《寧毀不銹─馬偕e5故事》

 | | | 轉寄

一點一滴ê準備

作者 曹永洋 2009.01.25

立志beh做宣教師ê少年，tī伊後來ê求學路程中，從頭至尾lóng無減chió伊ê熱情。

就算tī伊奉獻一生ê道路chìn前，伊iáu需要17年ê時間，mā m̄-Bat動搖伊堅定ê心志。

馬偕tī伊ê故鄉左拉村讀完小學了後，進入多倫多師範學校深造。

伊知影ài做一個盡職ê宣教師，必須mā ài是一個優秀ê教師。教學技巧kap教育心理對將來ê宣教工作，一定有真大ê幫助。

Phah-piàⁿ學習ê伊，3年內，逐年學業成績lóng tī頭前。畢業了後，伊前後tī 2間小學服務5、6年。實際ê教學經驗，伊koh-khah感覺珍貴。

Chit時已經22歲ê伊，mā無bē記得家己siōng早ê心願kap目標，是投入宣教師ê工作。所以tī 1866年9月，馬偕進入多倫多大學kap諾斯神學院深造。

隔tńg年9月，伊koh轉入美國出名ê普林斯頓大學神學院，繼續攻讀神學課程。
3年神學院求學期間，伊bat hō͘希伯來語學家格林博（Dr.Green）教過，耶穌生活史學家馬可徐博士（Dr.Janes McCosh）kap影響伊極深遠ê何基博士（Dr.Charles Hodge）等幾位恩師門下，度過重要ê神學院求學生涯。

1870年4月26日，馬偕修完全部課程，照普林斯頓神學院ê統，chit時教授kap畢業生會聚集tī學校內底，畢業生kā文憑放tī土kha，kap chèng-chêng chhéng-kàu ha̍k-si̍p ê教授互相牽手，圍做一個圓kho͘-á，khiā-the作伙唱（來自格陵山ê冰山）（現收入台語聖詩--0三首＜下遍遍各邦國＞）。

何基教授mā tī chit陣師生內底，伊真誠懇為chit班畢業生祈禱、祝福，逐家tī珍重koh再見、m̄-kam ê氣氛內底各奔前程。

馬偕hit暗tio̍h整理物件，ùi美國tńg來加拿大。

起初，馬偕受派tī多倫多中會一間教會牧會，同時兼任另一間教會牧職。

Chit時，伊已經是一個26歲ê青年。少年時代bat注意聽英國宣教師賓威廉牧師tī聚會報告遙遠東方宣教ê話語，chit時koh tī伊ê心肝內鑽出：

「lín往普天落去，傳福音hō͘萬民聽‥‥。」

1870年9月，馬偕向加拿大長老總會海外宣道會提出申請，自願做一名海外宣教師。

加拿大海外宣道會chit時雖已經成立kúi-nā年，m̄-koh一切iáu停tī籌備ê階段。委員會對chit-ê青年ê申請反應差真chē，有人甚至認為這kan-tā是一個急beh進步ê青年ê夢想niâ-niâ。

結果海外宣道會kâ馬偕ê申請，交hō͘總會做最後ê定奪。

提出ê申請無得tio̍h答案，馬偕為tio̍h充實家己佈道工作ê能力，2禮拜以後，伊tio̍h坐輪船tùi魁北克渡海到利物浦，進入蘇格蘭愛丁堡大學神學院，koh拜偉大佈道英雄亞歷山大．達夫博士（Dr. Alexander Duff）做老師，繼續研研神學。

達夫博士除了基督教以外，iáu研究佛教kap婆羅門教，bat tī印度做宣教工作，有bē-bái ê成就，tī神學界真有名。

馬偕tī愛丁堡大學進修4個月神學課程了後，mā-bat pòa-kang前往蘇格蘭ê蘇若蘭郡，去看先祖khiā起過ê鄉土。這是一chōa難忘ê chhōe根之旅。

當馬偕當teh人生ê十字路口kiaⁿ-hiâⁿ ê時，tú想beh kā蘇格蘭ia̍h-sī美國教會申請工作，馬可蘭博士傳一張海外宣教會批准伊申請ê信函。

In決定呈請總會，正式派馬偕做海外宣道ê第一個宣教師。

馬偕知影chit-ê消息，歡喜kah bē講得，第二工tio̍h離開先祖ê khiā起地，隨坐船到紐約，轉tńg去加拿大。

海外宣道會經過總會核准，正式指定中國做馬偕宣教ê教區，koh委託多倫多中會kā聖職hō͘馬偕。

當時已經27歲ê馬偕，總算實現少年時代kā上帝hē..ê心願－到海外做一名宣教師。

自伊10歲ê時chūn hē決心開始，17年內，伊kut-la̍t phah-piàⁿ，m̄-bat改變，一點一滴來完成必要ê準備。