《受恩蒙福的一生》

 | | | 轉寄

外貌kap實德

作者 林宗要 2010.10.31

馬可十一：12-14，20-21

主耶穌基督降世ê目的，是teh向人類推介上帝ê疼，hō͘ hiah-ê人koh-khah ē-tàng生活teh符合上帝所要求ê環境中。祂生長ê環境是tī以色列、加利利附近，因此，咱看祂ê khang-khè據點，mā ī加利利海hit爿，去猶太ê機會khah少。祂向世人傳福音，差不多lóng teh推介上帝ê疼。祂tiāⁿ-tiāⁿ用三種方式傳道：1)用言語教示 2)用比喻 3)行神蹟。咱若查看福音書就會koh-khah了解伊宣教時用教示kap比喻做主體，神蹟是tī伊ê khang-khè中，表現了祂ê「疼」kap「憐憫」ê另外一種方式，平時祂真少行神蹟。Tiāⁿ-tiāⁿ有一些法利賽人要求祂用神蹟來展現權能，但是lóng hō͘主耶穌拒絕。

有時tī必要ê時刻，祂mā歡喜用神蹟來表現祂ê愛心。所以神蹟teh主耶穌傳道ê生涯中mā tiāⁿ-tiāⁿ出現。主耶穌是beh向世人推介上帝ê疼，chit種上帝疼是beh用信仰chiah ē-tàng真實去體會。伊是屬於tī形之上--ê，但是人ê生存、觀念、思想，kap理解lóng tī形之下ê環境中，所以人有時對形之上ê問題了解，無一定真熱衷或者完全明瞭。譬如對一個出世就青盲ê人，你beh向伊紹介鋼琴、目鏡、或者phah字機ê時，kan-ta用嘴說明，恐驚真pháiⁿ hō͘伊認bat，若是用實物向伊ê說明，伊有可能會知影mā koh-khah清楚。Koh比如對gín-á解釋什麼是疼？Kan-nā口頭說明，gín-á有可能無法度理解，若用實際行動去解釋，表現tī gín-á ê身上，伊就ē-tàng體會什麼是疼。

基督徒ê信仰是tī形之上ê物件，若beh引起一般人ê贊聲或者認同，mā可能khah困難。M̄-koh基督徒若ē-tàng tī日常生活中表現出信仰ê果子（To̍h是tùi信仰產生ê聖靈果子）Tī現實社會中，其他ê人才有可能體會tio̍h基督徒信仰ê具體意義。這to̍h是咱教會一直teh強調ê信仰kap生活ài相仝。因為只有基督徒完美ê生活，chiah ē-tàng對信仰做出siōng好ê見證。

Tī教會生活中，siōng ē-tàng帶領人歸主ê，猶原是看基督徒是m̄是有完美ê生活內容。Hiah-ê tī生活中無法度見證福音ê基督徒真oh傳福音hō͘別人，原因是現代人愛看事實ê真相，看tio̍h好ê作為。Tī主耶穌ê傳道生涯中，祂用比喻kap行神蹟，是teh說明chit款事實。祂用chit種方式傳福音是由祂ê疼kap憐憫之心所產生--ê，chiah m̄是the誇口伊ê柄權。因此，神蹟是teh表現基督ê疼ê一種事實，因為祂是疼人ê主，同時祂mā是公義ê上帝。約翰福音二章主耶穌潔淨聖殿ê作為，馬太福音二十三章祂對法利賽人ê指責lóng完全表現出主耶穌公義ê屬性。咱看tio̍h chit段聖經文難免會想，chit種舉動內底toh位是溫柔、憐憫ê主耶穌ê作為neh？事實上，咱詳細kā伊思考主耶穌ê疼kap公義ê時，咱就會koh-khah清楚，這是自然流露ê現象。因為tī完全「疼」ê中間，若無「公義」ê存在，hit種疼是危險ê，mā是無完全--ê，這是現代父母教育kiáⁿ兒ê一種缺失。因為受tio̍h自由主義ê影響，父母教育kiáⁿ兒用自由做中心，項項tāi-chì lóng滿足kiáⁿ兒ê要求，chiah m̄管tāi-chì 是m̄是正確，kiáⁿ兒有求必應，bōe去考慮hō͘ in ê 是m̄是對ê問題。我bat看過一篇報導，作者講起現代ê父母欠缺hō͘ kiáⁿ兒維伊命N（to̍h是Vitamin No），kiáⁿ兒有求必應，當然m̄是歹代，但是ài看狀況。Chit種教育視欠缺「公義」ê疼。欠缺義ê疼，to̍h是無完全ê，有缺失ê，to̍h是所謂ê「théng-sēng」。

