《受恩蒙福的一生》

 | | | 轉寄

曠野ê路

作者 林宗要 2010.12.19

使徒行傳八：1-8；26

慾望是性命ê原動力，根據心理學ê講法，人若ē-tàng適當滿足需求，對伊身心lóng會有正面ê作用，若tiāⁿ-tiāⁿ tú-tio̍h需求bōe-tàng滿足，往往會造成人生ê不幸kap悲哀。因為需求是人心中ê理想，chit種心中ê理想若ē-tàng得tio̍h滿足，對人生來講是一件非常重要ê tāi-chì。咱thang tùi細漢gín-á需求得tio̍h滿足ê hit種歡喜感受tio̍h伊歡喜ê心情。咱大概mā lóng有chit種經驗，tī細漢ê時父母或者親人hō͘咱一件心愛ê物件，hit種滿足感kap喜樂是真深刻ê，chit種感受tī人格ê形成中佔有非常重要ê份量。

真chē青少年期ê心身症，tiāⁿ-tiāⁿ是基於chit種需求不滿ê狀況來產生，有人是tī感情上，有人是tī學業ê過程中，chia有一ê實例：某某人有一個kiáⁿ，家境小康，對孤kiáⁿ期望非常koân，自細漢灌輸伊人生ê目標是博士或者醫生，因此ài讀一流ê高中，所以初中ê成績必須保持相當水準，chit種強大壓力下，chit位學生考tiâu台中一中，全家人非常歡喜，認為將來ê願望ē-tàng達成，但是chit位學生soah tī一年仔下學期出現狀況，轉學轉kúi-nā-pái，mā是無法度得tio̍h高中文憑，後來hō͘精神科醫生診斷出精神分裂症，一直用藥物控制，soah無法度過正常人ê生活。Chit種需求不滿所引起ê病態人生，tī咱ê社會中是真chiah看tio̍h ê tāi-chì。M̄-koh當咱細察人生ê時，咱就會了解，人是無法度完全滿足人生所有ê願望，這是殘酷現實人生ê內涵。「人無千日好，花無百日紅」，to̍h是teh說明人生ê現象。確實咱若用人生ê理想kap現實來kā伊省思ê時，就會了解，人心中ê理想tī現實ê人生中無一定會完成。當然有達成ê，mā有部分達成ê，有ê甚至全然破滅。Chit種完成jōa-chē ê程度是形成人生有滿足bo̍h ê主因。若完成siuⁿ少或者是完全無法度完成，造成人生真chē失敗，chit種失敗ê累積，會成做真大ê壓力，人若一直活tī壓力中間，早慢會出問題，心理學家以水壩做例來說明人生ê生活kap日常ê壓力，因為人所ē-tàng承受ê壓力有限，就像水壩siōng koân ê水位，超過伊ê限度，就會發生驚人ê危機。Tòa-tī北部ê人tiāⁿ-tiāⁿ經驗tio̍h石門水庫洩洪ê時刻，主因是水庫ê水位超過警戒線ê時就會有危險，因此需要調節水量，將部分ê水洩放來保持安全，這mā是近代化心理學者一直強調ê，人teh tú-tio̍h重大壓力ê時，一定ài有適度ê發洩，來維持身心ê健康狀態，這mā是現代學校設有輔導老師ê主因。現代青少年心理ê壓力非常沈重，照常理來講，求生是人ê本能，為何chiah-ê天真少年會有人想beh結束寶貴ê性命？最近就有kúi-nā件學生自殺事件：成大廿三歲電機系程姓學生跳樓，高雄海專工商美工科三年級蕭姓女生食安眠藥自殺，新營高中一年仔黃姓男生吊死，成德國中張姓女學生跳樓等，m̄管境況如何lóng teh說明，chiah-ê青少年ê壓力過分沈重，因此造成崩盤，若無是bōe去自殺。咱ē-tàng tùi chiah-ê事件中體會tio̍h，人ê環境kap生活上所產生ê壓力，對人生直接ê影響，這mā是現代父母必須加強關心ê重要事實，盡力hō͘ kiáⁿ兒生活tī khah舒適ê環境中，同時mā ài盡量減輕kiáⁿ兒teh學習中ê壓力。但是處tī台灣chit種現況中，咱ê青少年怎樣ē-tàng免受chiah nih重ê學業壓力？省教育廳公佈八十四年度學生意外事件死亡四四八人、傷者二八五四人，車禍、自殺、淹死、中毒、相phah、兇殺……等，五月份人數siōng chē，是學生ê危險期，可見面臨升學、就業ê壓力kap選擇，lóng會影響tio̍h情緒。Chiah-ê數字hō͘咱ē-tàng koh-khah了解現況，這是一件值得深思ê人生現象。用信仰ê角度來思考chit種人生現象ê時，咱mā會體會tio̍h chit種嚴肅ê真理。上帝ê恩典kap祂所疼ê子民同在！Chit種關係應該有正面ê意義，mā to̍h是上帝ê慈疼必定施hō͘ tī上帝所疼ê人身上，引chhōa in ê人生事事順利亨通蒙福，因為這mā是上帝ê應允。但是tī信仰ê路徑上上帝所祝福ê人生無一定事事亨通，萬事如意。確實，咱ē-tàng tùi教會史來體會chit種狀況，教會受迫害，基督徒性命tī水深火熱中，若用人ê觀點來看，或者無法度了解，為何上帝竟然hō͘祂所疼ê子民行tī曠野ê道路（出埃及時ê四十年曠野ê經歷）？親像當時ê使徒腓利，伊tī撒瑪利亞有相當做功ê表現，忽然受聖靈指示ài伊離開伊熟練有事業基礎ê環境，往迦薩之路！因為人人lóng真清楚，he是曠野ê路！對人生來講，包括心靈ê世界，曠野之路，是人生khah無歡喜ê所在，因為那內底無方便kap危險存在，伊mā是屬於人生負面ê現象。M̄-koh，基督徒必須了解，行chit種曠野之路，mā是基督徒信仰生活一件一定ài經過ê，是每一個基督徒lóng無法度避免ê信仰歷程，只要你用信心kap順服ê心態去行上帝ài咱行ê曠野之路，你就會發現上帝ài咱做ê事工，竟然tī-chia荒郊野外ê路徑上！Chit種信仰ê經歷，kap一般人ê想法是差不多ê。

