《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第三章

作者 巴克禮普世版小組 2014.03.16

I-hó Pái-kha ê Lâng
1 Ū chi̍t-ji̍t ē-po͘ saⁿ-tiám chiū-sī kî-tó ê sî, Pí-tek kah Iok-hān chiūⁿ sèng-tiān. 2 Ū chi̍t-ê lâng, tùi chhut-sì chiū nńg-kha, ta̍k-ji̍t hō͘ lâng kng lâi hē tī sèng-tiān ê mn̂g, chiū-sī hit-ê kiò-chò "Súi-mn̂g", tī hia beh hiòng ji̍p-tiān ê lâng kiû-khit. 3 I chi̍t-ē khòaⁿ-tio̍h Pí-tek kah Iok-hān teh-beh ji̍p sèng-tiān, chiū hiòng in kiû-khit. 4 Pí-tek kah Iok-hān kā i chù-ba̍k khòaⁿ, kóng, "Khòaⁿ goán." 5 I chiū ba̍k-chiu kim-kim kā in khòaⁿ, ǹg-bāng tùi in ē-tàng tit-tio̍h sím-mi̍h. 6 M̄-koh Pí-tek kóng, "Kim kah gîn góa lóng bô, kan-taⁿ ē-tàng chiong góa só͘ ū ê hō͘ lí. Hōng Ná-sat-le̍k Iâ-so͘ Ki-tok ê miâ, bēng-lēng lí khí-lâi kiâⁿ." 7 Pí-tek chiū khan i ê chiàⁿ-chhiú hō͘ i khí-lâi, i ê kha kah kha-ba̍k sûi-sî ióng-kiāⁿ khí-lâi. 8 I chiū thiàu khiā khí-lâi-teh, koh kiâⁿ, kah in chò-hóe ji̍p-khì sèng-tiān, ná kiâⁿ ná thiàu, ná o-ló Siōng-Chú. 9 Chèng-lâng khòaⁿ-tio̍h i iân-lō͘ kiâⁿ iân-lō͘ o-ló Siōng-Chú, 10 koh jīn-chhut i sī pêng-sî chē tī sèng-tiān ê Súi-mn̂g teh kiû-khit hit-ê lâng, chiū tùi i sin-chiūⁿ só͘ tú-tio̍h ê tāi-chì kám-kak tio̍h-kiaⁿ koh kî-koài.

Pí-tek tī sèng-tiān Thoân-káng Sìn-sit
11 Tī Só͘-lô-bûn ê cháu-lông, hit-ê tit-tio̍h i-hó ê lâng kā Pí-tek kah Iok-hān ê chhiú khiú tiâu-tiâu, chèng-lâng tōa kî-koài, lóng cháu óa-lâi khòaⁿ. 12 Pí-tek khòaⁿ-kìⁿ án-ne chiū tùi hiah-ê lâng kóng, "Í-sek-lia̍t-lâng ah, lín sī án-chóaⁿ tùi chit-ê tāi-chì kám-kak kî-koài? ná-ē ba̍k-chiu kim-kim lia̍h goán khòaⁿ? Lín siūⁿ-kóng goán sī khò ka-kī ê châi-lêng á-sī kèng-khiân, hō͘ chit-ê lâng khí-lâi kiâⁿ? 13 A-pek-la̍h-hán, Í-sat, Ngá-kok ê Siōng-Chú, chiū-sī lán chó͘-sian ê Siōng-Chú, í-keng hō͘ I ê Lô͘-po̍k Iâ-so͘ tit-tio̍h êng-iāu. Lín kā chit-ê Iâ-so͘ kau hō͘ koaⁿ-hú, sui-jiân Pí-lia̍p-to koat-tēng beh pàng I, lín koh tong-tiûⁿ kī-choa̍t. 14 Lín kī-choa̍t hit-ê Sîn-sèng koh Kong-gī ê Iâ-so͘, tian-tò kiû Pí-lia̍p-to pàng chi̍t-ê sat-jîn-hoān hō͘ lín. 15 Lín hāi-sí oa̍h-miā ê kin-goân, chiū-sī Siōng-Chú tùi sí-lâng tiong hō͘ I koh-oa̍h Hit-ūi. Goán sī chit-hāng tāi-chì ê kiàn-chèng-jîn. 16 Lín só͘ khòaⁿ-kìⁿ, lín só͘ bat chit-ê pái-kha-.ê, tùi sìn-khò Iâ-so͘ ê miâ lâi tit-tio̍h khùi-la̍t, i in-ūi sìn-khò Iâ-so͘ ê miâ chiū oân-choân hó khí-lâi, lín tāi-ke lóng ū khòaⁿ-tio̍h chit-hāng tāi-chì." 17 Hiaⁿ-tī chí-mōe ah, taⁿ góa chai lín kah koaⁿ-hú án-ne chò sī in-ūi m̄-chai pòaⁿ-hāng. 18 Siōng-Chú ū thong-kòe chèng sian-ti ê chhùi ī-giân: I ê Ki-tok tio̍h siū-lān ê tāi-chì kó-jiân èng-giām ā. 19 Só͘-í lín tio̍h hóe-kái lâi kui-hiòng Siōng-Chú, thang hō͘ lín ê chōe tit-tio̍h chhat-siau. 20 Án-ne Siōng-Chú ē sù lín sin ê ji̍t-chí, koh chhe-khián chá to̍h soán-tēng ê Ki-tok Iâ-so͘ lâi-kàu lín tiong-kan. 21 Chiàu Siōng-Chú thong-kòe kó͘-chá sèng sian-ti ê chhùi só͘ soan-pò͘ ê, I it-tēng tio̍h tiàm tī thiⁿ-téng, ti̍t-kàu bān-bu̍t keng-sin ê sî-kî. 22 Mô͘-se bat kóng: Chú, lín ê Siōng-Chú ē tī lín tông-pau ê tiong-kan kā lín siat-li̍p chi̍t-ê chhiūⁿ góa chit-khoán ê sian-ti, I kā lín kóng ê ōe, lín lóng tio̍h thiaⁿ. 23 M̄ thiaⁿ chit-ūi sian-ti ê lâng, lóng ē tùi chú-bîn ê tiong-kan kā in siau-bia̍t.'( chù: SBK 18: 15, 19) 24 Tùi Sat-bó-ní í-āu só͘-ū thoân-káng sìn-sit ê sian-ti, lóng ū kóng-khí chiah-ê ji̍t-chí. 25 Lín sī sian-ti ê kiáⁿ-sun, mā ū sêng-chiap Siōng-Chú kah lín chó͘-sian só͘ li̍p ê iok, chiū-sī Siōng-Chú bat kā A-pek-la̍h-hán kóng, 'Thiⁿ-ē bān-cho̍k lóng ē tùi lí ê kiáⁿ-sun tit-tio̍h hok-khì.'( chù: CSK 22:18; 26:4) 26 Siōng-Chú í-keng siat-li̍p I ê Lô͘-po̍k, seng chhe I lâi kā lín sù-hok hō͘ lín, hō͘ lín ta̍k-lâng oa̍t-tńg-sin lī-khui siâ-ok."