《台語kah魔術》

 | | | 轉寄

1122~28感恩節~啟應文

作者 蘇晏德 2023.11.26

＊路竹教會感恩節感恩禮拜~啟應文

啟：十一月份真特別，第四主日感恩節
Khé：Cha̍p-it goe̍h-hūn chin te̍k-pia̍t，Tē-sì Chú-ji̍t Kám-un-chiat

應：感恩奉獻愛迫切，信仰傳承愛連結
Èng：Kám-un hōng-hiàn ài pek-chhiat，Sìn-gióng thoân-sêng ài liân-kiat

啟：先人信仰真坎坷，信心火種一直揲
Khé：Sian-jîn sìn-gióng chin khám-khiat，Sin-sim hóe-chéng it-ti̍t ia̍t

應：咱的信心毋通滅，感恩祭壇大建設
Èng：Lán ê sìn-sim m̄-thang bia̍t，Kám-un chè-tôaⁿ tōa kiàn-siat

啟：感謝救主的大恩，恩典滿滿用有賰
Khé：Kám-siā Kiù-chú ê tōa-un，Un-tián móa-móa ēng ū chhun

應：為主做工愛慇勤，感恩奉獻照本份
Èng：Ūi Chú chò-kang ài un-khûn，Kám-un hōng-hiàn chiàu pún-hūn

齊：主上帝啊，感謝祢的救恩
Chê：Chú Siōng-tè ah，Kám-siā Lí ê kiù-un

啟：感恩佳節大歡喜，一年一擺好日子
Khé：Kám-un ka-chiat tōa hoaⁿ-hí，chi̍t-nî chi̍t-pái hó ji̍t-chí

應：聖經教示愛謹記，敬拜上帝添福氣
Èng：Sèng-keng kà-sī ài kín-kì，Kèng-pài Siōng-tè thiam hok-khì

啟：十一月份感恩節，信徒歡喜來獻祭
Khé：Cha̍p-it goe̍h-hūn Kám-un-cheh，Sìn-tô͘ hoaⁿ-hí lâi hiàn-chè

應：滿心感謝主上帝，求主保守咱全家
Èng：Móa-sim kám-siā Chú Siōng-tè，Kiû Chú pó-siú lán choân-ke

啟：感謝上帝無時停，恩賜平安咱家庭
Khé：Kám-siā Siōng-tè bô-sî-thêng，Un-sù pêng-an lán ka-têng

應：禮拜聚會有熱情，拜主熱心閣虔誠
Èng：Lé-pài chū-hōe ū jia̍t-chêng，Pài Chú jia̍t-sim koh khiân-sêng

啟：祝福歌聲傳里鄰，福氣濟濟用袂盡
Khé：Chiok-hok koa-siaⁿ thoân lí-lîn，Hok-khì chē-chē iōng bē-chīn

應：滿心呵咾主真神，滿面春風謝主恩
Èng：Móa-sim o-ló Chú chin Sîn，Móa-bīn-chhun-hong siā Chú in