《受恩蒙福的一生》

 | | | 轉寄

有名無實

作者 林宗要 2010.12.26

使徒行傳十九：11-20

「基督徒」chit-ê名稱是tùi安提阿開始，真可惜有恥笑ê意思，並無善意，但是後來ê基督跟隨ê人lóng歡喜用此名稱來使用tī基督門徒身上。一個人beh成做基督徒實在是無簡單，尤其tòa-tī台灣ê基督徒koh-khah ē-tàng體會beh達到基督所要求ê標準實在無簡單，因為tī台灣教會中，iáu存留真chē過去ê迷信kap習俗，比如符仔咒、風水、相命沖剋等不良ê習俗，譬如一位牧師ê cha-bó͘-kiáⁿ，是一助產士，tī庄腳時常幫人接生gín-á，但是對象大部分是教會以外ê人，mā就tiāⁿ-tiāⁿ會有一kóa kap世俗認同ê風俗習慣，比如bē-tàng動胎氣、床母等等作為。Tī某教會有一位執事，相信風水，聽信風水師了後，to̍h帶伊tńg去舊厝看風水，改變大門，家己ê套房，mā是因為沖到啥物，soah致使seng-lí bōe順，就全部拆掉重建，結果開了10～20萬kho͘（20年前）。Mā有真chē基督徒相信算命，chit類實例tī咱教會生活中mā四界通看tio̍h，有時是非初信者，或者是二、三代信徒，甚至是出tī傳道者ê家庭，chit種情形teh說明，過去ê傳統習俗、迷信ê風氣對人心ê影響非常大。當然tī án-ne傳統社會中ê基督徒難免mā會tú-tio̍h類似ê情形。

有時teh tú-tio̍h爭議性koân ê事件，koh再經過會外ê親成朋友討論，基督徒往往會動搖伊ê信心，特別teh辦喪事ê時，往往有一kóa無法度自主ê基督徒因為親成朋友ê聲音khah大來改變原則，做一kóa無合信仰ê作為，這是台灣ê庄腳教會tiāⁿ-tiāⁿ有ê狀況。當然chiah-ê問題，主要關鍵tī信徒ê信仰kap伊ê態度。一位完全了解基督教信仰ê信徒，伊會承擔一切，m̄驚外來ê壓力來貫徹真理。

反之，一個信仰m̄是講真堅強ê信徒，當伊處tī環境良好ê教會生活中ê時，bōe有問題，但是當伊處tī一般傳統習俗中ê時，tiāⁿ-tiāⁿ無法度把持信仰ê原則，因此會有無合基督教信仰ê行為出現，比如紅嬰仔ê收驚、搬厝ê時看ê時辰日期、嫁娶揀日子ê時等等lóng會發生tī基督徒身上！

一方面是信徒生活ê環境，用咱家ê狀況做例，親屬中遇任何tāi-chì，lóng會kap咱參詳，chit種環境中是絕對bōe有迷信ê習俗存在。

另外一方面，信者本身ê信仰型態mā是主因，因為伊ê心中所建立ê信仰，to̍h是伊處事ê原則，這to̍h是為何教會一直teh強調信徒建立正確堅定ê信仰ê原因！因為每一個基督徒lóng是耶穌基督ê精兵，精兵有作戰ê使命，是處tī關鍵ê時刻，責任重大，軍隊精良是決定戰事成敗ê原因，當然iáu必須整體ê配合，比如精神、使命、操練、武器、領導者，chiah-ê整體ê完備，是取勝要件，所以基督徒beh成做主所要求ê精兵，伊必須具備屬於基督應該有ê條件：整體性美好ê信仰，因為伊是決定基督徒信仰生活ê內容kap教會成敗ê原因。因為當所有信徒lóng是精兵ê時，咱ê教會一定會成做堅強ê教會（無一定是人chōe、錢chōe），當所有ê信徒lóng是老弱殘兵ê時，那有加ê時間做其他tāi-chì？自身難保，那有閒去傳福音？

