《老人kah海》

 | | | 轉寄

《老人kah海》_31, Kàu taⁿ i thiàu cha̍p gōa pái à/到taⁿ牠跳十gōa pái à

作者 Ernest Hemingway, 台譯：宋麗瓊 林俊育 2019.11.17

I siūⁿ, che to̍h sī lán teh thiaⁿ 候ê sîkhek à, taⁿ lán lâi piàⁿ lah.

I siūⁿ, Tio̍h hō͘ i ūi thoa hîsòaⁿ hùchhut tāikè, tio̍h hō͘ i hùchhut tāikè.

I khòaⁿ bē tio̍h hî teh thiàu, kantaⁿ thiaⁿ ē tio̍h háṳûⁿ piak li̍h kah hî tāngtāng siak lo̍h khì ê sî, chúi phùnchōaⁿ ê siaⁿ. Hîsòaⁿ liucháu ê soktō͘ giâmtiōng koah siong i ê siang chhiú, m̄ koh i chá to̍h chaiiáⁿ ē ánne, só͘í i chīnliōng hō͘ hîsòaⁿ koah kòe chhiú kiat lan ê só͘chāi, chīnliōng m ài khì lù tio̍h chhiúsim á sī koah tio̍h chéngthâu'á.

I siūⁿ, Gín’á nāsī tī chia, i to̍h ē ēng chúi kā hîsòaⁿ khún lâm hō͘ tâm. Sī ah, gín'á nā ū lâi to̍h hó à, i nā ū lâi to̍h hó à.

Hîsòaⁿ itti̍t liu chhutkhì, liu chhutkhì, liu chhutkhì, m̄ koh chitmá soktō͘ khah bān ā; i hō͘ hî múi thoa chhutkhì chi̍t 吋 hîsòaⁿ, lóng tio̍h ài hùchhut tāikè. I íkeng ētàng tùi chûnpang kā thâu gia̍h khí·lâi, līkhui hō͘ i ê chhùiphóe ah nōakhì ê hit phìⁿ hî bah. I seng kūi lo̍hkhì, chiah koh bānbān'á khiā khí·lâi. I iáu teh pàng soh'á, m̄ koh soktō͘ jú lâi jú bān. I sóa tńgkhì i ēng kha thàm ē tio̍h hia ê hîsòaⁿ khún ê só͘chāi, chísī ba̍kchiu khòaⁿ bē tio̍h in. Iáu ū chin chē hîsòaⁿ tī hia, chitmá, hî tio̍h ài koh khah chhutla̍t lâi thoa hiahê sin hîsòaⁿ tī chúi ·nih ê mô͘chhat la̍t.

I siūⁿ, sī ā. Jîchhiáⁿ kàu taⁿ i íkeng thiàu cha̍p gōa pái à, i khachiah lāi ê khùi lông íkeng koànmóa khongkhì, só͘í i bô hoattō͘ koh thiāmlo̍h chhimhái, sí tī góa giú i bē tńglâi ê só͘chāi. I chin kín to̍h ē khaisí se̍h kho͘á, góa ài lâi tùihù i. Góa m̄ chai sī ánchóaⁿ i ē hutjiân kan ánne. Kám sī iaugō hō͘ i bô kò͘ sèⁿmiā, á sī i hō͘ àmsî ê siáⁿmi̍h hehⁿ kiaⁿ tio̍h? Á ·sī i thu̍tjiân keng kámkak kiaⁿhiâⁿ? M̄ koh i sī chi̍t bóe léngchēng koh ióngchòng ê hî, hó chhinchhiūⁿ siáⁿmi̍h lóng m̄ kiaⁿ, koh hiahni̍h ū chūsìn. Che si̍tchāi sī chin kîkoài.

I kóng,"lāulâng ah, lí kakī siōng hó sī mài kiaⁿ, ài ū chūsìn. Lí koh kā i lia̍htiâu ā, m̄ koh lí giú i bē óa lâi. Chóng sī, chin kín i to̍h ē puttek put ài se̍h kho͘á à."

Lāulâng ēng tò chhiú kah siang keng phāiⁿ hîsòaⁿ, liáuāu oan sin, ēng chiàⁿ chhiú khat chúi, sé tiāu liâm tī i ê bīn, íkeng hông ah nōakhì ê poeo͘hó͘ bah. I tamsim he ē hāi i péngpak, hō͘ i áuthò͘, súnsit théla̍t. Bīn sé chhengkhì liáuāu, i tī chûnpiⁿ ê chúi ·nih sé i ê chiàⁿ chhiú, liáuāu kā chhiú lâu tī iâm chúi ·nih, chi̍t bīn chùsī ji̍t chhut chìnchêng ê thâuchi̍t tō phú kng. I siūⁿ, i chhaputto sī ǹgtang chiânchìn, che piáusī hî thiám à, só͘í sūn háilâu teh kiâⁿ. Chin kín i to̍h puttek put ē se̍h kho͘á, goán chinchiàⁿ ê kangchok to̍h beh khaisí à.

I kó͘kè i ê chiàⁿ chhiú chìm tī chúi ·nih ū kàu kú à, to̍h kā i kiu tńglâi, koh siôngsè koanchhat. I kóng,"khòaⁿ khí·lâi bē bái. Thiàⁿ tùi lâmchúhàn lâi kóng, bô sǹgsī siáⁿ."

