《台灣人e5先覺─黃彰輝傳》

 | | | 轉寄

張德香牧師 序

作者 張德香 2009.02.15

心肝充滿了歡喜感謝上帝ê恩典、憐憫、仁愛賞賜hō͘台灣人chit-ê寶貝：台南神學院院長黃彰輝牧師。學生張瑞雄寫作《台灣人ê先覺－黃彰輝》──tùi法師歸順基督接受神學教育ê阿公黃能傑牧師（1853－1924），父親黃俟命牧師（1890－1950），到黃彰輝牧師（1914－1988），三代lóng總135年。讀者ē-tàng看出上帝慈愛ê攝理、安排、引chhōa黃彰輝ê一生。

前半段（1914－1947）是講伊ê出生、生長、教育。上帝賞賜彰輝有chi̍t-ê siōng好ê家庭環境，接受基督信徒基督化家庭信仰生活教育ê影響，koh有教會環境受tio̍h基督教會團體宗教生活ê培養，建立彰輝ê聖經信仰堅定基礎。

上帝koh賞賜彰輝有充足ê恩賜kap機會經歷正規ê高等教育（1922－1947）；前後歷經台南師範附屬公學校、長老教中學、東京青山學院中學部、台灣高等學校、東京帝國大學、英國伯明罕西利屋學院kap劍橋西敏斯德神學院深造，建立了彰輝ê基督教會神學教育、神學學術造詣。

上帝koh kā彰輝安排tī特殊ê政治環境之下，因此鍛鍊出一位ē-sái克服困難服從「生命ê主」ê信仰鬥士。了後歐洲列強進入別ê洲殖民佔有地區居民，亞洲台灣mā ká入去世界ê動亂當中。中日戰爭、中法戰爭、第一pái世界大戰、第二pái世界大戰，權力互相鬥爭，動亂lóng bē停。

1895年中日戰爭改變了台灣ê運命，m̄-koh1945年第二pái世界大戰結束了後，koh一pái改變了台灣ê運命。滿清割讓hō͘日本ê台灣成做中國國民黨軍隊kap政府所接收ê台灣。經過1947年2月28日ê屠殺事件了後戒嚴、威權制裁、統轄，社會上、政治上ê變動擾亂，hō͘台灣社會人群bē-tàng過tio̍h安寧ê生活。若m̄是上天保佑kap上帝ê攝理，án-chóa ē-tàng突破chit種困境。

1937年8月11日彰輝tī時局真bái、緊張ê時刻，tùi基隆港離開台灣去英國留學。Hit日，明明有上帝ê攝理kap引chhōa。Hit工日本高等特務tòe-tiâu-tiâu kap監視彰輝到碼頭，情況萬分驚惶不安。上帝安排了日本船員鈴木敏道檢查彰輝ê船票kap證件。伊是彰輝chìn前tī東京青山學院中學部ê日本人基督信徒同學ê至親密友，就ná-né，彰輝ē-sái安全順利上船到英國完成學業。十年了後1947年2月28日台灣屠殺事件了後，9月平順tńg來台灣，1949年就擔任台南神學院院長，完成台灣土產出色ê神學教育家大使命。

黃彰輝牧師tńg來台灣了後（1947－1965）18年久，kā戰後koh-chái開辦ê台南神學院，成做編制上、實質上東南亞第一大koh好ê神學教育機構；mā幫贊台灣長老教會ùi大戰後ê孤兒宣教區成做堅強koh有活力ê少壯教會，tī十年內（1955－1965）完成教會加倍kap信徒倍加，擔當教會總會議長主持ê教會設教一百年感恩禮拜慶典，又koh引領教會進入宣教第二世紀ê宣教任務。

siōng尾一段（1965－1988），黃彰輝牧師以台灣經驗kap亞洲經驗接任普世基督教會協會ê神學教育基金會副主任ê職務，駐tī英國倫敦辦公；1971年晉升hit-ê基金會ê主任，總覽亞洲、非洲、南美洲等地區ê神學教育kap神職訓練工作ê提升；1977年退休。

黃牧師tī 1965年秋末離開台灣以後tio̍h一直流浪tī海外23年hiah-nih久。Tī 1987年熱天透過當時副總統李登輝從中協調，特別允准入境；感恩「生命ê主」上帝神奇、美妙ê攝理安排引領，有前南神同事、副院長安慕理牧師ang-á-bó ê陪伴，穩穩chāi-chāi雙腳踏tī幼、少年時期生長ê台灣土地，kap 1947年開始工作生活ê所在－台南神學院，歡喜kah bē講得，真真正正是有上帝講bē盡ê恩賜。

雖然肉身漸漸衰退，信仰，確信鬥智無衰退，tī台灣故鄉恩典ê日子，日夜為tio̍h神學教育、教會宣教大使命，kap台灣前途、自由民主、自決空前大任務，奔走奮鬥。

1988年10月27日tī伊鄉蒙主恩召，安息tī主ê懷抱。

下底ē-sái講是一神信仰、基督宗教ê聖經信仰告白：「耶穌基督道成肉身，ùi人僕，非以役人，乃役於人，tī本丟彼拉多任內受苦，釘十字架，死；上帝伸張公義kap真理，hō͘耶穌基督tùi死人內底活過來，拍開一條koh新koh活ê路引到永生，彰顯神恩、奇異大能，救贖人類，脫離惡法、罪孽、烏暗死亡權勢，hō͘受造ê宇宙、森羅萬象、眾生有一日ē-sái同齊分享上帝兒女榮光ê自由。」

這tio̍h是黃彰輝牧師ê基本信仰確信ê一部分，mā是伊神學教育ê磐石基礎。常常tī南神教室聽tio̍h黃院長引用保羅ê話講：「上帝若ùi咱（幫助咱），誰ē-tàng敵擋（對敵）咱？」……「m̄-koh，靠tio̍h愛咱ê主，tī諸個（ti chiab-e）lóng總ê事，已經得勝有chhun lah。」黃彰輝院長雖然死去，soah因信iáu-koh講話。

Tī神ê恩典下，hō͘《台灣人ê先覺－黃彰輝》kap黃彰輝牧師ê英文「回憶錄」（Recollections and Reflections，安慕理編、序）ê讀者ē-sái共享十字架苦難、死、復活ê基督信仰生活生涯，koh得tio̍h上帝兒女榮光ê自由幸福平安。