（一） 腓利到撒瑪利亞城
聖經記載，當時ê教會受tio̍h相當大ê迫害，有第一位殉道者司提反，koh有真chē人hông關起來，本來chiah-ê門徒一直tī耶路撒冷，一方面in有好ê信仰經歷，有理想ê教會生活（使徒行傳二章後段），另外一方面in期待主koh再臨，beh解救所有ê基督徒。Tī教會生活中面臨án-ne嚴厲ê迫害，有時hō͘人無法度了解上帝ê旨意。相信tī基督徒ê現實生活中，mā tiāⁿ-tiāⁿ體會tio̍h用人ê觀點無法度了解上帝ê旨意ê事實。但是真chē年前長老會總會議長謝緯牧師（同時有醫學博士資格），teh赴彰化二林基督教病院途中發生車禍死亡，因為當伊teh發揮人生存在siōng有價值ê時，引起真chē人惋惜，mā因此tī教會中引起相當大ê關心kap討論：上帝ê旨意為何。親像初代教會tī耶路撒冷有非常理想、熱誠ê教會復興ê時，忽然間tú-tio̍h真驚人ê迫害！Kah-ná惡勢力beh消滅福音事工kap教會，m̄-koh tī教會生活中有時chit種撒旦破壞ê khang-khè會變成榮耀上帝ê機會，kah-ná水銀落地散各地，這to̍h是當時ê迫害顛倒形成了撒瑪利亞地區教會ê復興，因為teh迫害中腓利到撒瑪利亞地區傳道，建立了教會ê基礎，因為教會ê存在，致使撒瑪利亞城內大大ê歡喜（使徒行傳八：8），成做充滿喜樂，充滿希望ê城市。

