《趁iau2日時》

 | | | 轉寄

Hō͘咱同齊來關懷盲人事工─美國盲人事工考察報告

作者 林俊育 2008.05.11

前言
盲人是弱勢中ê弱勢，所以是siōng需要關懷kap鼓勵ê一陣朋友。聖經約翰福音第九章中耶穌講：視障ê m̄是伊或伊ê父母有罪，卻是上帝ài tī伊身上顯明伊ê作為。視障朋友雖然肉眼看bē-tio̍h，心靈ê目睭卻是明亮ê，其它ê潛能koh-khah是豐富，只要咱伸出關懷kap鼓勵ê手，in ê成就bē輸hō͘明眼人，tī某一kóa事工上koh-khah贏一坎，海倫凱勒博士kap雙連教會西羅亞合唱團便是真好ê例。

我深受慕光盲人重建中心創辦人陳五福博士ê精神感召，tī 1988年邀同幾位有志同工tī雙連教會成立跨教會ê「台北市盲朋友聯誼會」，我這chiah真正開始盲人關懷事工。一九九一年koh-khah有機會參加由「THE CARROLL CENTER FOR THE BLIND」舉辦ê國際盲人事工交換活動，有英國、瑞士、澳洲、以色列kap臺灣去ê我共五位。阮除交換教學kap分享盲人事工經驗外，iáu參觀拜訪波士頓、紐約kap紐澤西ê盲人機構，我願kap國人分享心得。


美國ê盲人事工機構簡介
美國ê盲人事工機構kap臺灣仝款大多是財團法人組織，財務預算大部分來自個人遺囑捐款kap企業捐贈，另外一半則由地方政府支付。Tī-chia紹介一kóa我所參觀ê機構供國人參考，希望對有心從事盲人事工ê人有所助益。


1) The Carroll Center For The Blind
770 Centre Street
Newton, MA 02158, U.S.A.
Fax:(617)969-6204

一九三六年Carroll神父創立chit-ê盲人重建中心，二次大戰中目睭受害變盲ê退伍軍人tī-chia接受重建而受益無窮。目前ê事工如下：

(1)國際交換活動：美國人最近認為真chē先進國家ê盲人事工ê設計有值得學習ê所在，tùi án-ne tī 1988年開始舉辦為期八週ê國際教學交換，第一年參加ê有約旦、德國、比利時、瑞士kap西班牙；一九八九年參加ê有英國、瑞士kap丹麥；一九九○年參加ê有日本、芬蘭(二人)kap以色列；一九九二年參加ê有孟加拉、中國、葡萄牙、以色列kap南非；一九九三年參加ê有日本、以色列、迦薩行廊、匈牙利kap肯亞。今年參加ê有阿根廷、新幾內亞、坦薩尼亞、日本kap新加坡。活動結束後，參加者必須提出一份心得報告，由該中心彙集出版並提供國際各盲人機構參考。

(2)重建服務：為期十六週，包括定向kap行動訓練、感應訓練、人際交通、個人事務管理、工作能力診斷kap評估、弱視訓練kap心理協談。

(3)盲用電腦教育kap就業輔導課程：為期二週ê課程hō͘學員對電腦有基本ê瞭解，並教授如何使用電腦來幫助就業，教育kap個人事務管理。

(4)弱視者ê就業輔導：透過弱視重建專家評估其視力減弱對工作ê影響，並訓練伊siōng有效力地使用伊所chhun ê視力。

(5)戶外活動節目：tī夏令營或春令營中，透過義工ê協助舉辦登山、滑雪、溜冰、划船、協力車、帆船、健行kap西洋劍等活動。


2) Perkins School For The Blind
175 North Beacon Street
Watertown, MA 02172, U.S.A.
Fax:(617)926-2027
這是海倫凱勒ê母校，一八二九年成立，是大眾lóng知世界上siōng有名ê盲校。因近代醫學發達kap孩童ê優良營養保健，盲童jú來jú少。此校則傾向多重障礙ê孩童教育，透過高科技設計出來ê教學方法，稱這學校為「世界之光」實無為過。