所以基督徒一定ài名符其實。我真歡喜強調「像樣」（有款），基督徒一定ài有基督徒ê樣式。假使基督徒tī社會生活中、tī群體中表現出佛教徒ê款或者道教徒ê款，ài如何榮耀上帝？保羅講：「信徒是耶穌基督ê香氣」，tī社會上無法度hō͘人聞tio̍h屬於耶穌ê香氣ê時，he是基督徒siōng大ê悲哀，信徒beh做耶穌基督ê香氣，m̄是只tī禮拜堂中或者教會團契中而已，因為tī hia真簡單表現出來，重要ê是tī一般人中成做耶穌基督ê香氣，這siōng重要。

Beh表現有屬於基督ê香氣ê人，一定ài有信仰，信仰所發出ê生活to̍h是耶穌基督ê香氣ê siōng好見證，mā只有chit種生活ê見證，chiah ē-tàng益發流露伊ê香氣！

（一） 了解基督向信徒要求啥物？
基督徒必須了解，咱是藉tio̍h主ê寶血所贖回，是基督用koân價kā咱贖回，重生ê性命，bōe-sái koh再依存tī烏暗、垃圾中，聖潔ê人民是為tioh8beh榮耀上帝chiah存在。Beh說明基督向信徒所要求ê實在是siuⁿ-chē了，但是咱必須了解一件tāi-chì，to̍h是祂向咱要求ê kap一般人有所無仝：

1） 主tī該撒利亞腓立比ê境內，問門徒講：「人講我是siáng？」意思是耶穌ê學生以外ê人chiah-ê未信主ê人對耶穌ê觀點，in如何看耶穌？是聖人、偉人、先知或者有疼心ê人？Chiah-ê lóng無重要，主耶穌siōng關心ê是「Lín講，我是siáng？」這是主耶穌ê重點，一般人對主ê評語，對主ê心態，對主ê信仰lóng無重要，祂所關心ê是chiah-ê ta̍k工kap主耶穌共同生活ê學生，「Lín對我ê觀點kap信仰是啥物？」是m̄是kap一般人仝款看主耶穌是一位了不起ê聖者？彼得tī-chia代表學生發言、告白學生ê信仰，伊講「你是基督，是永生上帝ê kiáⁿ兒。」對這信仰告白，主耶穌真滿意chiah o-ló彼得ê信仰。

2） Tī約翰第六章中，主耶穌講「我是性命ê糧，人若食這糧就一定永遠活teh……」，當時群眾對主耶穌ê信仰有偏差，真chē人離棄了主，chit時，主對hiah-ê離伊去ê人無囥在心內，祂所關心ê to̍h是chiah-ê kap祂共同生活，屬於祂ê眾學生ê態度。「Lń kám mā beh去？」（約翰六章：67），眾人lóng離棄我，lín也tio̍h離棄我mah？這是主siōng關心ê問題，iáu好，彼得chit時chūn koh代表學生回答「主ah，你有永生之道，阮beh歸tùi siáng neh？阮已經信阿，koh知影你是神ê聖者」（約翰六：68、69），非常偉大ê二次信仰告白，tī-chia，咱thang看出彼得偉大ê信仰性格。

以上二位聖經kā咱講，耶穌基督kap咱ê關係是非常特殊、密切ê。現在咱koh再tùi聖經來思考，耶穌要求咱啥物？

A) 我是葡萄樹，lín是枝子（約翰十五）
Chit-ê比喻咱lóng了解，伊ê重心tī結果子是枝ê使命，beh完成chit-ê使命ê唯一條件to̍h是結果連tī樹身，「因為離了我，lín就bōe-sái作啥物」（約翰十五：5），這是teh kā咱講基督徒ê信仰生活siōng基本ê問題，to̍h是無時無刻ê kap主相結連。所以咱了解，主耶穌邀情咱ê to̍h是不斷kā祂結連，因為有所作為ê基督徒必定是結連tī主基督ê信仰，hiah-ê脫離主基督ê人絕對bē有所作為，bōe結果子！有成就、有作為、成功ê人生kám-m̄是你我所切切ǹg望ê？

