《老人kah海》

 | | | 轉寄

《老人kah海》_7 Siōng hó ê thóhái lâng sī lí/ Siōng好ê討海人是你

作者 Ernest Hemingway, 台譯：Manlajo, 修訂：宋麗瓊 2019.04.07

“Lí chiahê ló͘chhài chiâⁿ chán,”lāu lâng kóng.
“Κā góa kóng iákiû ê tāichì,”gín’á kā i iaukiû.
“Tī Bikok liânbêng isi, Yankees iâⁿ, tú chiàu góa kóng ê,”lāu lâng kóngkah chiâⁿ hoaⁿhí.
“Κin’áji̍t in su ā,”gín’á ka i kóng.
“He bô siáⁿ. DiMaggio láutōa koh hôeho̍k chèngsiông loh.”
“In tūi ni̍h iáu ū kîtha ê lâng.”
“Tongjiân, m̄ koh i kah chèng lâng bô kāng. Tī lēnggōa chi̍tê liânbêng písài, Brooklyn kah Philadelphia, góa tio̍h ài sóan Brooklyn, m̄ koh, góa mā siūⁿ tio̍h Dik Sisler kah i tī kū kiû tiûⁿ phah ê hiahê hó kiû.”
“Bô lâng ē phah chhut pí i khah hó ê kiû; i phah chhut góa khòaⁿkòe siōng hn̄g ê kiû.”
“Lí kám ē kìtit i íchêng bat tiāⁿtiāⁿ lâi Terrace?”
“Góa bat siūⁿ beh chio i khì lia̍hhî, m̄ koh m̄ káⁿ kā i kóng; liáuāu góa kiò lí khì kā i kóng, lí mā bô táⁿ.”
“Góa chai, lán lóng m̄ tio̍h khì à; i chin ū khólêng ē kah lán khì, ánne, lán chitsìlâng to̍h lóng ē ē kìtit hithāng tāichì.”
“Góa siūⁿ beh chio DiMaggio lau2tōa lâikhì lia̍hhî,”lāu lâng kóng.”thiaⁿkóng, in lāupē íchêng mā sī thóhái lâng. Kiámchhái i íchêng kah lán chitmá pêⁿ sànchhiah, só͘í i ē liáukái.”
“Sisler láutōa ê lāupē m̄ bat sànchhiah kòe; in lāupē tī góa chitê nîkí ê sî, to̍h teh phah tōa liânbêng písài à.”
“Tng góa tī lí chitê nîkí ê sî, góa teh tòe chi̍t tâi hoâiⁿphâng chûn （square rigged ship） khì huichiu, àmsî ū khòaⁿ tio̍h soa hōaⁿténg ê sai á.”
“Góa chai, lí ū kā góa kóng kòe.”
“Lán sī beh kóng huichiu, ásī iákiû?”
“Góa siūⁿ, iákiû lah,”gín’á kóng,”kā góa kóng Joⁿh J. McGraw láutōa ê tāichì.”i kā J. Kóng chò Jota.
“Íchêng, i ū sî mā ē lâi Terrace, m̄ koh tng i lim chiú ê sî, i chho͘ló͘, pháiⁿ siaⁿ sàu, koh pháiⁿ tàu tīn. I ê simsu m̄ nā khǹg tī iákiû, mā khǹg tī isi bé ê bé á; siōng bô, i lak tē’á lāi putkóansî lóng ū chi̍t tiuⁿ bé á ê miâtoaⁿ, koh tiāⁿtiāⁿ tī tiānōe tiong thêkhí bé á ê miâ.”
“I sī chi̍tê úitāi ê kàuliān,”gín’á kóng.”góan lāupē kóng i sī siōng úitāi ê.”
“He sī inūi i siōng chia̍p lâi.”lāu lâng kóng,”nāsī Durocher ta̍k nî kèsio̍k lâi chia, lín lāupē to̍h ē siūⁿ kóng i chiah sī siōng úitāi ê kàuliān.”
“Tàuté siáng chiah chinchiàⁿ sī siōng úitāi ê kàuliān leh, Luque ásī Mike Gonzalez?”
“Góa siūⁿ in chhaputto.”
“M̄ koh, siōng hó ê thóhái lâng sī lí.”


「你chiahê鹵菜chiâⁿ chán，」老人講。
「Kā我講野球ê tāichì，」gín’á kā伊要求。
「Tī美國聯盟賽，Yankees贏，tú照我講ê，」老人講kah chiâⁿ歡喜。
「今á日in輸ā，」gín’á ka伊講。
「He無啥。DiMaggio老大koh回復正常loh。」
「In隊裡iáu有其他ê人。」
「當然，m̄ koh伊kah眾人無仝。Tī另外一个聯盟比賽，Brooklyn kah Philadelphia，我tio̍h ài選Brooklyn，m̄ koh，我mā想tio̍h Dik Sisler kah伊tī舊球場phah ê hiahê好球。」
「無人ē phah出比伊khah好ê球；伊phah出我看過siōng遠ê球。」
「你kám ē記得伊以前bat tiāⁿtiāⁿ來Terrace？」
「我bat想beh招伊去掠魚，m̄ koh m̄敢kā伊講；了後我叫你去kā伊講，你mā無膽。」
「我知，咱lóng m̄ tio̍h去à；伊真有可能ē kah咱去，ánne，咱chit世人to̍h lóng ē ē記得hit項tāichì。」
「我想beh招DiMaggio老大來去掠魚，」老人講：「聽講，in老父以前mā是討海人。Kiámchhái伊以前kah咱chitmá平sànchhiah，所以伊ē了解。」
「Sisler老大ê老父m̄ bat sànchhiah過；in老父tī我chitê年紀ê時，to̍h teh phah大聯盟比賽à。」
「當我tī你chitê年紀ê時，我teh tòe一台橫帆船（square rigged ship）去非洲，暗時有看tio̍h沙岸頂ê獅á。」
「我知，你有kā我講過。」
「咱是beh講非洲，á是野球？」
「我想，野球lah，」gín’á講：「kā我講Joⁿh J. McGraw老大ê tāichì。」伊kā J.講做Jota。
「以前，伊有時mā ē來Terrace，m̄ koh當伊lim酒ê時，伊粗魯，pháiⁿ聲sàu，koh pháiⁿ tàu陣。伊ê心思m̄ nā khǹg tī野球，mā khǹg tī賽馬ê馬á；siōng無，伊lak袋á內不管時lóng有一張馬á ê名單，koh tiāⁿtiāⁿ tī電話中提起馬á ê名。」
「伊是一个偉大ê教練，」gín’á講：「阮老父講伊是siōng偉大ê。」
「He是因為伊siōng chia̍p來。」老人講：「若是Durocher ta̍k年繼續來chia，lín老父to̍h ē想講伊chiah是siōng偉大ê教練。」
「到底siáng chiah真正是siōng偉大ê教練leh，Luque á是Mike Gonzalez？」
「我想in差不多。」
「M̄ koh，siōng好ê討海人是你。」