《白話字文獻e5文明觀》

 | | | 轉寄

第三章《台灣府城教會報》中ê現代醫療衛生書寫(二)

作者 陳慕真 2007.08.19

br> Tī 1885年創刊ê《Tâi-oân Hú-siâⁿ Kàu-hōe-pò》（台灣府城教會報），作為台灣基督長老教會ê機關報紙，對各教會ê消息kap相關ê傳道事工lóng有真詳細ê報導。對著屬tī教會醫療事工ê病院報導mā無定期刊載tī報紙ni̍h,hō͘教友kap讀者thang tâng-chê關心。雖然南部教會醫療傳道ê khang-khòe ùi 1865年tō已經開始ah，總是，教會除了醫療事工之外，koh有教育事工kap文字事工。 「教育」ê養成kap「文字」（白話字）ê訓練對初代基督徒教育ê培養有真密切ê關係，mā是初期教會宣教真重視ê部分。所以tī創刊時期，教會報ê內容多數是基督徒ê信仰教育、設立學校ê報導，以及白話字教育ê宣傳。頭一張出現tī《台灣府城教會報》lāi-té,以全文報導有關病院ê文章，是刊載tī 1891年（光緒17年）1月第69張ê<大社ê醫館＞。Chit篇文章ê作者是「盧醫生」，亦tō是1888年來台灣ê盧嘉敏醫生（Dr. Gavin Russell）。1890年，盧醫生tī大社（台中豐原）開設「大社醫館」，koh設病房；大社醫館ê建立mā是台灣早期中部醫療ê開始。Tī<大社ê醫館＞chit篇文章中，盧醫生描寫著當時來大社診療ê病人數量kap就醫ê患者：

新來就醫ê人是2315。In中間有190個tòa tī醫館內。亦有366用thâi-koah kā in táⁿ-tia̍p。有ê來kúi-nā pái。若beh算新ê舊ê,我有看共13847人。Hiah-ê病人khah chē是做穡人，tōa tī hiu-siāⁿ ê;tōa tī城內a-sī街市--ê khah chió。好額 kap sin-khim ê人khah罕得來醫館就醫，éng ài請醫生去in tau kā in看。雖然hiah ê人khah chē是對khah近ê所在來，iáu-kú有ê bat對khah hn̄g ê所在，kúi-nā日路來醫館táⁿ-tia̍p;亦有客人lōa chē。另外，有chē chē人來醫館，m̄是beh請教醫生，不過ài買「Ke-ná-hún」去tá-tia̍p「寒熱症」。

Ùi頂面chit段敘述kap kâng時期ê資料，咱ē-tàng看著早期到中部大社醫館就醫ê病人類型。大部分是sàn-chhiah ê做穡人，或者是ùi遠路來醫館就醫ê患者，文章ni̍h mā有以族群ê分類來講著「客人」亦來就醫ê描述。另外，mā ē-tàng知iáⁿ當時台灣人普遍存在「寒熱症」ê病症，以及利用「Ke-ná-hún」來醫治ê情形。Ùi chit篇出現tī 1891年ê白話字文章所呈現ê內容，hō͘ 咱thang了解現代醫療進入台灣ê早期樣貌。
Ùi<大社ê醫館＞一文以後，教會報陸續刊載醫療事工ê相關報導，包含打狗、台南、彰化病院ê情形，亦刊載衛生知識kap病症、藥方等醫療報導。另外，有關北部馬偕病院ê相關報導一直到1912年南北教會聯合成立「台灣大會」，原本屬tī南部ê教會報增加「北部消息」kap「北部事務」等內容以後， chiah開始刊載馬偕病院ê消息。教會報一直到1942年3月第684卷，因為日本戰爭影響，致使戰前教會報停刊hit期，最後一篇有關醫療ê報導是＜彰化基督教醫院消息＞一文。

Tī盧醫生來大社設醫館以後，梅監霧牧師kap蘭大衛醫生（Dr.David Landsborough）接續來到中部地區，繼續醫療傳道ê工作。1897年，蘭醫生tī彰化設立醫館（tō是「蘭醫館」），為病人治療，是彰化基督教醫院ê前身。患者來自彰化當地kap大社，病症大部分是「kha疼」，「ba̍k-chui痛」kap「寒熱症」。蘭醫生ê手術技術真高明，hō͘各地方ê人真信用，是當時台灣有名ê外科醫生，tī 1898年接受伊手術 ê人數tō有三百七十九人。 後來因為患者急速增加，有需要擴展醫院設備，所以蘭醫生tī 1899年，設立「彰化醫院」，有診療室、手術室、藥局kap禮拜廳，koh有男病房兩棟kap女病房一棟，thang收納十名病人。蘭醫生ê名聲亦漸漸傳夠各所在，ùi各地來就醫ê人真chē,所以後來醫院koh擴大到七十五ê病床。蘭大衛醫生tī中部從事醫療傳道前後三十六年，是外國醫療宣教師在台灣siōng久ê,伊ê醫術kap醫德得著學生kap患者ê尊敬，1899年5月第170卷ê教會報有一篇黃茂盛所寫ê<彰化醫館ê消息＞，對蘭醫生有深刻ê描寫：

不論三更半暝，不論路hn̄g路近，若有緊急ê病人，來請--伊,伊liâm-pinnkap伊去救伊，所以去外面醫，救真chē人免死。若tú-著病傷重ê人，bē醫tit，不論是面pháiⁿ看，á-sī臭爛phaiⁿ-bī,無人káⁿ看káⁿ óa,醫生就講，咱ê心比che khah pháiⁿ。

透過以上ê描述可見蘭醫生ê醫德kap對患者ê愛心，伊ê好名聲、好脾氣hō͘彰化人kā號做彰化ê「活佛」。 Tī彰化地方有流傳一句俗語講：「南門有媽祖，西門有蘭醫師」，tō是展現蘭大衛醫生對彰化醫療ê影響kap貢獻。