《受恩蒙福的一生》

 | | | 轉寄

生存ê空隙

作者 林宗要 2010.11.07

路加福音十：38-42；雅歌一：6b

雅歌一：6b chit句話對咱現代人生是一句值得咱去省思ê一句話：「In叫我顧守葡萄園，但是我soah bōe-sái顧守我家己ê葡萄園。」（雅歌一：6b）M̄免解釋，咱mā ē-tàng體會出伊ê內容。

Chit句聖經確實有反映出現代人生生存ê現實ê問題。因為現代人根本bōe-tàng建立生存ê重點是啥物，無把握tio̍h人生生活ê重心何在。相信咱若用咱現實ê狀況，咱就ē-tàng發現tio̍h人ê生活是看近無看遠，對人生存在ê根本問題無顧，soah活teh「無閒」soah「無實在」中。Chit句聖經hō͘咱想tio̍h捨己耕人。Chit種無把握重心ê生活是造成人生社會中真chē混亂kap問題ê事實。

今á日台灣社會是án-ne混亂，伊ê成因是現代人ê生活，是失去了重心ê生活所造成。為何台灣社會ê poa̍h-kiáu hiah-ni̍h-á時行，過去ê愛國獎券、大家樂，chit-má ê六合彩、樂透，chit種背後所產生ê後果，tiāⁿ-tiāⁿ hō͘人生ê生活teh家破人亡ê邊緣。咱看tio̍h社會上有真chē 不法ê行為，lóng kap chit-ê賭性有關。Chē是人性ê m̄知輕重，失去把握人生重點ê生活內容所造成，mā to̍h是人所建立ê錯誤ê價值觀。想講簽一萬kho͘，簽tio̍h ê時有一百或者兩百萬ê收入，chit種觀念本身to̍h是無正常ê價值觀。Tùi chia chiah產生出真chē社會ê混亂kap不法ê行為，所以chit種結果是對人生社會有負面作用。

咱若思考雅歌一：6b chit句聖經，咱會發現tio̍h chit種情形實在是人生ê生存ê空隙。

「空隙」咱lóng會了解，伊是指tāi-chì hō͘人指責ê無完整處，有ná漏水ê孔。若是人生有空隙，伊m̄是人所ǹg望ê。因為每一個人生lóng期待tio̍h人生ê生存有完美、有理想。因為無空隙ê人生，開始ē-tàng有人生光輝ê內容。Ē-sái講是人生ê狀況tú親像雅歌一：6b所講ê，只顧別人soah疏忽了家己ê狀況。Chit種生存m̄是人性正常ê生存內容。雖然咱時常聽見助人是快樂之本，但是伊ê真意的確m̄是像chit句聖經所講--ê，乃是有家己ê立足點了後，你chiah去幫助人，án-ne chiah有快樂好講，bōe-sái將咱ê生存ê內容、kiáⁿ兒教育費等問題lóng投入教會，試想chit種生活的確m̄是上帝所喜愛ê生活內容。

Tī現代chit種工商業化ê社會，人確實真無閒，但是bē-tàng因為無閒來無閒，必須ài建立the無閒中有生活重心ê人生內容，chiah bōe造成咱生存ê空隙。幫助人或者照顧人是美德，但是bē-tàng因此soah影響tio̍h你ê家庭、事業，che chiah是真正有意義ê事實。確實tī chit種功利ê現實社會中，人生所無閒ê重心大部份是teh追求功利。為tio̍h這人生無暝無日soah bōe記了人生所追求ê真正ê內容是啥物。真罕得有時間停落來靜思kap反省，這to̍h是現代人tī連續ê假期中所產生ê真chē社會現象。因為人一直teh走chông，無時間thang恬恬á來思考人生koh-khah重要ê問題。（功利以外ê人生內容）

