《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十一章

作者 巴克禮普世版小組 2014.11.23

1 Siōng-Chú Liân-bín Í-sek-lia̍t Bîn-cho̍k Án-ne góa beh mn̄g lín, Siōng-Chú kám ū khì-sak I ê chú-bîn? Choa̍t-tùi bô, in-ūi góa mā sī Í-sek-lia̍t-lâng, sī A-pek-la̍h-hán ê kiáⁿ-sun, sio̍k Piān-ngá-bín chi-cho̍k. 2 Siōng-Chú m̄-bat pàng-sak I chá to̍h kéng-soán ê chú-bîn. Lín kám m̄-chai Sèng-keng ū kì-chài koan-hē Í-lī-a tùi Siōng-Chú khòng-kò Í-sek-lia̍t-lâng ê tāi-chì? 3 I kóng,“Chú ah, in thâi-sí Lí ê sian-ti, thiah-húi Lí ê chè-tôaⁿ, chí-ū chhun góa tī-teh, in mā teh siàu-siūⁿ góa ê sèⁿ-miā.”( chù: LOS 19:10, 14) 4 M̄-koh Siōng-Chú án-chóaⁿ ìn-tap? I án-ne kóng,“Góa ū ūi-tio̍h ka-kī lâu chhit-chheng-ê m̄-bat kūi-pài Pa-le̍k ê lâng."( chù: LOS 19:18) 5 Chit-má mā-sī án-ne, Siōng-Chú ū lâu ēng un-tián kéng-soán ê chi̍t-kóa lâng. 6 Kì-jiân sī Siōng-Chú ê un-tián, chiū m̄-sī chiàu lâng ê hêng-ûi. Un-tián nā-sī chiàu lâng ê hêng-ûi, hit-ê un-tián chiū m̄-sī un-tián. 7 Án-ne kiat-kio̍k án-chóaⁿ? Í-sek-lia̍t-lâng bô tit-tio̍h in teh tui-kiû ê, chí-ū Siōng-Chú kéng-soán ê chi̍t-kóa lâng ū tit-tio̍h, kî-tha ê lâng sim ngē m̄-thiaⁿ. 8 Chiàu Sèng-keng só͘ kì-chài:“ Siōng-Chú hō͘ in ê sim-lêng bâ-pì, ba̍k-chiu khòaⁿ bē kìⁿ, hīⁿ-khang thiaⁿ bē tio̍h, ti̍t-kàu kin-á-ji̍t.”( chù: SBK 29:4; ISA 29:10) 9 Tāi-pi̍t kóng,“Tio̍h hō͘ in ê iàn-hōe piàn-chiâⁿ in ê hām-kheⁿ, lô-bāng, hō͘ in poa̍h-tó lâi chò in ê pò-èng. 10 Tio̍h hō͘ in ê ba̍k-chiu hoe, bē-tàng khòaⁿ-kìⁿ. Tio̍h hō͘ in ê kha-chiah-phiaⁿ éng-oán khiau-ku.”( chù: SPh 69:22-23) 11 Án-ne góa beh mn̄g, ”Í-sek-lia̍t lâng poa̍h-tó, kám lóng peh bē khí-lâi?” Choa̍t-tùi ē!, in-ūi in ê hoān-chōe, chín-kiù soah lîm-kàu Gōa-pang-lâng, tian-tò ē kek-khí in ê chi̍t-tò͘. 12 Kì-jiân Í-sek-lia̍t-lâng ê hoān-chōe ē hō͘ sè-kan-lâng tit-tio̍h hong-sēng ê chiok-hok, in ê sit-lo̍h ē hō͘ Gōa-pang-lâng tit-tio̍h hù-chiok. nā-sī só͘-ū ê Í-sek-lia̍t lâng lóng kui-hiòng Siōng-Chú, hit-ê chiok-hok kám m̄-sī koh-khah tōa!

