《胡文池牧師kap布農族》

 | | | 轉寄

惡犬歸回真主-tī頭城教會

作者 胡文池 2009.03.15

br> 伊ê名字雖然不文雅，性情却溫柔，伊m̄-bat傷害人。伊真孝順年老母親。聽了福音以後歸回真主，mā孝順天頂父親。

Tī頭城有一位木工，名惡犬。Chit名字實在不文雅。為何父母為伊起án-ne無好聽ê名字!

我m̄知影。大概因為古時ê迷信，認為名字惡劣ê嬰兒鬼魔無愛，才 bē將伊掠去。如花蓮加禮苑教會昔時一位長老名叫真臭ê「雞膏」(to̍h是雞屎)，mā有人名叫「犬屎」，我ê a舅叫「乞食」(乞丐)。Lóng是因為迷信ê關係。

有一pái，我因託伊修理木桶ê機會認bat伊。伊是一位老實勤勞而且真孝順年老母親ê青年。了後來我時常講救主ê道理hō͘伊聽並教授伊羅馬字。伊患有中耳炎，耳孔發出惡臭，流出膿水來。大概因為sàn-chhiah，無錢chhōe醫生治療。為tio̍h幫助伊，我充當赤腳醫生，hō͘伊紅汞水擦耳孔，並為伊祈禱。無久，伊ê中耳炎竟痊癒了。

伊ē-tàng讀羅馬字，讀過真道問答了後就信了主，參加禮拜。後來伊iáu被選做教會執事，成做頭城教會棟樑。伊ê母親雖然年紀大，却m̄是老頑固，伊hō͘ kiáⁿ兒信仰自由。這是我自神學院畢業了後第一pái奉獻hō͘主ê禮物-領人歸主，印象特別深刻，喜樂繼續特別久，直到現在iáu 長留心底。