《胡文池牧師kap布農族》

 | | | 轉寄

騎驢出診ê醫生-tī觀音山教會

作者 胡文池 2009.03.22

陳長老見證講：「tī台南有一位名醫，吳秋微先生。In夫婦是虔誠而且有愛心ê基督徒。我原本m̄信主，但是tī in診所做藥局生ê時chūn，m̄-nā學習了醫術，koh-khah寶貴ê是學習了in信仰ê好榜樣，chiah成做基督徒。得tio̍h主ê幫助，醫師檢定考試通過了後，我來到chia偏僻ê山地服務。」 陳長老bat醫好了不計其數ê危急病患。伊名叫添壽，果真無負其名，加添了真chē人ê壽命。

Tī台北地區、淡水對岸，有座觀音山，tī東部mā有一座同名ê山，却是比較小型ê。位 tī東部鐵路大禹khiā東方約十公里處。看起來真近，行起來却真遠。

到觀音山途中，必經一條秀姑巒溪，伊雖然有女人ê名字，却無女人ê溫柔、慈愛，因為水流湍急，若無坐渡船就會hō͘伊帶走á喪命。

觀音山麓一帶tòa有將近百戶和順樸素ê農民kap平地山胞。四十年前既無車禍，mā無歹徒搶殺危險，tī這安靜，風光明媚ê所在，稱得上是世外桃源鄉。

觀音山教會左隣有一診所，是教會長老陳添壽先生開設ê。伊體格如撒該矮小，却無像伊貪財。圓圓ê面上留有德國希特勒型二點式小鬍子。希特勒是魔鬼ê化身，bat tī第二次大戰中殺死六百萬猶太人。但是陳長老tú好相反，伊有慈愛ê心腸。一般ê私人診所若無繳現金，就免想the̍h-tio̍h藥，陳長老却同情患者ê困境，病患大部分無帶現金來看病。陳長老lóng是來者不拒，伊仝款以愛心為in診察、投藥、注射。看完病記個帳就ē-tàng了。等到農民收割時，chiah叫藥局助手帶數十個大麻袋，到每一債務者處，以稻谷iáu帳，收回藥價。醫生、病家lóng大歡喜。

四十年前，tī大都市mā無計程車，甚至大牌醫生mā無轎車。Tī這農村koh-khah m̄免談了。

但是醫生ê時間就是金錢，陳醫生無時間慢慢行，到病患家出診往往koh須花費真chē ê時間。因此，伊開了我一個月薪水ê一百倍錢，買來一台五百西西德國機車，專為出診之用。但tī崎嶇顛簸ê農村小石路上，走了無久就發生故障、動彈bē-tàng。伊雖然是醫生，却bōe-sái醫治機車ê病，附近mā無機車行thang修理，所以只好khǹg tī行廊當古董。

有一工，陳醫生koh一pái讀主耶穌騎驢入城ê故事，得tio̍h啟示，買來一頭驢á當步。這小動物既m̄食汽油，mā不故障，橫直tī農村內底驢á ê食料真多。驢有一種怪性，一到三更半暝ê時chūn，會像雞公叫。不過伊ê叫聲kap雞公無仝款。雞公是叫三聲：「oh-oh-oh。」驢是叫二聲：「oh依-oh依-」，叫了數次chiah停。

陳長老用這自然ê交通車，實在特殊，m̄-nā ē-tàng享受像主耶穌騎驢入城ê勝利者形像大出風頭，也thang減輕病人負擔出診費用。一舉兩得，何樂無為。

陳醫生全家熱心事奉主，為傳道人看病mā m̄收任何費用。每禮拜，in必定參加禮拜，有時chūn mā代我講道，是教會裡模範ê長老。