《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十三章

作者 巴克禮普世版小組 2014.08.03

Pó-lô chù-ba̍k khòaⁿ gī-hōe, kóng, "Hiaⁿ-tī chí-mōe ah, góa pêng-sî tī Siōng-Chú ê bīn-chêng oân-choân chiàu chheng-pe̍k ê liông-sim, ti̍t-kàu kin-á-ji̍t. 2 Chè-si-tiúⁿ A-ná-nî-a bēng-lēng sin-piⁿ teh khiā ê lâng siàn i ê chhùi-phóe. 3 Pó-lô chiū tùi i kóng, "Lí chit-ê chhat kah pe̍h-siak-siak ê chhiûⁿ ah, Siōng-Chú ē kā lí phah. Lí khui-têng tio̍h chiàu lu̍t-hoat lâi kā góa sím-phòaⁿ, kèng-jiân ûi-pōe lu̍t-hoat bēng-lēng lâng kā góa phah?" 4 Khiā tī Pó-lô sin-piⁿ ê lâng kóng, "Lí káⁿ mē Siōng-Chú ê chè-si-tiúⁿ?" 5 Pó-lô kóng, "Hiaⁿ-tī chí-mōe ah, góa m̄-bat i sī chè-si-tiúⁿ, in-ūi Sèng-keng ū kì-chài: M̄-thang mē tī-lí jîn-bîn ê tiúⁿ-koaⁿ."( chù: CAK 22:28) 6 M̄-koh Pó-lô chai-iáⁿ in chi̍t pêng sī Sat-to͘-kai-phài ê lâng, chi̍t pêng sī Hoat-lī-sài-phài ê lâng, chiū tī gī-hōe tiong tōa-siaⁿ hoah: "Hiaⁿ-tī chí-mōe ah, góa sī Hoat-lī-sài-phài ê lâng, mā sī Hoat-lī-sài-phài ê lâng ê kiáⁿ. Góa tī chia siū sím-phòaⁿ chiū-sī ǹg-bāng sí-lâng ê koh-oa̍h!" 7 Pó-lô án-ne kóng soah, Hoat-lī-sài-phài ê lâng kah Sat-to͘-kai-phài ê lâng chiū khí cheng-lūn, gī-hōe mā hun-lia̍t. 8 In-ūi Sat-to͘-kai-phài ê lâng kóng bô koh-oa̍h, mā bô thiⁿ-sài, mā bô lêng-hûn, m̄-koh Hoat-lī-sài-phài ê lâng chú-tiuⁿ chit saⁿ hāng lóng ū. 9 Soan-jióng ê siaⁿ ná lâi ná tōa. Hoat-lī-sài-phài hit pêng ê keng-ha̍k kàu-su kúi-nā-ê khí-lâi cheng-piān kóng, "Goán khòaⁿ chit-ê lâng lóng bô chò pháiⁿ. Kám kóng chin-chiàⁿ ū Sèng-Sîn á-sī thiⁿ-sài tùi i kóng-ōe?" 10 Cheng-lūn ná lâi ná ke̍k-lia̍t. Iâⁿ-tiúⁿ kiaⁿ Pó-lô khì hō͘ in thiah-chhùi, bēng-lēng peng-á lo̍h-khì tùi in tiong-kan kā Pó-lô chhiúⁿ chhut-lâi, kā i chhōa ji̍p-khì iâⁿ-pâng. 11 Hit mê Chú khiā tī Pó-lô ê sin-piⁿ, kóng, "Tio̍h ióng-kám! lí bat tī Iâ-lō͘-sat-léng ūi góa chò kiàn-chèng, mā it-tēng tio̍h tī Lô-má ūi góa chò kiàn-chèng."