校內設有盲人事工研究圖書館，收集世界各國有關盲人事工ê書籍kap雜誌，包羅萬象，應有儘有，尤其是館長 Ken Stuckey 無所m̄知而親切ê服務態度，叫你m̄甘離開。

此校校園佔地三十四英畝，校園內ê課程單元有學前孩童三~六歲，小學孩童七~十二歲，中學生十二~十七歲，嚴重多重障礙班十~二十二歲，盲聾語言及生活技能訓練班五~二十二歲，成年ê盲人、盲聾kap智障者重建班十八歲以上。

另有校外ê社區服務項目，有四個以社區為據點ê養護中心，tùi出生到三歲ê家庭輔導kap協談，為社區ê少年視障者舉辦各種週末活動，舉辦視障事工ê師資訓練，學前視障孩童ê家庭輔導kap協談等。

Chit間世界歷史siōng悠久ê盲校特別關心到國外視障事工ê師資訓練，設有HILTON/PERKINS INTERNATIONAL PROGRAM--GRADUATE RESEARCH GRANTS PROGRAM，亞太地區thang向其tī泰國ê代表申請：MR. KIRK HORTON, FOUNDATION FOR THE BLIND, 420 RAJAVITHI ROAD, BANGKOK 10400, THAILAND.


3) Vision Foundation, Inc.
818 Mt. Auburn Street
Watertown, MA 02172, U.S.A.
TelNo. (617)926-4232
一九七○由一kóa未達法定視障ê弱視婦女們共同成立chit-ê機構，in互相分享弱視方面ê資訊並tī情感上互相支持。tòe年齡ê老化而視力減退成弱視ê人jú來jú chē，chiah-ê人得bē-tio̍h政府機關ê照顧，但是tùi這機構得tio̍h真大ê幫助，chia ê電腦資訊中心ē-tàng提供全美國有關弱視方面ê消息。

這機構mā雇用一kóa專業人員到社區去訪問kap輔導teh-beh成做弱視ê老年人，tī台北啟明學校教十年冊而自費到波士頓學院進修特殊教育ê余月霞老師，mā tī-chia機構從事chit方面ê工作多年，一九九四年起應邀擔任董事。


4) Boston Aid To The Blind
1980 Centre Street
Boston, MA 02132, U.S.A.
TelNo. (617)323-5111
這是麻州唯一專收五十歲以上盲人ê機構，已經有八十年ê歷史，社區ê年老盲人來chia學習日常生活ê技能、唱歌、跳舞、運動、學手工藝、學裁縫、phah高爾夫球。如果你m̄相信盲人phah高爾夫球，請你去看in一年一度ê盲人高爾夫球巡迴賽，你就會瞭解美國社會現在追求ê m̄是男女平等而已，in koh-khah努力tī對殘障人士ê教育平等、就業平等、甚至要求休閒機會平等，這chiah是真正ê文明社會。


5) American Foundation For The Blind
15 West 16th Street
New York, N.Y. 10011, U.S.A.
FaxNo. (212)227-7418
這是美國siōng大ê盲人基金會，對個別盲人kap盲人服務機構提供各種資訊kap服務，mā對世界各國提供服務。其定期出版ê各種有關盲人傑作文章，hō͘世界各國lóng ē-tàng分享。
這機構有一個部門負責評估盲人用品kap器具，真chē有心ê個人或企業團體設計ê產品送來請求hō͘伊評估kap意見。
有聲書籍錄音帶ê一貫作業製作mā是一大特色，美國國會圖書館ê盲用錄音帶書籍就是委託in製作。

6) The Lighthouse, Inc.
111 East 59th Street
New York, N.Y. 10022, U.S.A.
FaxNo. (212)821-9707
一kóa高科技ê研究人員tī-chia埋頭苦幹，努力boeh利用現代科技來幫助盲人獨立生活kap就業，koh-khah設計一kóa科學儀器來幫助解決人類ê視力問題，譬如精密ê電腦驗光、弱視輔助器ê開發kap發展。

