《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第五章

作者 巴克禮普世版小組 2014.03.30

A-ná-nî-a kah Sat-hui-lat
1 Ū chi̍t-ê lâng miâ-kiò A-ná-nî-a, kah i ê bó͘ Sat-hui-lat bē in ê sán-gia̍p. 2 In ang-á-bó͘ chham-siông liáu-āu koat-tēng chiong só͘ tit-tio̍h ê chîⁿ lâu chi̍t-kóa khí-lâi, chhun-ê chiah tòa lâi kau hō͘ sù-tô͘. 3 Pí-tek kóng, "A-ná-nî-a, lí án-chóaⁿ hō͘ Sat-tàn chhiong-móa lí ê sim lâi khi-phiàn Sèng-Sîn, chiong bē hn̂g ê chîⁿ thau-thau-á lâu chi̍t-pō͘-hūn khí-lâi? 4 Chhân-hn̂g iáu-bōe bē sī lí-.ê? bē liáu só͘ tit-tio̍h ê chîⁿ lí ū koân thang chhú-lí. Lí ná-ē chò chit-khoán tāi-chì ? Lí m̄-sī khi-phiàn lâng, sī khi-phiàn Siōng-Chú!" 5 A-ná-nî-a thiaⁿ-tio̍h chiah-ê ōe, chiū lek lo̍h-khì soah tn̄g-khùi. Thiaⁿ-tio̍h ê lâng lóng tōa tio̍h-kiaⁿ. 6 Ū-kóa siàu-liân-lâng lâi kā i ê sin-si pau khí-lâi, kng chhut-khì bâi-chòng. 7 Chha-put-to kòe saⁿ-tiám-cheng kú, i ê bó͘ mā ji̍p-lâi, iáu m̄-chai só͘ hoat-seng ê tāi-chì. 8 Pí-tek mn̄g i kóng, "Lí kā góa kóng, lín bē chhân-hn̂g só͘ tit-tio̍h ê chîⁿ kan-taⁿ chiah-ê sī-bô?" I ìn-kóng, "Tio̍h, sī chiah-ê niā-niā." 9 Pí-tek tùi i kóng, "Lín ná-ē tâng-sim lâi chhì-thàm Chú ê Sèng-Sîn? Lí khòaⁿ, bâi-chòng lín tiōng-hu ê lâng í-keng tńg-lâi-kàu mn̂g-kháu, mā beh kā lí kng chhut-khì." 10 Sat-hui-lat sûi-sî lek lo̍h-khì tī Pí-tek ê kha-chêng chiū tn̄g khùi. Hiah-ê siàu-liân-lâng ji̍p-lâi, khòaⁿ-tio̍h i í-keng sí, chiū kā i kng chhut-khì, bâi-chòng tī in tiōng-hu ê sin-piⁿ. 11 Choân kàu-hōe kah thiaⁿ-tio̍h chiah-ê tāi-chì ê lâng lóng tōa tio̍h-kiaⁿ.

Sîn-jiah Kî-sū
12 Sù-tô͘ tī bîn-kan ū kiâⁿ chin-chē sîn-jiah kah kî-sū, sìn-tô͘ lóng tâng-sim ha̍p-ì tī Só͘-lô-bûn ê cháu-lông chū-hōe. 13 Chèng-lâng lóng chin chun-tiōng chiah-ê sù-tô͘, m̄-koh bô-lâng káⁿ kah in chiap-kīn. 14 Sìn Chú ê lâng ná lâi ná ke-thiⁿ, lâm-ê lí-ê lóng chin-chē. 15 Sīm-chì ū-lâng kā pēⁿ-lâng khǹg tī chhn̂g-pho͘, kng lâi hē tī ke-lō͘ piⁿ, ǹg-bāng Pí-tek keng-kòe ê sî, ū kúi-ê-á lâng thang hō͘ i ê iáⁿ ìm-tio̍h. 16 Koh ū chin-chē lâng tùi Iâ-lō͘-sat-léng sì-ûi ê siâⁿ chhōa pēⁿ-lâng kah hō͘ siâ-sîn khó͘-chhó͘ ê lâng lâi Pí-tek hia.In lóng ū tit-tio̍h i-hó.