Sat-hāi Pó-lô ê Im-bô͘
12 Keh-tńg chá-khí, Iû-thài-lâng kiat-tóng chiù-chōa, kóng, "Nā bô thâi-sí Pó-lô, m̄ chia̍h m̄ lim." 13 Chò-hóe án-ne kè-bô͘ ê lâng ū sì-cha̍p-ê í-siōng. 14 In khì kìⁿ chè-si-tiúⁿ kah tiúⁿ-ló, kóng, "Goán í-keng chiù tāng chōa, nā bô thâi-sí Pó-lô, pòaⁿ-hāng mi̍h to m̄ chia̍h. 15 Taⁿ lín kah gī-hōe tio̍h kā iâⁿ-tiúⁿ iau-kiû, chhiáⁿ i chhōa Pó-lô lâi lín ê bīn-chêng, ké-chò lín beh koh siông-sè cha-mn̄g i ê àn-chêng. Goán chún-pī hó à, tī i kàu chia ê sî kā i thâi sí." 16 Pó-lô ê gōe-seng thiaⁿ-tio̍h chit-ê bâi-ho̍k ê im-bô͘, chiū ji̍p-khì iâⁿ kā Pó-lô kóng. 17 Pó-lô kiò chi̍t-ê liân-tiúⁿ lâi, kóng, "Chhiáⁿ chhōa chit-ê siàu-liân-lâng khì kìⁿ iâⁿ-tiúⁿ, in-ūi i ū tāi-chì beh pò i chai." 18 Liân-tiúⁿ chiū chhōa siàu-liân-lâng khì kìⁿ iâⁿ-tiúⁿ, kóng, "Hit-ê siū koaiⁿ ê Pó-lô kiò góa khì, kiû góa chhōa chit-ê siàu-liân-lâng lâi kìⁿ lí. I ū tāi-chì beh kā lí pò-kò." 19 Iâⁿ-tiúⁿ khan i ê chhiú khì piⁿ-á, mn̄g kóng, "Beh pò-kò góa chai sím-mi̍h tāi-chì?" 20 I kóng, "Iû-thài-lâng í-keng kóng hó-sè, ké-chò beh koh siông-sè cha-mn̄g Pó-lô ê àn-chêng, ē kiû lí bîn-á-chài chhōa Pó-lô khì gī-hōe. 21 Kiû lí m̄-thang thiaⁿ in ê ōe, in-ūi in ū sì-cha̍p gōa lâng bâi-ho̍k teh tán i. In bat chiù-chōa kóng, Nā bô thâi-sí Pó-lô, m̄ lim m̄ chia̍h. Taⁿ in lóng chún-pī hó-sè, teh thèng-hāu lí ê ín-chún." 22 Iâⁿ-tiúⁿ kah siàu-liân-lâng khì, hoan-hù i kóng, "M̄-thang tùi lâng kóng lí ū chiong chiah-ê tāi-chì thong-ti góa."

Hō͘-sàng Pó-lô Khì Hō͘ Hui-le̍k-su Chóng-tok
23 Iâⁿ-tiúⁿ hoan-hù nn̄g-ê liân-tiúⁿ, kóng, "Eng-àm káu-tiám í-chêng tio̍h chún-pī pō͘-peng nn̄g pah, bé-peng chhit-cha̍p, gia̍h chhiuⁿ ê peng nn̄g pah, chhut-hoat khì Kai-sat-lī-a. 24 Koh chún-pī bé hō͘ Pó-lô khiâ, hō͘-sàng i an-choân khì kàu chóng-tok Hui-le̍k-su hia." 25 Iâⁿ-tiúⁿ chiū siá chi̍t-tiuⁿ phoe án-ne: 26 Kek-ló-tiu Lū-se-a kā chóng-tok Hui-le̍k-su tāi-jîn chhéng-an. 27 Chit-ê lâng hō͘ Iû-thài-lâng lia̍h khì beh kā i thâi sí ê sî, góa chi̍t-ē chai i sī Lô-má kong-bîn, chiū tòa peng khì kā i kiù. 28 Góa siūⁿ-beh bêng-pe̍k in kò i ê lí-iû, chiū sàng i khì in ê gī-hōe. 29 Góa chhâ-chhut i hō͘ lâng kò sī ūi-tio̍h in ê lu̍t-hoat piān-lūn, pēng-bô hoān-tio̍h kai-sí á-sī kā i koaiⁿ-kaⁿ ê chōe. 30 Āu-lâi ū-lâng kā góa pò-kò kóng Iû-thài-lâng teh kè-bô͘ hām-hāi chit-ê lâng. Góa sûi-sî kā i sàng khì lí hia, mā bēng-lēng kò i ê lâng mā tio̍h tī lí ê bīn-chêng kā i khòng-kò." 31 Pō͘-peng chip-hêng bēng-lēng, chiong Pó-lô thàu-mê tòa khì kau hō͘ An-thê-phàⁿ-tí. 32 Keh-tńg-ji̍t, pō͘-peng tńg-khì iâⁿ-pâng, hō͘ bé-peng kè-sio̍k hō͘-sàng Pó-lô. 33 In lâi-kàu Kai-sat-lī-a, chiū chiong hit-tiuⁿ phoe kau hō͘ chóng-tok, mā chiong Pó-lô kau hō͘ i. 34 Chóng-tok tha̍k hit-tiuⁿ phoe liáu-āu, mn̄g Pó-lô sī tó-chi̍t séng ê lâng, chai-iáⁿ i sī Ki-lī-ka-séng ê lâng. 35 Chiū kóng, "Tán kò lí ê lâng kàu-ūi, góa ē siông-sè chhù-lí lí ê àn-kiāⁿ. Chóng-tok chiū hoan-hù kā Pó-lô khu-liû tī Hi-lu̍t ê gê-mn̂g.