Siōng-Chú Chín-kiù Gōa-pang-lâng
13 Góa sī tùi lín Gōa-pang-lâng kóng, in-ūi góa sī Gōa-pang-lâng ê sù-tô͘, tùi góa ê soan-kàu chit-hūn kám-kak chin kong-êng. 14 Khòaⁿ án-ne ē kek-khí góa ê tông-pau ê chi̍t-tò͘, thang kiù in tiong-kan ê chi̍t-kóa lâng. 15 Í-sek-lia̍t-lâng siū khì-sak nā ē hō͘ sè-kan-lâng kah Siōng-Chú hô-hó, in koh siū chiap-la̍p, kám m̄-sī chhin-chhiūⁿ tùi sí koh-oa̍h? 16 Thâu-chi̍t-tè mī-hún-chhè nā sèng-pia̍t hiàn hō͘ Siōng-Chú, kui-sn̂g mā lóng ē sèng-kiat. Chhiū-kin nā sèng-pia̍t hiàn hō͘ Siōng-Chú, liân chhiū-ki mā ē sèng-kiat. 17 Lín sui-jiân sī iá-seng ê kan-ná-chhiū ê chhiū-ki, nā chiap-ki tī siū chai-pôe ê kan-ná-chhiū, lâi tāi-thè chi̍t-kóa at-tn̄g ê, chiū tùi kāng hit-châng chhiū-kin hun-hióng hong-hù ê êng-ióng-hun. 18 Só͘-í lín m̄-thang tùi hiah-ê at-tn̄g ê chhiū-ki khoa-kháu, siūⁿ kóng lín pí in khah-hó. Lín nā beh khoa-kháu, tio̍h ē kì-tit, sī lín óa-khò chhiū-kin teh oa̍h, m̄-sī chhiū-kin óa-khò lín teh oa̍h. 19 Lí kiám-chhái ē kóng,“Chhiū-ki chián khí-lâi sī ūi-tio̍h beh hō͘ góa ē-tàng chiap lo̍h-khì.” 20 Bô-m̄-tio̍h, in-ūi in m̄-sìn chiah hō͘ lâng chián khí-lâi, lín sī in-ūi ū sìn chiah khiā ē-tiâu, m̄-koh lín m̄-thang kiau-ngō͘, tian-tò tio̍h kiaⁿ-hiâⁿ. 21 In-ūi Siōng-Chú nā bô kā chū-jiân seⁿ chhut-lâi ê chhiū-ki lâu lo̍h-lâi, khó-lêng mā bô it-tēng ē kā lín lâu lo̍h-lâi. 22 Án-ne lán tio̍h chai Siōng-Chú sī chû-ài koh giâm-keh, tùi tūi-lo̍h ê lâng chin giâm-keh, m̄-koh lín nā kè-sio̍k óa-khò I ê chû-ài, I chiū ē tùi lín chû-ài. Nā bô, I mā ē kā lín chián khí-lâi. 23 Hiah-ê siū chián ê Í-sek-lia̍t-lâng nā bô-koh kò͘-chip m̄-sìn, mā ē koh chiap tò-tńg-khì goân-lâi hit-châng chhiū, in-ūi Siōng-Chú ū koân-lêng kā in chiap tò-tńg-khì. 24 Lín chiah-ê tùi iá-seng kan-ná-chhiū chián khí-lâi ê chhiū-ki, to ē-tàng chiap tī bô kāng pún-sèng siū chai-pôe ê kan-ná chhiū, hô-hòng sī hiah-ê goân-lâi ê chhiū-ki kám bē koh-khah hó chiap tò-tńg-khì?

Siōng-Chú Liân-bín Choân Jîn-lūi
25 Hiaⁿ-tī chí-mōe ah, góa ài lín chai chit-ê ò-biāu, bián-tit lín ka-kī lia̍h-chò tì-hūi. Chi̍t-pō͘-hūn ê Í-sek-lia̍t-lâng chiām-sî ngē-sim, thèng-hāu kàu Gōa-pang-lâng choân-pō͘ kui Chú ûi-chí. 26 Án-ne só͘-ū ê Í-sek-lia̍t-lâng lóng ē tit-kiù. Chiàu Sèng-keng kì-chài, "Chín-kiù-chiá ē tùi Sûn-siâⁿ chhut-lâi, kā Ngá-kok ê put-gī tû-khì. 27 Hit-sî Góa ē sià-bián in ê chōe, che sī Góa kah in só͘ li̍p ê iok.”( chù: ISA 59:20-21; 27:9; ILB 31:33-34) 28 Tùi hok-im ê koan-tiám lâi khòaⁿ, in-ūi lín ū chiap-siū in khiok kū-choa̍t, in soah piàn-chò Siōng-Chú ê tùi-te̍k, m̄-koh tùi siū kéng-soán ê koan-tiám lâi khòaⁿ, in-ūi Siōng-Chú tài-liām tùi in ê chó͘-sian ê èng-ín, in chiâⁿ-chò Siōng-Chú só͘ thiàⁿ ê lâng. 29 In-ūi Siōng-Chú ê un-sù kah kéng-soán bē kái-piàn. 30 Lín Gōa-pang-lâng kòe-khì bô sūn-ho̍k Siōng-Chú, m̄-koh chit-má khiok in-ūi Í-sek-lia̍t-lâng bô sūn-ho̍k, lín chiah tit-tio̍h liân-bín. 31 Chhin-chhiūⁿ án-ne, in-ūi lín ū tit-tio̍h liân-bín, in chit-má bô sūn-ho̍k Siōng-Chú sī hō͘ in mā tit-tio̍h liân-bín. 32 Siōng-Chú pàng só͘-ū ê lâng lóng tī bô sūn-ho̍k ê chōng-thāi, sī ūi-tio̍h beh liân-bín só͘-ū ê lâng. 33 Kui Êng-kng Hō͘ Siōng-Chú Siōng-Chú ê tì-hūi hui-siông chhim-tîm, tì-sek hui-siông hong-hù! I ê phòaⁿ-toàn oh-tit chhui-chhek, I ê tō-lō͘ oh-tit chhōe-tio̍h! 34 Siáⁿ-lâng chai Chú ê sim-ì? Siáⁿ-lâng ē-tàng thè I chhut chú-ì?( chù: ISA 43:13) 35 Siáⁿ-lâng bat sàng lé-mi̍h hō͘ Siōng-Chú lâi tit-tio̍h pò-tap?( chù: IPK 41:11) 36 In-ūi bān-bu̍t lóng sī tùi I hia lâi, óa-khò I, ūi-tio̍h I lâi oa̍h. Goān I tit-tio̍h êng-kng ti̍t-kàu éng-oán. Amen.