《寧毀不銹─馬偕e5故事》

 | | | 轉寄

餘音仍繞樑

作者 曹永洋 2009.04.26

吳威廉博士（Dr. William Gauld 1861-1923），出世tī chi̍t-ê虔敬ê基督教家庭，20歲hit年，馬偕第it-pái tńg來國內tī加拿大各地證道演講，伊kap大兄聽tio̍h，非常感動。

Hit工下晡in koh去聽了chi̍t-pái。Tī tńg去厝--nih ê路siōng，少年ê吳威廉向長兄做了當年馬偕仝款熱情ê表白：「我將來it定會到異邦去宣教。」

伊決心認真讀冊，後來果然循tio̍h馬偕ê腳步，tī多倫多大學kap諾士神學院完成學業。1892年8月kap Miss Mararet Mellis結婚，仝年12月22日kap結婚無lōa-kú ê bó͘來到淡水。吳威廉牧師來台灣ê時chūn是31歲，mā是馬偕來台灣宣教20周年。

Chit時台灣北部教會大約有56所，教徒2千4百gōa人。看--起來草創時代ná已經告chi̍t段落，教會就beh進入建設kap組織ê時代，吳威廉牧師翁á-bó對馬偕來講，是chi̍t-ê重要ê幫手，mā是bē-tàng欠缺ê接班人。

因為吳威廉牧師本身是chi̍t-ê建築學家，伊tī台灣起真chē教堂、學校kap病院。

伊ê設計堅固、實用、大方。Tī伊ê手頭內底完成koh組織純正ê長老教會。1904年5月9日，伊聯合chē人向加拿大母會申請，允許tī台灣北部教會成立中會。仝年10月4日北部教會第i̍t屆長老中會成立，吳威廉牧師德高望重，當選做首屆中會議長。這kap日後台灣長老教會ê發展推動有密切ê關係。

伊進chi̍t步申請加拿大派遣有資格ê女宣教師來台灣，積極充實台灣ê婦女教育，koh請母會允準開辦中學，成立神學院預備科以提高神學院學生ê素質，希望培養從事傳道工作ê生力軍。

吳威廉意志堅強，做代誌有責任；伊做人古意，講話有信用，教會ê代誌，無論大細，絕對bē推辭，帳目雜務，it清jī楚。伊到台灣第jī年，馬偕博士chhōa全家做輪船第jī-pái回鄉。吳威廉牧師接替職務有3年。

Chit段期間，tú-tio̍h滿清kap日本甲午戰爭，滿清戰敗，日本佔領台灣。吳威廉牧師面對無穩定的ê局勢，以定tio̍h、穩健ê作風，領導學校kap教會度過重重ê難關。

吳牧師來台灣9年了後，馬偕蒙主恩召，伊接馬偕留--落來ê志業，為傳播福音，推廣教育kap醫療工作，tī艱苦ê階段做出具體ê貢獻，伊本人才藝真chē、見過世面，留--落來chē-chē ê成果，hō͘人來懷念。吳牧師63歲因為心臟病息勞主懷。

伊ê另gōa chi̍t半吳威廉牧師娘，mā是chi̍t位傑出ê女性。馬偕過身了後，台灣教會ê領導方式，chit時已經由外國宣教師獨當it面，轉型為外國宣教師kap本地教會領袖共同領導ê局面。

早期宣教師tī傳揚福音ê時chūn，mā對教育、醫療、文化、社會服務、婦女教育kap現代化出真chē力。吳牧師娘tī關鍵頂頭無疑扮演真重要ê角色。

伊本人tī鋼琴演奏方面真有才情，tī教會學堂教風琴、鋼琴kap聲樂。伊kā西方音樂引進台灣，特別tī教會音樂方面伊會使講是開拓者。

Tī伊細膩ê教導kap啟發，hō͘淡水cha-po kap cha-bó nn̄g ê學校定下真chāi ê音樂教育基礎，後來組織台灣第it-ê合唱團「淡水中學合唱團」，1926年修熱由陳清忠老師率團到日本、韓國巡迴演唱，優秀ê表現tī海內外lóng真出名。