàn-chò chhiong-ki ê ki-thé? Choa̍t-tùi m̄-thang. 16 Lín kám m̄-chai kah chhiong-ki hoat-seng jio̍k-thé koan-hē, chiū-sī kah i chiâⁿ-chò chi̍t-thé? In-ūi Sèng-keng ū kóng: Nn̄g-ê beh chiâⁿ-chò chi̍t-thé.( chù: CSK 2:2) 17 M̄-koh kah Chú kiat-ha̍p ê lâng chiū-sī sim-lêng kah Chú chiâⁿ-chò chi̍t-thé. 18 Lín tio̍h siám-phiah îm-loān. Lâng bô-lūn hoān sím-mi̍h chōe lóng bē éng-hióng ka-kī ê seng-khu, m̄-koh hoān kan-îm ê sī hoān-chōe kah hāi-tio̍h ka-kī ê seng-khu. 19 Lín kám m̄-chai lín ê seng-khu chiū-sī Sèng-Sîn ê tiān? Sèng-Sîn tiàm-tī lín lāi-bīn chiū-sī lín tùi Siōng-Chú só͘ niá-siū ê, koh-chài kóng, lín m̄-sī sio̍k ka-kī, sī sio̍k Siōng-Chú. 20 In-ūi lín sī I hù-chhut tāi-kè bé lâi-.ê, só͘-í tio̍h ēng lín ê seng-khu lâi êng-kng Siōng-Chú.