《寧毀不銹─馬偕e5故事》

 | | | 轉寄

杏林春常暖

作者 曹永洋 2009.04.19

馬偕tī 1872年3月9日來到淡水，根據伊日記ê記載，當時台灣麻lá-lí-á 當流行，居民bē少因染tio̍h chit款病來死..去。

Chi̍t百jī-cha̍p gōa年前，台灣各地ê衛生環境普遍lóng iáu真差。it般民眾khiā家ê周圍lóng發真chē草，水溝á無通，sì界lóng làm土，báng-á真厚，所以傳染病sì界傳播。

伊免費用金雞納霜特效藥替患者治病，chit種藥á hō͘人叫做「馬偕ê白藥水」（氣味真苦，了後改做藥片）。Iáu有染tio̍h「腿膿瘡」（俗名臭腳黏）ê患者mā真chē。

馬偕由英國買牛奶色ê膏藥，kô͘ tī患者膿爛ê所在，效果真好。Hiah-ê khè藥膏ê甕á，直徑12吋，甕á口直徑5吋，甕á高1呎2吋。Hi̍t種藥á ùi倫敦Darin Brotters製藥公司買..e，部分ê藥甕á iáu保存tī今á日「偕醫館」內。

來台初期，伊用可能ùi多倫多kap紐約時代學ê醫療技術，tī台灣佈教ê仝年開始為患者治病。有ê病患甚至行5、6哩來滬尾就診，為tio̍h jú來jú chē ê病患，5月5日另gōa租chi̍t間厝當做醫館，叫「滬尾醫館」，地點tī今á日淡水三民街口。馬偕siōng早期tī厝內看病ê時chūn lóng是親自診斷，學生（包括信徒5人kap第it代門生）做助手。淡水英商5行ê Frmkyn醫生mā來鬥saⁿ-kāng。

租厝成做「滬尾醫館」了後，另外chi̍t位5洋行醫生林格（Dr. S. Ringer）mā來鬥saⁿ-kāng。
馬偕擔任伊診病時ê翻譯，mā hō͘學生有機會見習。林格醫生前來幫忙有7年hiah久。當時基隆mā有幾位gōa國醫生參與醫療工作。
無久馬偕向母會申請chi̍t位專職醫生。1875年1月29日加拿大派來第jī位宣教師，華雅各醫生（Rev. J. B. Fraser, M. D.）到淡水來協助。可惜2年後，華雅醫師ê bó͘來過身，華雅醫師只好chhōa 2個cha-bó͘-kiáⁿ tiām-tiām-á離開台灣tńg去加拿大。

1878年有1個葡萄牙人，因為破病來「醫館」求治，kúi工了後不幸死亡。林格醫生為tio̍h查出原因，就kā病人ê屍體剖開化驗，結果tī肺部發現指甲hiah大ê蟲，這是全世界第i̍t pái ùi人體內發現「肺姪蟲」，tī-chia chìn前，醫學界bat ùi動物體內發現「肺姪蟲」，m̄-koh人體內發現是頭一pái。因此tī醫學病例史頂頭mā是值得寫記錄ê代誌。

1879年3月馬偕買「滬尾醫館」東pêng ê土地，策劃起新醫館，tī林格醫生kap Maun醫生ê協助下tī 5月18日完工開業，koh tī 9月14日舉行新醫館開幕禮拜，由馬偕證道，眾朋友kap醫館內底ê助手lóng到場參加。

馬偕結婚了後ê第jī年（1879年12月26日），伊chhōa bó͘第it pái tǹg加拿大。長女偕媽連6個月大，第jī cha-bó-kiáⁿ、孤kiáⁿ chit時iáu未出世，算算leh這是伊tī台灣宣教7年了後難得回鄉的旅行。

離開台灣chìng前，伊kā當時北部22所教會，大概3百名信徒交代第3位宣教師閏虔益牧師kap 21位本地傳道師。

Chit段期間伊tī加拿大各地演講證道，mā bat去美國幾pái，伊去演講募款是為了ài tī台灣展開第2期ê宣教工作。

加拿大皇后大學趁伊chit-pái回國時，頒hō͘馬偕「神學博士」學位，藉tioh8an2-ne表揚伊teh海外宣教ê成就，了後世人lóng尊稱伊「馬偕博士」。

1880年底，美國底特律有chi̍t個婦人，為tio̍h紀念馬偕船長（Captain Mackay）捐出3千美金，協助馬偕tī台灣ê宣教工作。馬偕運用其中ê 2千5百kho͘美金，tī 1883年起「滬尾偕醫館」，簡稱「偕醫館」（Mackay Hospital）。

1884年8月6日，清廷為tio̍h越南問題kap法國開戰，俗稱「西á反」，本來tī安南局部性ê戰爭，演變為兩國全面性戰爭，交戰竟波kap台灣。

法國派出了兩支艦隊，分別由海軍少將李士卑斯kap中將孤拔領軍，停tī基隆、滬尾gōa海。法軍ê戰略，原本beh奪下台灣當做進攻福州ê跳板，進chi̍t步koh消滅清國海軍，nā是攻打台灣就選擇產煤豐富ê基隆做目標，台灣巡撫劉銘傳親身去前線督戰，法軍第it波攻擊bōe-tàng成功。

8月底法國海軍koh強烈攻打基隆，chit時滬尾戰況mā真危急，劉銘傳決定去援助滬尾。Chit時出現tī滬尾ê法國艦隊向岸頂開砲，民眾kap士兵傷亡bē少。



10月8日法軍登陸，雙方teh沙崙展開chi̍t場血戰，交戰ê結果，偕醫館真自然tio̍h成做清軍ê野戰病院。

為tio̍h搶救傷兵，馬偕動員學生kap街á頂ê市民，用門板當作擔架，扛來ê傷兵放滿醫館ê門口，路邊kap橋ê sì周。當時gōa國醫師約翰生kap戰時駐tī淡水港ê英艦「柯克哈特號」軍醫布羅恩等，mā熱心參與救治工作。

中法戰爭結束了後，治台七年，對台灣近代化貢獻突出 ê劉銘傳，10月19日派淡水防衛司令孫開華提督，親自到偕醫館向馬偕致謝，並以墨西哥銀萬jī賠償遭暴徒拆毀ê教堂，koh感謝in救治傷兵正義ê行為。

「偕醫館」親向chèng前講..e，是馬偕博士tī 1883年起好..e。建築費ê來源是美國底特律ê chi̍t名婦女，beh紀念死去ê翁婿馬偕船長捐獻..e。目前伊iáu koh tī淡水街á頂kap淡水禮拜堂離無jōa hn̄g。內面保存真chē馬偕當年使用過ê用品、醫療器材、相片kap其它珍貴資料hō͘人參觀。

講到目前tī台北市中山北路2段92號ê病院大樓，1956年4月18日，根據長老教會第9屆北大第123條款，議決確認做「馬偕紀念病院（Mackay Memorial Hospital），這chiah是紀念馬偕博士創建ê病院。伊經過拆掉kap重起ê蛻變，chiah有了今á日雄偉ê規模kap設備。
M̄-na án-ne，台北iáu有淡水竹圍分院kap台東馬偕紀念分院，馬偕遺澤台灣後代子民m̄是3、2句話ē-tàng講完..e。