教會受迫害，教會ê理想受阻礙chiah面臨困難，咱知影困難tiāⁿ-tiāⁿ是阻礙理想ê實現，這是人生ê實況，但是tī信仰ê過程中，經由信心ê效應會有超越正常人ê理想kap結果發生。Chit種teh患難中，經過信心所發生ê信仰行動，往往會tī困境中產生chiok大ê正面效果。Tī現實境況中時常有負面ê人生狀況（逆境、病痛、生活上ê壓力、家庭、事業等等ê bōe順chiông！），但是，有一kóa信徒soah ē-tàng tī án-ne人生狀況中，發出人生ê芬芳氣息，行tī hiah-ê人ê中間來榮耀上帝！當然，重要ê是tī-che種境況中，基督徒心中有一股極大ê動力kap支持！這to̍h是對主耶穌所有ê信心ê價值，mā to̍h是保羅所講：「我靠tio̍h那加hō͘我力量ê，凡事lóng ē-tàng做。」（腓立比書四：13），koh ē-tàng適應任何情況，這to̍h是歷代教會存在tī社會中ê實際情形，mā是基督徒信仰生活ê實際狀況！Teh變化多端ê現實生活中，基督徒若有謙卑ê心kap完全順服上帝ê生活，一定ē-tàng得tio̍h聖靈ê幫助去面對家己ê任何生活環境，因為一個人生活中有聖靈幫助ê時，伊ê人生必定會「化險為夷」hō͘苦境變做光明燦爛，因為有全能ê聖靈kap咱同在，人生就ē-tàng事事亨通，這to̍h是基督徒信仰生活。

（二） 成功ê腓利
當腓利tio̍h離開已經tòa慣習ê耶路撒冷到撒瑪利亞去，這實在是一件苦差事，tī當時撒瑪利亞是外邦之地，相信腓利內心一定有相當程度ê躊躇，這mā是人ê本性（我tú tùi神學院畢業ê時hông派到客庄ê新屋教會，內心mā有chit種感受！）M̄-koh，腓利tī-che境況中靠聖靈ê引chhōa，克服真chē障礙，to̍h是用正確ê心態去面對現實ê境況，tiāⁿ-tiāⁿ會得tio̍h美好ê結局。使徒行傳八：5-8描寫腓利宣講基督，眾人聽見koh看見腓利所行ê神蹟，就同心合意聽從伊ê話，hō͘撒瑪利亞全城充滿tio̍h喜樂，tī-chia咱看tio̍h腓利所傳耶穌基督ê福音對撒瑪利亞城有真大ê影響。

一個傳道人若受教會肯定，受會友歡迎，實在是hō͘人欣慰ê tāi-chì，大概tī咱ê教會生活中ài chhōe-tio̍h一位受全教會所肯定ê傳道人為數無chē，但是咱看聖經形容腓利帶hō͘ kui城ê人喜樂，koh同心合意聽伊ê話，單tùi-án-ni二句經文，咱就ē-tàng確定腓利tī撒瑪利亞ê傳道khang-khè是成功ê，為何伊有án-ne偉大ê表現，hō͘全城ê人大大歡喜？咱若詳細思考chit段聖經kap當時ê教會狀況ê時，咱就會了解原因是tī伊疼主ê心態，謙卑kap甘心順服主ê命令，這mā是信徒非常重要ê信心要件，聖經講，主要kap謙卑ê人同在，這是基督徒信仰生活ê重點。只要基督徒有chit種人生態度，無論伊ê生活ê現況如何，lóng會有美好ê結局。因為有主同在ê所在to̍h是天堂，這是教會生活中結出清芳ê果實，基督徒成做基督ê馨香之氣，相信咱ē-tàng tùi實際生活中去體會chit種信仰ê感受。

另外一方面咱看tio̍h hit時tī耶路撒冷ê使徒聽見撒瑪利亞城ê狀況，就差派當時教會ê大人物彼得kap約翰到撒瑪利亞，彼得kap約翰siōng大ê khang-khè是帶hō͘聖靈ê感動tī chit-ê城市，聖經描寫「因為聖靈iáu未臨到in一ê人身上，只有受洗歸tī主基督ê名而已」（使八：16），這mā是信仰生活ê一件重大ê學習，基督徒ê信仰必須ài追求聖靈ê充滿，m̄是只有tī外表ê形式；此外to̍h是彼得kap約翰出現了後，chit位hō͘撒瑪利亞城所歡迎ê人物－腓利就消失阿（使八：9-25），本來tī撒瑪利亞城傳道ê主角是腓利，但是現在soah換成彼得kap約翰，完全取代了腓利ê地位。Tī電影或者電視中咱tiāⁿ-tiāⁿ會看tio̍h安排主角ê問題所引起ê紛爭，chiah引起拒演等事件kap新聞，可見主角ê地位對人有相當大ê吸引力kap利益關係。腓利soah無因為角色hông取代chiah產生kap彼得、約翰有無爽快ê紛爭，mā無認為撒瑪利亞教會是伊一手建造，是伊苦心經營--ê，對彼得、約翰ê來到，伊無不平，mā無怨言，koh-khah無用心計較爭取伊ê權益。但是咱看現今有一kóa牧者自認為帶動教會有功soah無願意退休，想保tiâu家己ê權益。Tī-chia咱看出腓利有真完美ê信仰風度，形成ê主因tī伊心態純正，hō͘咱無法度mài去想tio̍h施洗約翰kap主耶穌ê情形，伊對主耶穌ê態度，永遠是用先鋒ê角色去面對。伊kap學生談論主耶穌ê時講「祂必興旺，我必衰微」。