聖經馬可十一章12-14、20-21，若照字義來講，咱會發現耶穌基督tī-chia ê作為kap祂ê人格完全無符合，講真正ê主耶穌m̄是chit種人。聖經上講：「因為m̄是收無花果ê時chūn」，主耶穌做chit件事是tī逾越節chìn前，差不多tī四月時á，猶太人ê無花果通常tī五、六月chiah開始結果子。

聖經講：主耶穌iau，遠遠看見一欉無花果樹，生做非常茂盛，一定是結實纍纍，向前kā看，soah chhōe bē-tio̍h任何果實。若是照得bē-tio̍h to̍h報復ê心理，「M̄照我ê意思做，就hō͘你好看」，咱lóng知影，耶穌基督m̄是chit種人，祂絕對bōe做無理ê要求，mā bōe因為腹肚iau chhōe bē-tio̍h果實chiah kā伊咒懺，而且伊ê咒懺koh非常嚴厲，「從今以後，永遠無人食你ê果子」。Tùi字義看，主耶穌kah-ná真無風度，其實咱若tùi福音書中看主耶穌ê人格ê時，咱就thang了解m̄是án-ne，既然祂ê本意m̄是照冊頂面所講--ê，án-ne主耶穌tī-chia ê表現必定有祂教示ê重點。

（一） 無花果——猶太人ê標幟
Tī聖經內無花果kap葡萄是kap猶太人有密切ê關係。若翻看舊約聖經就會了解，敵人來攻phah猶太國ê時，同時mā會毀掉無花果樹，因為伊是猶太人ê主食。Tī猶太地區，四界lóng有無花果，有ê是野生--ê，有ê是人種--ê。人種--ê無花果，通常lóng受tio̍h khah妥當ê照顧。因此，伊ê成長，結ê果實lóng khah豐碩。野生ê，因為無人管理，自然條件khah差，但是mā是有結果實，ta̍k年六月到十月之間，是結果子ê時chūn，chit種無花果ē-tàng生食，mā ē-tàng曝干或者做成無花果餅，是猶太人相當重要ê植物之一。初熟ê無花果確實好食，（新屋教會mā有種無花果）。先知講：「一定親像夏令以前初熟ê無花果，看見chit-ê果ê就ài注意，一到手中就吞食了。」（以賽亞書廿八：4b），koh講「我心欣羨初熟ê無花果」（彌迦書七：1）。Tùi chiah-ê經節咱了解tio̍h無花果，是猶太人生活中所bē-tàng欠缺ê食物，無花果mā是in ê標幟。猶太人有豐收莫，通常lóng看hit年無花果ê收成ê chē少chiah準算，假使無花果ê收成m̄是真理想ê時，in ê生活to̍h陷入困境，可見無花果kap猶太人ê生活息息相關。

主耶穌tiāⁿ-tiāⁿ用無花果來教示學生，主耶穌tī-chia ê用意是無法度用文學ê觀點來理解--ê。咱thang看出主耶穌用猶太人生活上所bē-tàng欠缺ê無花果來教示學生，來提醒學生，hō͘ in了解kan-nā生滿宗教信仰ê葉仔，soah結bōe出公義ê果實，這to̍h是主耶穌所beh強調ê重點。法利賽人是hit時猶太人ê代表人物，chiah-ê人ê所作所為lóng kap主耶穌tī馬太福音廿三章講ê 仝款--仔仝款，in lóng是假影ê偽善者，信仰上若有chit種情形，he是墮落ê信仰，是比無信仰ê koh-khah悲哀。基督徒ê信仰，是經由信仰ê事實，引chhōa一個軟弱、無完全ê人去表現出khah符合信仰ê實質生活，chiah是真正ê信仰。Ná親像上帝特別揀猶太人仝款，ài in tī萬人中彰顯出主ê榮耀，這to̍h是猶太人hông選做上帝選民ê原因。M̄-koh in m̄-nā無達成上帝ê旨意，顛倒是傷tio̍h上帝ê心。因為當時in ê情況，tú親像主耶穌所咒懺ê hit叢無花果樹仝款，kan-nā有外表，soah結bōe出果子來，失去了伊存在ê價值。耶穌向學生講，lín是世間上ê啥物好處。這是耶穌看tio̍h當時ê法利賽人ê作為，有感所講ê破腹話，這mā是今á日教會必須正視ê課題。今á日咱ê信仰，到底是什麼款ê價值觀？是m̄是kap當時ê宗教氣氛仝款，只有美麗ê外表，soah無實質ê內涵？