7) Designs For Vision, Inc.
760 Koehler Avenue
Ronkonkowa, N.Y. 11779, U.S.A.
FaxNo. (516)585-3404

這是兩代相傳專營研究開發並製造弱視用ê目鏡，hō͘弱視者ē-tàng利用其剩餘ê有限視力來增進生活kap就業能力。美國kap加拿大ê弱視者已普遍受惠，目前chit間公司tú-teh向外國推展業務。根據公司負責人ê計畫，tī各國或地區需要一位眼科醫生代理檢驗kap開立處方訂單，該公司收tio̍h訂單後按其處方配製目鏡，客戶收tio̍h目鏡若bē合適，該公司會負責調製到客戶滿意為止。一九九三年我再度kap盧明松、洪錫銘kap陳文欽參觀該廠後，決定引進此產品來嘉惠台灣ê弱視朋友，慕光盲人重建中心已申請tio̍h內政部補助二百萬元ê驗光設備，完成後thang免費為弱視朋友驗光並代購弱視用目鏡。


建議
台灣跟tòe經濟發達，政府kap民間lóng漸漸注重對殘障人士ê關懷，chit種文明社會ê提升，是大家所樂見ê。Tī-chia謹提出一kóa個人ê意見kap各位分享。

1﹞籌組盲人事工聯誼會：
請內政部出面邀請盲人事工從事者kap學者成立聯誼會，定期聯誼，分享並協調計畫各項事工，定期出版會訊報導各種事工ê現況kap發展計畫。Chiah-ê資訊thang供各有心從事盲人事工ê參考，koh再透過聯誼協調，儘量避免事工ê重複kap不平衡ê發展。台灣ê盲人事工已khah歐美先進國家落後多年，不堪koh再浪費有限ê人力kap財力tī重複ê事工上。

2﹞專業人才ê培訓：
盲人事工需要真chē專業人才，尤其需要吸收先進國家ê專業知識，派人到國外受訓或深造，經費kap語言常是傷腦筋ê大問題。請國外專家來台開班講習，透過翻譯thang解決語言障礙，開班講習則chē人受益，mā khah符合經濟原則。舉辦國際教學交換計畫mā是真好ê辦法，thang利用暑假舉辦盲童夏令營，設計如盲用電腦、音樂、體能訓練等特殊課程，聘請國內教師kap國外專家共同分享教學經驗。

3﹞加強盲人事工ê宣導
請大眾傳播siuⁿ加報導盲人事工，hō͘社會大眾多了解盲人，多關懷盲人，koh-khah接近盲人。前無外久，台北市政府tī中山北路人行道鋪設導盲磚，真chē汽機車停tī導盲磚上，阻礙盲人行路。一直到一九九○年行憲紀念日，雙連教會西羅亞合唱團應市政府之邀到國父紀念館演唱時，黃市長親耳聽tio̍h盲人ê心聲，隨時下令改善。由此可見，宣導是事工成功ê要件之一。

4﹞多kap盲人溝通協商
人常歡喜以家己明眼人ê想法來從事盲人事工，結果常落到食力不討好。盲人ê銀行開戶，選舉ê選票處理，盲人ê福利設施等，請相關單位tī事前多kap盲人團體溝通協商，則thang 皆大歡喜，何樂而無為？

5﹞認同盲人ê能力kap地位
台灣社會對盲人ê歧視iáu真嚴重，尤其tī教育kap就業機會上，咱一直無法度提供公平ê環境，真chē學校m̄收盲生，有收mā限科系。就業環境koh-khah慘，大學歷史系kap音樂系ê畢業生iáu是beh靠傳統ê按摩工作來謀生，hō͘咱同齊來為盲人創造一個平等ê教育kap就業環境。

結語
台灣目前ê經濟狀況ài做好盲人福利是輕而易舉ê事，tāi先政府官員ài有心來策劃推動，民間團體也tio̍h整合起來配合，希望chit篇考察報告kap建議ē-tàng幫助咱ê盲人福利早日jiok-tio̍h歐美等先進國家。

(原作tī 1991年11月，1994年9月改寫)，﹝台灣教會公報 期 kap師大特殊教育季刊﹞