《老人kah海》

 | | | 轉寄

《老人kah海》_20 Chi̍t chiah chiáu'á poe lâi sió chûn /一隻鳥á飛來小船

作者 Ernest Hemingway, 台譯：宋麗瓊, 林俊育 2019.08.25

I siūⁿ, Ǹg bāng sī ánne.

Chit sî, chi̍t chiah chiáu’á tùi pak pêng poe hiòng sió chûn. He sī chi̍t chiah thî chiáu （warbler), kēkē poe tī chúibīn. Lāu lâng khòaⁿ ē chhut, i chin thiám à. Chiáu’á thêng tī chûnbóe hiohkhùn. Liáuāu i tī lāu lâng ê thâukhak téng teh se̍h, koh thêng tī hî sòaⁿténg bīn, kahná khah sùsī ê khóan.

Lāu lâng mn̄g chiáu’á,"lí kúi hòe à? che kám sī lí thâu chi̍t pái chhutmn̂g?"

I kóngōe ê sî, chiáu’á chùsîn khòaⁿ i. I siuⁿ thiám, thiám kah sīmchì bô seng koanchhat hîsòaⁿ, to̍h ēng i ê sèki khajiáu kā hîsòaⁿ khi̍p tiâutiâu, sengkhu lō͘lō͘hián.

Lāu lâng kā i kóng,"hîsòaⁿ chin ún, ún taktak lah. Chaàm bô hong bô iô, lí bô engkai hiah thiám ā. Chiáu ásī lóng ánchóaⁿ à leh?"

Lāu lâng sim siūⁿ, ū la̍hhio̍h ē chhut hái lâi lia̍h in, m̄ koh i bô kā chit chiah chiáu’á kóng, hôaiⁿti̍t i mā thiaⁿ bô, m̄ koh i chin kín to̍h ē chaiiáⁿ la̍hhio̍h ê līhāi à.

I kóng,"chiáu ah, hóhó á hiohkhùn leh, liáuāu chiah koh chhuthoat khì chiángak kihōe, chhinchhiūⁿ lâng, chiáu, ásī hî’á nne."

Chiáu’á teh kó͘lē i kóngōe, inūi i ê khachiah chaàm lóng ngē khì à, chitmá chin thiàⁿ.

I kóng,"chiáu ah, lí nā gōanì, lâi góan tau tòa. Pháiⁿsè lah, góa bētàng thàn bîhong tng teh khí ê sî, sengkhí chûn phâng, chhōa lí tńgkhì góan tau, m̄ koh, góa chitmá ū lí chitê pêngiú kah góa chòphōaⁿ." Tú hit sî, hî’á hiônghiông khi sin, kā lāu lâng khiú tò tī chûnthâu; nā m̄ sī i ū kiong chin ân, koh sûi kā hîsòaⁿ pàng lēng, i hiám’á to̍h ē poe chhutkhì chûn gōa.

Hîsòaⁿ chhoah tāng ê sî, chiáu’á poecháu, m̄ koh lāu lâng sīmchì bô khòaⁿ tio̍h i līkhui. I ēng chiàⁿ chhiú sèjī kiámcha hîsòaⁿ, jîchhiáⁿ chùì tio̍h i ê chhiú teh lâu hoeh.

"Túchiah i tēng tio̍h sī ū tó ūi teh thiàⁿ,"i kóngchhut siaⁿ, koh giú soh’á, khòaⁿ sī m̄ sī ētàng hō͘ hî tńg sin. M̄ koh, tng i giú kàu soh’á kiōngbeh tn̄g khì ê thêngtō͘, i chiū úntēng tī hia, koh sengkhu tò hiàⁿ, lâi tùikhòng hîsòaⁿ ê giú la̍t.

I kóng,"hî ah, taⁿ lí ē chai thiàⁿ à hoⁿh. Thiⁿ ah, góa mā sī."

I sìkè teh chhōe hit chiah chiáu’á, inūi i ìài i lâi chòphōaⁿ. Chiáu’á poe khì à.

