《寧毀不銹─馬偕e5故事》

 | | | 轉寄

siōng好ê餞別

作者 曹永洋 2009.05.10

有吳威廉牧師夫婦到台灣協助，馬偕會得thang安排第二pái 回鄉。

目chi̍t-nih 21年過去..a，當年27歲ê青年，如今已óa 50歲..a。馬偕chit-pái tńg來國內講解職務3-ê gín-á lóng出生..a，長女14歲，次女13歲，獨子11歲，lóng已經是真súi ê少女kap iân-tâu ê少年..a。kui家伙á 5人做伙行， chit-pái tòe伊回鄉行ê，iáu有日後成為馬偕kiáⁿ婿ê愛徒柯維思。

第2-pái例假回國chìn前，根據馬偕日記所記載，牛津學堂舉行ê送別會siōng，10位傳道師（全是馬偕培養出來ê門徒）、神學生、女學堂ê婦女學生、兒童lóng做伙，真m̄-kam來相送。

本地牧師、傳道人公推嚴清華牧師為代表，in用chi̍t百銀元beh為馬偕博士餞別，m̄-koh伊m̄肯接受，koh表白心願：「希望ē-tàng用chit-ê百銀元koh設立4所教會，án-ne就有60所禮拜堂..a。」

外僑團體iáu贈送馬偕1架性真好，ē-tàng觀察星辰ê望遠鏡，koh用正楷tī綢布頂頭寫1篇文筆kap情感lóng真好ê送別辭。內面提起經過馬偕21年tī台灣北部全心奉獻、宣揚福音，禮拜堂1間1間地建立起..來。比起馬偕初到台灣時所受ê排斥、辱罵、威脅，本地人對待傳道人ê態度已經有大大ê改變。

Tī馬偕ê目睭內，無論外國人、漢人、平埔族、熟番、南勢番、生番，當時伊所接觸ê任何chi̍t-ê族群，伊lóng無分高低，真心相待。伊ê人格、愛心散放出來ê燒熱力，真緊衝破藩籬，得tio̍h別人真心ê尊敬。

Chit-pái回鄉，馬偕mā因為tī台灣佈教開拓ê具體貢獻，tī 1894年6月hông選為加拿大長老總會議長，koh ài任滿1年，為tio̍h chit-ê原由，伊到第2年10月16日chiah tùi溫哥華港乘船tńg去台灣，全程費時chi̍t-koh月kòh工tńg到淡水。



馬偕留tī加拿大chit段期間，清廷kap日本為朝鮮問題，發生甲午戰爭，清廷戰輸了後簽下「馬關條約」，決定kā台灣、澎湖群島割hō͘日本。

清廷派李鴻章ê義子李經方，坐船經澎湖來到saⁿ貂角，tī「橫濱丸」號頂kap樺山資紀辦理移交手續，了後巡撫唐景嵌、總兵劉永福雖然日本tī 1895年 6月5日tùi澳底登陸mā做過lân-san ê抵抗，台灣終其尾淪陷，進入歷史siong 50年日本殖民地統治時代。

台灣11年前bat tùi中法戰爭脫險，真無簡單chiah擺脫法蘭西ê侵犯，如今siong其尾hō͘ siàu想台灣真久ê日本所占領，kám講歷史ê宿命，原本是台灣命定ê悲劇?

1895年11月19日馬偕tńg來台灣到淡水ê時chūn，伊發現教會損壞真嚴重，基督徒因為受tio̍h誣襪lóng受tio̍h各種迫害，隔tńg年為tio̍h這伊bat kap宋忠堅牧師（Rev. Duncan Ferguson）去見當時日本總督乃木將軍，乃木聽tio̍h允諾bōe koh有án-ne惡行發生。

根據郭和烈寫ê《偕數理牧師傳》考證，當時台灣教會已經有84所。馬偕日記追憶chit-pái會面bat講： 「乃木將軍言語無chē，用意誠懇，講話實在，風采hō͘我想起昔日kap劉 銘傳將軍ê接觸。」

第2年乃木總督mā-bat到淡水牛津學堂參觀，對校內馬偕不時tī內面工作ê博物室、陳列ê儀器、藏書、設備留..落..來深刻ê印象，離開了後mā差人來chia攝像存檔作參考之用，tùi chiah-ê細節會使看出，chit位名將mā m̄-nā是chi̍t-ê武夫niā-niā。

日本據台50年，共歷19任總督，chit位tī日俄戰爭成名ê乃木將軍，是台 灣第3代總督，任期1年saⁿ-koh月，乃木總督任內大多數不失英雄本色，m̄-koh mā無特殊貢獻。伊落任了後tńg去日本，明治天皇往生，伊竟然切腹殉主。

Siōng早tòe軍隊來台灣ê日本牧師細川瀏，看tio̍h日本士兵不法行為，無法度忍受心肝內ê憤慨，所以tio̍h由細川牧師擔任日本司令部kap台灣受害ê各教會之間ê橋梁，mā開始參加各教會ê禮拜。

Tī日本登陸台灣1年內，細川牧師m̄-nā做了調解人，協助彌補教會kap新統治者之間ê阻礙，伊向日本當局ê報告，mā間接提醒日本傳道局正視chit-ê問題。

1896年9月，日本本土基督徒人口無koân ê情況下，傳道局iáu派河合龜輔牧師來台向日人宣教。

Tī台灣ê日本基督徒，chi̍t開始tī馬偕借hō͘ in ê艋舺教堂，當做主日崇拜聚 會ê所在，甚至tī今á日ê漢中街、成都路lóng bat買厝kap起教堂，了後以西門町變成商業繁華，轉tī今á日ê中山南路3號，起已成做古蹟建築之i̍t ê「濟南教會」，

這mā是 日本人tī台灣起ê頭1間教堂。