Shulberg ê小說 "What makes Summy run?"（什麼hō͘ Summy走chông kah hiah-ni̍h兇狂？）內容講tio̍h山美兇狂並m̄是為tio̍h啥物理想，「是走本身hō͘伊走」，因為伊相無閒teh走，所以無時間思考應該走toh位去，伊ê走是無目的ê走！Ná親像chit種情形，相信大家lóng可能有chit-ê現象。Tú親像雅歌一：6b內容仝款，這是人生ê悲哀kap不幸，mā to̍h是現代化所引起ê結果。
西洋有一句俗語講：「上帝創造鄉村，惡魔創造都市」。Chit句是teh表明鄉村kap都市tī人類性命史上ê影響。鄉村ê生活對人生有khah正常ê內容，比如空氣、民情ê純樸、罕得有犯罪ê情形。都市soah m̄是án-ne，交通亂、空氣bái、無人情味、充滿tio̍h各種罪惡，娛樂情色場所ê表現，「Kui暝到天光」是伊生活ê內容。Chit種所在tiāⁿ-tiāⁿ是罪惡ê溫床kap問題發生ê因由。（幾pái大火lóng發生tī色情場所）主因tī伊ê是無正常ê所在。日本一位學者，提出二大項說明鄉村kap都市ê差別：

A） 互相認bat是鄉村ê特色，kap都市完全無仝。差不多kui村lóng認bat，thang互相叫出名姓，所以有制約作用，所以khah無人敢去作歹代。都市to̍h m̄是án-ne啊，公寓ta̍k家m̄-bat招呼是真平常ê tāi-chì。（兇殺案死一禮拜iau m̄知動靜）譬如坐車，鄉村ê車互相交談，市內公車真少有交談，講無啥話。對話ê損失tiāⁿ-tiāⁿ湠生出真chē社會問題，橫直我kap你互相無熟悉，無驚惶ê心tio̍h無見笑ê心，造成犯罪ê事實。生存ê要訣teh對話ê成立。（基督徒kap上帝之間、夫妻間、親情間、朋友間、基督徒ê教會生活等）對話的確立是形成意志ê疏通，伊是解除人心中所有問題、誤會、隔閡、主觀意識等ê良好辦法，進一步koh形成感情ê結合，chiah會促進人生生存ê良好結果。

B） Kap自然結合mā是庄腳ê特色。都市ê文明是由鐵kap紅毛土來形成，庄腳lóng tùi土kap石頭kap草所結合--ê，頭前hit-ê是熱烘烘、燒滾滾，後者是溫柔kap青草樹á來組成。都市ê特色是熱鬧kap擾吵，鄉村用自然kap安靜，到九點了後無聽tio̍h別—的聲音，只有蟲teh叫ê聲音。

都市ê噪音tiāⁿ-tiāⁿ是遮蓋tiâu人聽tio̍h上帝ê聲音ê主因！聽bē-tio̍h主ê聲音是人生ê不幸kap悲哀。咱處tī無閒ê現實功利社會中ê基督徒，tī-chia必須ài謹慎，bē-tàng因為咱ê生存環境來遮蓋了、聽bē-tio̍h神ê聲音！若無人會迷失方向，伊ê人生生存就會有空隙ê出現，這是真驚人ê人生問題。

（一）「煩忙」ê現代人
處tī現實真無閒ê現代人生，咱必須時常省思咱人生生存ê空隙形成原因tī toh位？因為chit-ê問題ê理解kap把握，會幫助咱ê人生teh無閒中，尚ē-tàng把握tiâu人生存在ê真義。

因為咱每一個人ê生存lóng期待ē-tàng建立tī完美、理想、無缺陷ê人生狀況中，但是chit種人生生存ê完美ê理想，tī咱人生現實中無一定ē-tàng有百分之百ê實現，這是人生實實在在ê情形。