（三） 曠野ê道路
當腓利tī siōng成功得意ê時，彼得kap約翰ê出現完全ê改變了伊ê現況，雖然伊無講咱mā thang想tio̍h伊ê艱苦，畢竟伊是一個平凡ê人，tī-che困難ê時，主ê使者對腓利講：「起來向南爿去到迦薩ê路去，he路是曠野」（使八：26），用撒瑪利亞kap曠野ê情景相比，he是真無仝ê環境，前者tī人生生活上是方便kap舒適，後者充滿tio̍h各種不安kap危險，是無適合人生活ê拋荒地。當時腓利無用家己ê想法去代替上帝ê指示，既然聖靈指示伊ài去行chit條曠野之路，mā是上帝ài伊行ê路，伊就順服，歡歡喜喜ê行chit條不便而且充滿危險ê人生道路。Chit件tāi-tsì咱mā ē-tàng tùi亞伯拉罕ê受召來看，信心ê老父ê人生是確立tī完全順服上帝ê命令。這mā是基督徒生活重要ê課題，ài生活tī上帝所喜樂ê世界，必須tio̍h用謙卑順服ê心聽從祂ê指示。尤其當時腓利ê狀況，tī伊面前ê撒瑪利亞城kap曠野之路，實在差異真大。何況人lóng是注重現實kap目chiu前ê利益，譬如：景氣無好ê時，有一對翁仔bó͘有一工得tio̍h三塊餅，非常歡喜，一人分一塊，koh tshun一塊，無分做二個，tùi án-ne約定siáng若先講話就buē-sái得tio̍h tsit塊餅，tú好賊仔走入去in-tau，翁仔bó͘二個人siáng lóng m̄願先喊掠賊，tio̍h án-ne損失慘重。照當時腓利tī撒瑪利亞城ê情景，伊捨去撒瑪利亞城suah去曠野，伊並無將心中ê疑問問天使，mā m̄知曠野有何事thang做？Tī hia ê時伊只有聽從聖靈ê指示，完全順服上帝ê使者，遵照上帝ê命令。雖然聽起來有一kóa無合理，拋荒地那有傳福音ê對象？To̍h親像上帝向亞伯拉罕要求獻以撒，伊心中充滿tio̍h真chē ê不解kap疑問，但是伊soah無kap上帝爭辯，只有完全得tio̍h順服，這to̍h是基督徒信仰ê態度。Tī信仰ê過程中，基督徒tiāⁿ-tiāⁿ mā會tú-tio̍h chit種景況，tī真舒適ê環境中，上帝忽然間ài咱行曠野之路，若用人ê心態去面對ê時會有真chē問題發生，就會有不滿、怨份、抗議、辯解等等ê情緒產生。但是基督徒若用信心做出發點去面對ê時，就會「Tī曠野之路了解神ê旨意」，上帝ê旨意若得tio̍h了解，he是基督徒信仰生活siōng大ê收成，to̍h是成功ê信仰。因為tsit時ê曠野對腓利來講已經m̄是曠野，是上帝ê榮耀顯現之地，因為上帝ê權能施行tī曠野，自然就m̄是曠野了，相信腓利tī曠野khang-khè ê結果，一定bōe輸tī撒瑪利亞城，比如聖詩249首中所講--ê，「願主伸你聖手，牽我做我保護…」。

結論：基督徒ài體會人生，無可能永遠生活tī舒適ê境況中，有時mā會聽tio̍h上帝ài咱去行曠野之路，過曠野ê生活。Tùi腓利ê信心去學習聽從主旨意ê生活內容，ē-tàng做到án-ne，tī曠野mā會開出結果，曠野就m̄是曠野啊。