B) 基督是身軀ê頭，信徒lóng是肢體
保羅用這說明耶穌基督kap教會ê關係，一方面指出教會ê頭是耶穌基督，教會ê基石是耶穌基督，這是咱ê信仰內容，基督徒to̍h是屬於基督ê chiah-ê互相聯結ê肢體，tī哥林多前書十二章，保羅用身軀無仝ê肢體來說明基督徒ê教會生活一定ài重視肢體性，所以tī咱教會生活中，真重視有相通bo̍h，互相合作，來發揮教會ê整體力量（有一kóa教會ê個體ê力量有發揮，但是欠缺教會ê整體力量）

C) 我是牧者，lín是羊群
約翰十：11～18，主是好牧人ê比喻，這mā是主向咱要求ê一項真理，祂知影人世間ê險惡，羊群若無tòe牧人，往往會發生極真大ê危險，所以主要求屬於祂ê人：1）聽牧者ê聲音，基督徒ê信仰生活所bē-tàng欠缺ê條件to̍h是不斷聽tio̍h主ê聲音。2）好好á跟隨牧者chiah ē-tàng保全性命ê安全，因為若tú-tio̍h兇惡ê敵人，伊軟弱無法度抵抗，但是只要有牧者tī邊á，就ē-tàng生活tī絕對ê安全中間。

各位ah！Chiah-ê是主耶穌時常要求tī伊ê信徒事實，咱必須ài用嚴肅ê心情去省思，咱ê信仰生活是m̄是符合主耶穌ê要求？

（二） 有名無實
咱已經講過，主向咱要求ê是beh信徒kap主有結連ê信仰生活，bē-tàng做一個有名無實ê人，主耶穌tī山頂寶訓結束ê時bat警告過信徒「只要稱呼我主ah，主ah ê人bōe-sái lóng進天國，只有遵行我天父旨意ê人chiah ē-tàng入去」（太七：21），練痟話ê信仰是無作用ê，信仰ài有實質內容，有行動chiah有價值。

主耶穌向信祂ê人所要求ê重點to̍h是真實有內容ê信仰，名符其實chiah是基督徒ê本質mā！Tī教會ê生活中，咱mā看過真chē有名無實質ê基督徒，而且差不多tī所有教會中lóng有chit種人，若講伊無信仰，但是soah有是受洗、登記做會員ê基督徒，若講有信仰，事實是除了受洗外，tī伊ê身上chhōe bē-tio̍h一點信仰ê氣味，主耶穌tī馬太廿三章，向當時ê法利賽人所責備ê to̍h是án-ne，in ê外表，無論tùi任何方面來看，lóng是標準ê信仰者，敬虔、熱情、宗教氣氛真厚，但是事實上，in只是外表做hō͘人看，信仰kap生活無做伙，所以主講in假冒偽善。當然in ê心靈無kap上帝契合，這是咱所了解ê。信仰ê內容，siōng重要ê to̍h是信仰者kap信仰ê對象一定ài有直接ê契合，mā to̍h是頭前所提起--ê，信徒kap耶穌基督ê實質關係，chit-ê關係若無建立，信仰者永遠得bē-tio̍h信仰ê能力，無信仰ê能力，自然就bōe產生信仰ê價值。