有時咱所期待ê人生現象，顛倒得bōe-tio̍h，所得tio̍h ê是咱所無意愛ê人生狀況。

Chit種心中ê理想kap現實ê互相衝突，to̍h是今á日咱人生ê問題kap不幸ê主因！

無閒本身並m̄是罪惡，但是若因為過份無閒soah引起真chē負面ê人生狀況ê時，就會造成人生生存ê真chē問題kap困擾，成為生存ê空隙ê時，你人生ê phah拼kap用功對你ê人生lóng bōe有正面ê意義。因為囥你人生ê果實ê器具有無底洞。日本童話北海道ê熊，tī河來掠魚ê身手是一流--ê，伊拾tio̍h一個籠á，真歡喜ê chah 去khǹg所掠tio̍h ê魚仔。可惜因為籠仔底破孔，伊所掠tio̍h ê魚仔lóng漏掉。伊自認為今á日真豐收，soah m̄知檢查ê結果，連一條mā無。

白做工，一切ê phah拼、成果落空，主因tī所chah ê工具破孔啊。這gín-á古teh教gín-á，bē-tàng生存teh有空隙ê世界，因為枉費人生ê一切phah拼kap作為！這是人生真大ê悲哀。

以前ê台灣tiāⁿ-tiāⁿ用查埔人娶到bē曉款厝ê婦人形容做破水桶，無論查埔人如何用功取水，但是因為水桶破孔無法度留，一切ê勞苦phah拼lóng是白了工！確實tī現實ê人生中有chit種情形ê發生，chit種人生，m̄管伊ê人生如何付出，但是結果lóng是空。

Tī-chia咱ē-tàng看出，主耶穌向當時當teh煩忙ê馬大所講ê話，是teh無閒中ê人生必須去體會ê一句話：「馬大ah馬大ah，你為tio̍h真chē事掛慮、混雜，但是所欠缺ê，只有一項而已」（路加十：41-42）失去了人生重心ê生存，tiāⁿ-tiāⁿ會造成人生真chē負面ê情況。

（二）迷失方向ê人生生存mā是現代人生ê一個真嚴ê問題。
雅歌一：6b所講ê chit句話，to̍h是teh說明chit種人生ê事實。到底chit-ê人ê人生方向（目的）tī-to̍h？伊ê人生ê意義是啥物？

確實tī人生生存現實中，有chit種行m̄-tio̍h路或者坐m̄-tio̍h車ê情形。Chit種人生實在是浪費kap損失ê人生。有一個故事：「行m̄-tio̍h方向」是chit種ê，中原人beh ùi楚國「（南方），hit人soah向北爿行，有人kā伊講方向m̄-tio̍h，楚國tī南方，你往北m̄-tio̍h，hit-ê人soah應講，無關係，我有一隻好馬thang勝任。Hit-ê人講，m̄管你ê馬jōa好，方向m̄-tio̍h會離目標jú行jú遠。伊講，無妨，伊有chah夠額ê旅費thang用。Hit-ê人講，無論你ê旅費有jōa-chē，往北的確無法度到楚國。伊回答講：…「無要緊，我ê馬夫本領好！」南轅北轍（戰國策）。各位啊，chit-ê故事teh kā咱講人生生存ê一個嚴肅問題，人生ê方向若têng-tâⁿ，無論人生有何等ê成就（科學、文明）mā是了然--ê！Siōng冤枉ê是浪費ê人生！主因teh迷失方向，因為方向ê têng-tâⁿ，m̄管你具備任何良好ê條件，lóng會hō͘空間jú遠離，離開你ê目的jú遠！

Ná親像車ê làng縫或者是機械ê làng縫bōe發生任何作用，迷失方向ê人生往往無法度有實在或者有意義ê人生ê果實。因為chit-ê人生生活ê一件重要ê問題，to̍h是你ê人生道路ê方向必須真正確！Bē-tàng有偏差ê人生方向，你ê phah拚走chông chiah有效果。

