《白話字文獻e5文明觀》

 | | | 轉寄

第三章 《台灣府城教會報中ê現代醫療衛生書寫》(八)

作者 陳慕真 2008.06.22

見習生除了幫贊醫生處理醫院ê醫療事務，亦時常tī禮拜期間陪伴病人議論道理 ，koh ài tòe醫生出外行醫。因為是類似「師徒制」ê關係，有時見習生mā會因為醫生ê情形來受著影響。親像bat tī台南舊樓做金醫生見習生ê顏振聲tī回憶講著，金醫生tī醫生娘破病以後，就辭職、歸國，醫院亦停khùn，致使見習生失業，去林投教小學，等病院開院chiah koh打算。 總是，醫生對見習生醫學知識ê訓練真重視，親像1878年安彼得醫生來府城以後，tō照時間教見習生醫學技術kap知識，其中漢文ê部分由潘範章先生教，林燕臣先生教英譯中文醫書。 Koh親像蘭大衛醫生對見習生教學ê用心，lóng是真具體ê例。見習生ê制度一直維持到日本政府實行醫術法以後，規定見習生必須要經過國家考試，koh著學國文（日文）。因為日本ê制度kap教會原本見習生ê培養制度無kâng，所以ùi戴仁壽醫生以後，就無koh養成新ê見習生，kan-nā將前代ê見習生提高薪資，繼續留tī醫館服務。
另外，有關「見習生」ê消息，mā出現t„教會報ê廣告頁ni̍h。Ùi 1932年5月教會報第566期開始，平均每一期有出現七、八頁份量ê「廣告頁」。其中有關藥品、醫院、診所ê廣告佔真大多數ê比例。Ùi lāi-té ē-tàng發現，廣告頁中ê診所、醫院、藥品kap本地見習生有真密切ê關係。親像廣告「榮安堂大藥房」ê吳純仁醫生就是安彼得醫生t„新樓所訓練ê見習生，「榮安堂」tī教會報所刊登ê藥品廣告有：「開胃健脾丸」、「偉勞補壽汁」、「麥精魚油膏」、「艾羅痔瘡內銷丸」等等，時常佔siông大版面ê廣告。另外，廣告「再生堂醫院」ê高再得醫生、「愛育堂醫院」ê顏振聲醫生，lóng是彰化醫院蘭大衛醫生ê見習生；「得愛醫院」ê蔡得一醫生 是kā「徐賞」 學醫、協助伊藥房ê學生。Chiah-ê早期tī醫館kā外國醫生學習醫學ê見習生後來開業行醫，投入西式醫療ê khang-khòe，亦將 in開業ê消息、藥品ê介紹刊登tī教會報ê廣告頁中。教會報ê廣告頁內容呈現出醫療資訊ê普及，m̄-nā顯示長老教會對醫療衛生ê重視，mā ē-sái觀察出當時台灣人對現代西醫有一定ê需求。
M̄-nā án-ne，當時ê廣告頁mā有透過「白話字」ê廣告詞來呈現。值得注意ê是，lāi-té mā有文學手路ê表現，以及運用文字變化來強調廣告內容ê做法。親像1934年第588卷ê教會報，有一個「Khé-bêng Gán-kho Choan-bûn I-īⁿ」（啟明眼科專門醫院），伊ê廣告詞是：「身軀ê燈，是ba̍k-chiu；bo̍k-chiu若金，通身軀就光」。 廣告頁最後koh註明：「Pë°-sek chê-pī，ji̍p-īⁿ sûi-ì」（病室齊備，入院隨意）。Tī chia，hō͘咱看著廣告詞若親像口語藝術kâng-khoán，將「ba̍k-chiu」比喻做日常生活真重要ê「燈」，透過百姓ê生活經驗來表達「ba̍k-chiu」tī身軀真重要ê觀念，chit khoán充滿文學技巧ê寫法，因為tah近民間，hō͘人真好理解，mā達成「眼科」廣告ê效果。另外，mä有轉化文字單一表現手法ê技巧，像講，1938年8月第641卷ê「得恩堂」所賣ê「補腎丸」，其中一段ê廣告詞是：「Chit hāng io̍h，Hó-chia̍h！Pan-gî！Lī-piān！Bián khiūⁿ！Lâng kā i hō-chó ”Sàn-hiong lâng Pó͘-io̍h！” 這段廣告詞用「大寫」ê字母來表現「補腎丸」ê種種好處，形成視覺頂面ê無kâng變化，有提醒讀者tiõh注意這號「散鄉人寶藥」ê效果！除了「大寫」字母ê表示，mä有用「粗體」ê字型來強調藥品ê廣告。像講「Be̍h-cheng Hî-iû-ko」（麥精魚油膏）」ê其中一段廣告詞：「飛行機標魚油麥膏ê性質溫和，滋味tiⁿ-tiⁿ，不只好chia̍h，iu-koh是魚油中第一好消化快快入血--ê，價錢便宜，食法簡單利便。」 Chit篇廣告詞lāi-té，所有ê「飛行機標魚油賣膏」lóng用「粗體」ê字型來表現，有突顯品牌ê作用，mā加深人看廣告ê印象。
除了文字ê單一文學手路以外，mā有用「圖片」來加強效果，成做另外一種方式ê文字表達。像講「Khai-ūi Kiān-pî-oân」（開胃健脾丸）ê廣告，tī白話字廣告詞頂面，附上人身驅包含肝、胃、脾、腹部ê內部圖，hō͘讀者thang配合文字來了解「開胃健脾丸」醫治ê範圍kap功效。M̄-nā án-ne，當時mā已經有白話字版ê「使用前」、「使用後」 ê廣告比較圖，1937年2月開始出現ê「U2i-lô Po͘-siū-chiap」（偉勞補壽汁）廣告詞寫講：「偉勞補壽汁是囝仔最好ê寶藥。Chit ê藥ê內面有保養身體各種要緊ê成份，不只有大路用。頂面2個Ang-á-圖，就是teh表明偉勞補壽汁ê功效。」廣告頁頂面是兩個囝仔ê圖，一個瘦細，一個hàng奶，分別寫講「Böe食偉勞汁以前ê像」kap「食偉勞汁5禮拜後ê像」。廣告用比較圖片ê方式來證明食「偉勞汁」ê囝仔加真勇健，koh gāu大漢，讀者mā tī看圖kap文字ê過程中感受著趣味ê心適感。