信仰ê價值，m̄是用這個名詞當做裝飾或者古董，是藉tio̍h伊，tùi信仰者身上發出信仰ê清芳！當然，beh發揮信仰ê功能，信仰ê本質一定ài有相當ê標準，若無就無作用，伊關鍵性ê問題，是在tī信仰ê實質內容，mā to̍h是基督徒kap耶穌基督心靈ê關係，比如頭前所提出ê問題：信徒必須kap基督有完全ê結合。1）聽從祂。2）tòe祂，chiah ē-tàng完成做基督徒ê使命。主耶穌向學生講「若有人beh tòe我，就當捨己，偝起伊ê十字架來tòe我。」（馬可八：34）Chit種認真phah拚ê生活方式，to̍h是基督徒ê信仰生活，因此，kap耶穌ê關係若無調整好，實在是無法度完成。

因此基督徒ê信仰生活，必須ài tī平常時，不斷kap主耶穌有良好ê關係，m̄是只有形式ê信仰，比如耶穌向法利賽人所講ê——假冒為善、無內容、有名無實ê信仰。台灣光復了後，有一kóa庄腳人tùi城內買水道頭tńg去厝，tī牆頂koân挖孔kā伊插入去，但是phah開水道頭soah無看tio̍h水，有人買電火chhu-á tńg來，因為無電，電火朱仔bōe發光，基督徒ê信仰內容必須ài kap耶穌基督建立良好ê關係，kap能力ê源頭有直接來往，運用ê時chiah有能力供應，而且源源不絕，基督徒kap上帝之間ê熱線建立是信仰ê切實性格，因為咱必須會記主耶穌所講：「因為離開我，lín就bōe-sái做啥物。」（約翰十五：5）

（三） 有名無實ê結果
Tī社會中，咱ē-tàng看tio̍h有一kóa有名無實ê人生，外表裝kah真有內容，內面soah是一無所有！無論任何狀況，chit種有名無實lóng是人生ê不利，信仰ê世界koh-khah是án-ne。

聖經使徒行傳十九：11～20有án-ne一段記載，hō͘咱了解人生中有一kóa驚人ê結局往往是tùi有名無實所造成。

A） 無能力
In ê作為是期待發揮能力，但是實質上in是無內容、自然無能力，因為人ê能力bōe-sái假，台灣話講「無毛雞假大格」！kan-ta有名，無實質內容是有名無實ê結局。人生生存ê重點tī能力ê持有，無論學問、經濟、khang-khè、生活、信仰，人一定ài盡全力來積聚人生ê能力，運用tī人生各方面，今á日咱一切ê phah拚作為，to̍h是the保存人生資源ê能力，因此必須成做名符其實ê人。

B） 受傷害
有名無實ê人，往往有誇耀ê作為，家己認為了不起，soah m̄知家己是siōng可憐ê人，tī人間社會中，有真chē chit種有名無實ê人，因為in ê作為，往往造成傷害家己ê結果。

C） 見笑ê收soah
通常抱chit種心態ê人，伊ê心中lóng抱有一種優越、成就、體面ê人生狀況，佮意誇耀伊所有ê一切（但是事實是無內容ê人生，膨風臭彈、誇口是chit種人ê心態），tī人生中，若有chit種心態ê時，往往會tú-tio̍h見笑ê下場，家己hō͘家己見笑ka名聲掃落底，tiāⁿ-tiāⁿ是有名無實ê結果。

D） 連累主ê名
用信仰ê立場看chit-ê tāi-chì ê時，咱就ē-tàng體會tio̍h chit款事實。有名無實ê基督徒tiāⁿ-tiāⁿ是hō͘主耶穌ê名受tio̍h侮辱，因為chit種人ê人生結局tiāⁿ-tiāⁿ是負面ê，是bōe-sái榮耀上帝ê人生，這kap基督徒存在ê目的無符合，因為基督徒ê存在to̍h是為tio̍h beh榮耀上帝，無榮耀上帝ê作為ê信徒，是主所無喜樂ê。

結論：了解人生ê結局目標是勝利ê人生，只有充實、有內容chiah ē-tàng成就人生ê勝利。勝利ê人生ē-tàng榮顯主名，hō͘主ê道大大興旺（使徒行傳十九：20），ē-tàng感動人（十九：18），ē-tàng去邪導正（十九：19）。