Chit點，基督徒必須確立真堅實ê人生觀，因為上帝已經提示咱chiah屬於伊ê人完全了解人生ê所有問題。基督徒應該了解上帝已經完全清楚將人生使命（人應該行ê方向）kā所有ê基督徒講。所以照理基督徒ê人生路途伊ê方向應該是清楚ê，假使tī基督徒ê人生道路上，伊ê方向若是迷失，是bōe-tàng迎請主耶穌tī伊ê人生中做伊ê導師所造成。只要基督徒ê人生有耶穌ê同在，to̍h是伊ê人生路上必定充滿tio̍h光明、美麗、燦爛--ê。因為，祂ê引chhōa是安全而且周到--ê，比如牧者kap羊群（詩篇23篇）kap像上帝tī曠野中帶領以色列人ê狀況，白日有雲柱，暗時有火柱，án-ne ê狀況必定bōe致使迷失。

人生ê方向若無迷失，就人生ê勞力kap走chông lóng會有成果出來。這to̍h是有方向ê人生ê結果。Chit種有方向ê人生生活，to̍h是主耶穌tī約翰福音15章所講--ê「結真chē果子」ê人生。這是人生期待ê完成，mā是人生生存所帶來ê祝福，是上帝teh信仰ê事實賜福hō͘信仰祂ê人ê現實！

（三）把握你ê人生
只要tī人生中ē-tàng把握方向ê實在，就m̄驚人生ê任何現實ê境況。

路加10：38-42 chit段聖經，通常人lóng會替馬大抱不平，因為伊實在為tio̍h耶穌kap學生付出了真chē可貴ê時間kap phah拼，但是soah顛倒hō͘耶穌所責難。為何耶穌tī-chia會特別告誡馬大neh？耶穌ê意思ài hō͘馬大了解，生活ê問題雖然重要，但是食m̄是人生ê全部，tī-chia祂kā伊講，馬利亞已經把握tio̍h人生生存ê重點，to̍h是上帝ê話，因為祂ê話是人生ê燈kap光。Tī現實困苦、烏暗ê人生現象中，伊比任何食物lóng khah有價值，伊會指引人生活tī光明安全ê路上！Tī人生ê路途上，若有光kap燈ê引chhōa，就m̄驚人生ê現實有jōa-ni̍h-á歹行坎坷，lóng ē-tàng安全行好勢。Chit種人生價值觀，是支使人生ê動力，tùi chia產生出人生ê結局是荒廢或者豐收。

保羅ê人生體驗thang是借鏡，tī哥林多書十一章有說明伊ê人生遭遇，但是為tio̍h福音，為tio̍h耶穌基督伊有把握tio̍h重點，並向此chiah盡力走chong4 ê路站，伊向提摩太說明伊已經盡一切phah拼去完成受託ê使命（提後四：7-8）tī-chia咱ē-tàng看出保羅對伊ê人生ê把握，雖然伊ê人生並m̄是一帆風順、百般順勢ê情景中，但是lóng ē-tàng完全把握ê人生內容。照伊ê體驗，無論好額散赤或者是歡樂悲哀中，伊lóng ē-tàng發揮伊ê人生生活siōng koân內容，咱若看保羅ê生活咱就會知影，伊歸主了後ê生涯是苦難不安ê日子，但是chiah soah無影響tio̍h ê生活內容，主因tī伊有完全把握tio̍h伊人生ê一切，mā to̍h是有充分ê信仰teh扶持tio̍h伊ê生涯。因為信仰會hō͘ in人生有明確ê人生方向，方向明哲ê人生，就bē致使迷失，就會成全伊人生ê理想。Tī-che過程中，信仰所負擔ê角色是bōe-sái疏忽--ê，mā to̍h是把握人生是經過信仰ê介入chiah完成ê。信仰會建立一個人生bē致使迷失方向，因為信仰ê主耶穌基督，永遠會引chhōa屬於祂ê人生活tī伊ê旨意中。

結論： 了解咱ê人生是受託ê人生（太25：14-30），善用咱有限ê智慧去成全伊。會記leh，咱人生ê工程必須經過驗收（林前3：12-15）「Chit-ê世界kap伊siōng ê情慾lóng tio̍h hō͘伊過去，只有若行上帝旨意ê是永遠常存」（約壹2：17）