I siósim la̍k tiâu hîsòaⁿ, chùì mài hō͘ hîsòaⁿ khì koah tio̍h sin ê khangchhùi, liáuāu tiâuchéng sengkhu ê tiōngsim, hō͘ i ētàng kā tò chhiú chìm ji̍p khì chûn lēnggōa hit pêng ê háichúi nih.

I kā tò chhiú kóng,"tùi bô lō͘ēng ê lí lâi kóng, lí túchiah piáuhiān bē bái neh, m̄ koh ū chi̍t khùn á góa chhōe bô lí thang lâi tàukhachhiú."

I siūⁿ, sī ánchóaⁿ góa m̄ sī thianseng to̍h ū nn̄g ki hó chhiú? Kiámchhái sī góa m̄ tio̍h, bô kā hit ki chhiú hùnliān hósè. M̄ koh, thiⁿ ah, i ū chin chē kihōe thang ha̍ksi̍p ā. Chóng sī, àmsî i ê piáuhiān bē bái, kantaⁿ kiùkin chi̍t pái. I nā koh kiùkin, hō͘ i khì hō͘ hîsòaⁿ koahtn̄g hó lah.

伊想：這to̍h是咱teh聽候ê時刻à，taⁿ咱來拚lah。

伊想：Tio̍h hō͘ 牠為拖魚線付出代價，tio̍h hō͘ 牠付出代價。

伊看bē tio̍h魚teh跳，kantaⁿ聽ē tio̍h海洋piak裂kah魚重重siak落去ê時，水噴濺（phùnchōaⁿ）ê聲。魚線溜走ê速度嚴重割傷伊ê雙手，m̄ koh伊早to̍h知影ē ánne，所以伊盡量hō͘ 魚線割過手結lan ê所在，盡量mài去lù tio̍h手心á是割tio̍h指頭á。

伊想：Gín’á若是tī chia，伊to̍h ē用水kā魚線綑lâm hō͘ tâm。是ah，gín’á若有來to̍h好à，伊若有來to̍h好à。

魚線一直溜出去，溜出去，溜出去，m̄ koh chitmá速度khah慢ā；伊hō͘ 魚每拖出去一吋魚線，lóng tio̍h ài付出代價。伊已經ētàng tùi船枋kā頭gia̍h起來，離開hō͘ 伊ê嘴phóe押爛去ê hit片魚肉。伊先跪落去，chiah koh慢慢á khiā起來。伊iáu teh放索á，m̄ koh速度jú來jú慢。伊徙tńg去伊用腳探ē tio̍h hia ê魚線綑ê所在，只是目chiu看bē tio̍h in。Iáu有真chē魚線tī hia，chitmá，魚tio̍h ài koh khah出力來拖hiahê新魚線tī水裡ê摩擦力。

伊想：是ā。而且到taⁿ牠已經跳十gōa pái à，牠kha脊內ê氣囊已經灌滿空氣，所以牠無法度koh沉落深海，死tī我giú牠bētńg來ê所在。牠真緊to̍h ē開始se̍h箍á，我ài來對付牠。我m̄知是án怎牠ē忽然間ánne。Kám是iau餓hō͘ 牠無顧性命，á是牠hō͘ 暗時ê啥物嚇驚tio̍h？Á是牠突然間感覺驚惶？M̄ koh牠是一尾冷靜koh勇壯ê魚，好親像啥物lóng m̄驚，koh hiahni̍h有自信。這實在是真奇怪。

伊講：「老人ah，你kakī siōng好是mài驚，ài有自信。你koh kā牠掠tiâu ā，m̄ koh你giú牠bē óa來。總是，真緊牠to̍h ē不得不ài se̍h箍á à。」

老人用倒手kah雙肩phāiⁿ魚線，了後彎身，用正手khat水，洗掉黏tī伊ê面，已經hông押爛去ê飛烏虎肉。伊擔心he ē害伊péng腹，hō͘ 伊嘔吐，損失體力。面洗清氣了後，伊tī船邊ê水裡洗伊ê正手，了後kā手留tī鹽水裡，一面注視日出chìn前ê頭一道phú光。伊想：牠差不多是ǹg東前進，這表示魚thiám à，所以順海流teh行。真緊伊to̍h不得不ē se̍h箍á，阮真正ê工作to̍h beh開始à。

伊估計伊ê正手浸tī水裡有夠久à，to̍h kā它kiu tńg來，koh詳細觀察。伊講：「看起來bē bái。痛對男子漢來講，無算是啥。」

伊小心la̍k tiâu魚線，注意mài hō͘ 魚線去割tio̍h新ê空嘴，了後調整身軀ê重心，hō͘ 伊ētàng kā倒手浸入去船另外hit pêng ê海水裡。

伊kā倒手講：「對無路用ê你來講，你túchiah表現bē bái neh，m̄ koh有一睏á我chhōe無你thang來tàu腳手。」

伊想：是án怎我m̄是天生to̍h有兩支好手？Kiámchhái是我m̄ tio̍h，無kā hit支手訓練好勢。M̄ koh，天ah，它有真chē機會thang學習ā。總是，暗時它ê表現bē bái，kantaⁿ kiù筋一pái。它若koh kiù筋，hō͘ 它去hō͘ 魚線割斷好lah。