Lāu lâng siūⁿ, lí pēng bô tī chia thêng gōa kú; m̄ koh, tī pêngan pe kàu háihōaⁿ chìnchêng, lí beh khì ê lō͘ sī chin kanlân. Túchiah hit bóe hî chhoah chi̍tē ê sî, góa ná ē khì siong tio̍h chhiú leh? góa ittēng sī jú lâi jú gōng, nā bô, to̍h sī góa tng tehkhòaⁿ hit chiah sè chiah chiáu’á, teh siūⁿ i ê tāichì. Taⁿ góa ài choansim chò khangkhòe, jîchhiáⁿ góa ài lâi chia̍h hit bóe chhńg’á, chiah bē bô khùila̍t.

I tōasiaⁿ kóng,"Gín’á nā tī chia, jîchhiáⁿ góa nā ū chi̍t kóa iâm to̍h hó à."

伊想：Ǹg望是ánne。

Chit時，一隻鳥á tùi北pêng飛向小船。He是一隻啼鳥（warbler)，kēkē飛tī水面。老人看ē出，牠真thiám à。 鳥á停tī船尾歇睏。了後牠tī老人ê頭殼頂teh se̍h，koh停tī魚線頂面，kahná khah sùsī ê款。

老人問鳥á：「你幾歲à？這kám是你頭一pái出門？」 伊講話ê時，鳥á注神看伊。牠siuⁿ thiám，thiám kah甚至無先觀察魚線，to̍h用牠ê細支腳爪kā魚線khi̍p tiâutiâu，身軀lō͘lō͘hián。

老人kā牠講：「魚線真穩，穩taktak lah。昨暗無風無搖，你無應該hiah thiám ā。鳥á是lóng án怎à leh？」 老人心想，有la̍hhio̍h ē出海來掠in，m̄ koh伊無kā chit隻鳥á講，橫直牠mā聽無，m̄ koh牠真緊to̍h ē知影la̍hhio̍h ê厲害à。 伊講：「鳥ah，好好á歇睏leh，了後chiah koh出發去掌握機會，親像人、鳥，á是魚ánne。」

鳥á teh鼓勵伊講話，因為伊ê kha脊昨暗lóng硬去à，chitmá真疼。

伊講：「鳥ah，你若願意，來阮tau tòa。Pháiⁿ勢lah，我bētàng趁微風當teh起ê時，升起船帆，chhōa你tńg去阮tau，m̄ koh，我chitmá有你chitê朋友kah我做伴。」 Tú hit時，魚á雄雄khi身，kā老人khiú倒tī船頭；若m̄是伊有弓真ân，koh隨kā魚線放lēng，伊險á to̍h ē飛出去船外。 魚線chhoah動ê時，鳥á飛走，m̄ koh老人甚至無看tio̍h牠離開。伊用正手細膩檢查魚線，而且注意tio̍h伊ê手teh流血。

「Túchiah牠定tio̍h是有tó位teh痛，」伊講出聲，koh giú索á，看是m̄是ētàng hō͘ 魚tńg身。M̄ koh，當伊giú到索á kiōngbeh斷去ê程度，伊就穩定tī hia，koh身軀倒hiàⁿ，來對抗魚線ê giú力。

伊講：「魚ah，taⁿ你ē知痛à hoⁿh。天ah，我mā是。」 伊四界teh chhōe hit隻鳥á，因為伊意愛牠來做伴。鳥á飛去à。 老人想：你並無tī chia停gōa久；m̄ koh，tī平安飛到海岸chìn前，你beh去ê路是真艱難。Túchiah hit尾魚chhoah一下ê時，我ná ē去傷tio̍h手leh？我一定是jú來jú戇，nā無，to̍h是我當teh看hit隻細隻鳥á，teh想牠ê tāichì。Taⁿ我ài專心做khangkhòe，而且我ài來食hit尾串á，chiah bē無氣力。

伊大聲講：「Gín’á若tī chia，而且我若有一kóa鹽to̍h好à。」