《寧毀不銹─馬偕e5故事》

 | | | 轉寄

薪火永遠傳..落..去

作者 曹永洋 2009.05.17

19世紀60年代以後，外國人tī台灣宣教或者是獻身醫療工作ê先驅，親像馬雅各醫生、李酥牧師、德馬太醫生、甘為霖牧師、巴克禮牧師、吳威廉牧師、宋雅各牧師、戴仁壽醫生、蘭大衛、蘭大粥醫生父á-kiáⁿ……。



M̄-koh馬偕創下1項無人有ê紀錄，就是伊本人娶gó͘ⁿ股坑女子張聰明，in生2女1男，20年了後，馬偕博士長女偕媽連嫁hō͘愛徒陳清義，次女偕以 利嫁hō͘柯維思，婚禮tī仝年仝日舉行，由吳威廉牧師證婚 嘉禮ê日子是1899年3月9日，地點是馬偕家己ê khiā家，2代有3人kap本地人聯姻。



由馬偕博士家族譜系表，thang清楚看出in孕育ê後代，kap台灣1百20- gōa 年ê歷史有jōa-ni̍h-á深ê關連。

馬偕翁á-bó 孤kiáⁿ偕敏廉牧師，1882年1月22日出世tī台灣淡水，伊ê童年kap少年時代是tī台灣度過..ê，對台灣ê風情，生活、世俗認bat真深。

偕叡廉bat tī香港維多利亞英文學校讀冊，大學高等教育tī加拿大克拉克大學完成，28歲得tio̍h學士， 1年了後koh取得教育碩士學位， kap羅仁利女士結婚。

7-koh月了後，chit對結婚無lōa-kú翁á-bó ùi多倫多起程，橫渡大西洋，坐火車行過歐洲kap西伯利亞，完成2-koh月水陸交接ê旅程，最後坐輪船平安到基隆港。Chit位新娘受tio̍h熱烈ê歡迎，chit時伊可能iáu m̄知淡水會成做伊後來生活57年ê所在。

1865年5月28日，英國長老會差派馬雅各醫生kap伊ê 3位助手自廈門坐船到高雄旗后（今旗津）chiūⁿ岸，3工了後，1陣人選定台灣府（台南）作為醫療傳道ê出發點。

1895年蘭大衛醫生來到台灣，先tī台南落腳，1901年tī彰化創立彰化基督教病院，後來伊ê kiáⁿ蘭大粥醫師繼承醫療、宣教工作，父á-kiáⁿ nn̄g代為台灣奉獻beh chi̍t世紀。

北部醫療、宣教、教育saⁿ-ê層面ê貢獻kap影響，tio̍h落tī馬偕博士ê身軀頂。加上伊本人kap gó͘ⁿ股坑女子張聰明小姐ê聯姻，nn̄g-ê cha-bó͘-kiáⁿ別嫁hō͘伊ê愛徒柯維思、陳清義，馬偕ê孤kiáⁿ偕叡廉mā繼承教育kap宣教事業，因此馬偕家族對台灣北部基督教長老會ê影響，mā koh-khah深遠，時間i̍t直延續到20世紀90年代chiah tâu-tâu-á落幕。

1914年3月初9，偕叡廉繼承父親ê遺志，tī牛津學堂ê基礎頂頭，選擇 馬偕博士登陸淡水ê紀念日，創辦台灣第1間cha-po中學（當時淡水女學堂已經成立真chē年）。Chit時台北kan-tā有1間中學（應指台北i̍t中，現在建國中學），koh初期kan-tā日本子弟ē-tàng來讀。

創校了後偕叡廉牧師擔任第it任校長，1943年伊因第2次大戰，暫時去南美 義阿那擔任中學校長，戰爭結束了後2年，伊koh tńg去台灣教育崗位。

Jī次大戰期間，伊bat tńg去加拿大修習神學課程，受封成為牧師，66歲hit年，早年老父讀ê諾士（Knox）神學院，頒發榮譽神學博士學位表揚伊ê貢獻。



馬偕博士父á-kiáⁿ nn̄g代，lóng tī淡水仝1間學校，對培育人才付出真chē心力，chiah-ê子弟兵mā成做台灣現代化重要ê力量。

偕叡廉牧師70歲退休，iáu kap夫人選擇淡水做養老ê所在，晚年iáu辦理淡水查經室，培養婦女研讀聖經道理，甚至kā傳教區延伸到淡水郊區ê小基隆、興化店等地。

Chit位對北部教育有貢獻ê老牧師kap教育家，晚年bat tī淡水khiā家受暴徒攻擊，好佳哉siong主庇佑，槍子雖然phah入身軀，soah安然脫險，這是伊生命史siong值得記錄ê神蹟。