Sù-tô͘ Siū Pek-hāi
17 Chè-si-tiúⁿ í-ki̍p kah in kāng-tóng ê lâng, chiū-sī Sat-thó͘-kai-tóng, lóng hui-siông oàn-tò͘ chiah-ê sù-tô͘, 18 In chiū hē-chhiú lia̍h sù-tô͘, kā in koaiⁿ lo̍h-kaⁿ. 19 M̄-koh hit àm Chú ê thiⁿ-sài phah-khui kaⁿ-mn̂g, kā in chhōa chhut-lâi, tùi in kóng, 20 "Lín tio̍h khì khiā tī sèng-tiān, chiong chit-ê sù Oa̍h-miā ê sìn-sit lóng tùi jîn-bîn soan-kóng." 21 Sù-tô͘ thiaⁿ thiⁿ-sài ê ōe, thiⁿ phú-kng chiū ji̍p-khì sèng-tiān kà-sī lâng. Chè-si-tiúⁿ kah kâng-tóng ê lâng lâi kàu-ūi, chio-chi̍p gī-hōe kah Í-sek-lia̍t jîn-bîn ê thâu-lâng, chhe lâng khì kaⁿ-ni̍h tòa sù-tô͘ lâi. 22 Kéng-ōe kàu-ūi, tī kaⁿ-ni̍h chhōe bô sù-tô͘, chiū tńg-lâi pò-kò, kóng, 23 "Goán khòaⁿ-tio̍h kaⁿ-mn̂g koaiⁿ kah chin tiâu, kò͘-siú ê lâng khiā tī mn̂g-kháu. Kaⁿ-mn̂g khui ê sî, lāi-bīn chhōe bô-lâng." 24 Sèng-tiān ê siú-ōe-tiúⁿ kah chè-si-tiúⁿ thiaⁿ-tio̍h chiah-ê ōe, m̄-chai chit-ê tāi-chì ē án-chóaⁿ ián-piàn chiū chin tio̍h-kip. 25 Hit sî, ū chi̍t-ê lâng lâi pò-kò kóng, "Lín kā in koaiⁿ tī kaⁿ-ni̍h ê lâng chit-má khiā tī sèng-tiān teh kà-sī lâng." 26 Hit-ê siú-ōe-tiúⁿ kah kéng-ōe chiū khì kā sù-tô͘ chhōa lâi, m̄-káⁿ ēng kiông-le̍k, in-ūi kiaⁿ jîn-bîn ēng chio̍h-thâu kā in tìm. 27 Chhōa sù-tô͘ ji̍p-lâi chiū hō͘ in khiā tī gī-hōe ê bīn-chêng. Chè-si-tiúⁿ mn̄g in, kóng, 28 " Goán bat giâm-giâm kìm-chí lín m̄-thang hōng chit-ê miâ kà-sī lâng, lín hoán-tńg chiong lín ê kà-sī thoân-kàu Iâ-lō͘-sat-léng ê ta̍k só͘-chāi, siūⁿ-beh chiong lâu chit-ê lâng ê hoeh ê chek-jīm kui hō͘ goán." 29 Pí-tek kah kî-tha ê sù-tô͘ ìn-kóng, "Goán tio̍h sūn-ho̍k Siōng-Chú, m̄-sī sūn-ho̍k lâng. 30 Lín kā I tèng tī si̍p-jī-kè-téng ê Iâ-so͘, lán chó͘-sian ê Siōng-Chú í-keng hō͘ I koh-oa̍h. 31 Chit-ê Iâ-so͘, Siōng-Chú kā I thê-seng tòa ka-kī ê chiàⁿ-pêng, hō͘ I chò Kun-ông, chò Kiù-Chú, thang hō͘ Í-sek-lia̍t-lâng hóe-kái, chōe tit-tio̍h sià-bián. 32 Goán sī chiah-ê tāi-chì ê kiàn-chèng-jîn. Siōng-Chú siúⁿ-sù hō͘ sūn-ho̍k I ê lâng ê Sèng-Sîn mā ūi-tio̍h chit-ê tāi-chì chò chèng-jîn." 33 Gī-hōe ê lâng thiaⁿ-liáu hui-siông siū-khì, ài beh kā in hāi-sí. 34 M̄-koh in tiong-kan ū chi̍t-ê Hoat-lī-sài-phài ê lâng, miâ-kiò Ka-má-lia̍t, sī chèng-lâng chun-kèng ê lu̍t-hoat kàu-su. I tī gī-hōe tiong khiā khí-lâi, hoan-hù hō͘ sù-tô͘ chiām-sî chhut-khì. 35 Chiū tùi tāi-chiòng kóng, "Í-sek-lia̍t-lâng ah, lín beh pān chiah-ê lâng tio̍h chin kín-sīn! 36 Í-chêng ū chi̍t-ê kiò-chò Tiu-tāi ê lâng chhut-thâu, ka-kī khoa-kháu chin úi-tāi, chha-put-to ū sì-pah lâng kin-tòe i. Āu-lâi i hō͘ lâng thâi-sí, kin-tòe ê lâng sì-sòaⁿ, i ê kè-bô͘ chiū-án-ne lóng lo̍k-khong. 37 Āu-lâi tī teng-kì hō͘-kháu ê sî koh ū Ka-lī-lī-séng ê Iû-tāi chhut-thâu, ín-iú jîn-bîn kin-tòe i, i mā hō͘ lâng thâi-sí, kin-tòe ê lâng lóng sì-sòaⁿ. 38 Taⁿ góa kā lín kóng, m̄-thang chhap chiah-ê lâng, chhut-chāi in khì, in-ūi in só͘ kè-bô͘ kah só͘ chò nā chhut-tī lâng, it-tēng ē sit-pāi. 39 Nā chhut-tī Siōng-Chú, lín chiū bē-tàng kā in siau-bia̍t, koh khióng-kiaⁿ lín soah kah Siōng-Chú chò tùi-thâu." Gī-hōe chiap-la̍p i ê ì-kiàn. 40 In tiàu sù-tô͘ lâi, kā in piⁿ-phah, bēng-lēng in m̄-thang koh hōng Iâ-so͘ ê miâ lâi kóng tō-lí. Jiân-āu pàng in chhut-khì. 41 Sù-tô͘ lī-khui gī-hōe, móa-sim hoaⁿ-hí, sī in-ūi in hō͘ lâng khòaⁿ-chò ē-kham-tit ūi-tio̍h Chú ê Miâ siū lêng-jio̍k. 42 In chiū ta̍k-ji̍t tī sèng-tiān, tī jîn-ke, kà-sī lâng, thoân Iâ-so͘ Ki-tok ê hok-im.