（二） 只有外貌無實德
上帝kap猶太人ê關係，是因為猶太人kap上帝有契約關係，chiah成為上帝ê差使，ài in tī人間傳達上帝ê旨意，這是上帝對in ê要求。猶太人ê存在，就是beh彰顯上帝ê榮耀，ài有嚴謹ê信仰生活內容。Ē-sái講是tī主耶穌時代，chiah-ê猶太人已經失去了上帝所要求--ê，當做選民應該有ê條件。當時siōng ē-tàng代表猶太人ê to̍h是法利賽人kap文士，chiah-ê人siōng受耶穌ê指責kap批評。Tùi馬太廿三章thang看出，chiah-ê人生活墮落，假仙偽善，有名無實，只有宗教上ê形式，chiah無信仰所應該有ê真誠、公義kap憐憫。Chit種kan-nā有外表ê信仰是人所討厭--ê。主耶穌藉tio̍h這欉只有茂盛ê外表，soah長bōe出果子ê無花果來教示學生，hō͘學生了解基督徒ê存在，ài tī現實生活中榮耀上帝。約翰十七章15~18 án-ne講：「我bōe求你叫in離開世界，只求你保守in脫離那惡者，……你án怎差我到世上，我mā仝款差in到世上。」

Tùi主耶穌ê祈禱中，咱真清楚ê了解，主耶穌期待基督徒ê生活，m̄是脫離世界，是beh tī世界做光kap鹽，chiah是真正有價值ê基督徒。同時基督徒也tio̍h了解，現實世界充滿真chē痛苦kap不幸，基督徒bōe-sái逃避，ài面對現實，實際深入chit-ê現實環境，去發揮基督徒應該ài有ê特質。

基督徒若bōe-sái tī生活中結果子，án-ne存在ê價值，是值得hō͘人去思考ê。Chit種bōe結果子ê人生，耶穌用無花果樹ê比喻來說明。

基督徒m̄是只tùi教會生活中向上帝申請一張信徒牌照：基督徒是beh teh受託ê人生中結koh-khah chē ê果實，有結一百倍--ê、六十倍--ê、三十倍--ê。若親像聖經所講--ê hit叢無花果樹，只有茂盛ê葉á，chiah無結實ê內容，最後會hō͘主耶穌所棄絕。只有外貌chiah無實德ê信仰，m̄是主所喜樂ê信仰模式。主形容chit種信仰是粉白ê墓，「外表美麗，內面soah是臭骨骸」，是hiah-ê人所討厭--ê。舉例來講：蘇格蘭有一位長老，外表看起來非常熱心，聚會從來m̄-bat無到，無論服事或者捐獻，lóng bōe輸人，但是行為不正，tiāⁿ-tiāⁿ kap人發生衝突，是爭端ê根源。有一kang，伊向牧師講，伊beh去遊聖地，爬西乃山。當伊爬上西乃山ê時，伊beh大聲叫，「感謝上帝賞賜十誡。」牧師共伊講；「你ē-tàng做一件比去聖地koh-khah有意義e5tai7-chì，留tī chit-ê所在實行主訓，力行十誡」。這是諷刺信徒信仰ê例，to̍h親像中國ê俗語講：「自欺欺人ê偽善者」，kan-ta有外貌soah無實德ê信仰，to̍h是chit種人。Chit種信仰是無路用--ê。「你tio̍h作行道者，mài kan-nā聽道，家己欺騙家己。」（雅各一：22）。基督徒應該了解，到底信仰生活是啥物？伊是teh印證主耶穌基督ê福音，chiah m̄是喊口號，siōng重要ê是tī現實生活中用實際ê信仰、行動去印證福音ê價值。用基督徒siōng實在ê言行舉止去見證主耶穌ê福音。Mā to̍h是保羅所強調--ê「Lín是基督ê香味」發出清芳ê味。福音siōng好ê見證方式，是用美好ê行為去見證，只有實際ê行為，chiah ē-tàng hō͘人感動，因為行動是siōng有能力去感動人--ê。

（三） 審判是tùi上帝ê厝開始
Chit句話ê意思是講基督徒ài先受上帝ê審判，基督徒kap上帝ê關係khah特殊，無論tī恩典、權利、使命、義務等方面，上帝對基督徒ê要求lóng kap一般人無仝。因為基督徒ê存在ná親像主耶穌所講ê hit叢受tio̍h特別照顧ê無花果樹，照理伊應該結真chē果實，對園主有利。這to̍h是基督徒存在siōng重要ê內容。

Tùi馬太福音廿五章恩賜ê比喻中，mā thang看出上帝對人類ê期待，tī-chia有詳細ê說明：基督徒ê人生是受託ê人生，無論領五千、二千或者一千，最後mā是beh生利息，to̍h算是真細ê數目，主人lóng bōe棄嫌。無視恩賜無生息ê僕人，是無受主人肯定--ê。用年利率6.7％來計算，一千kho͘囥兩年，利息只不過小小一百gōa kho͘而已，無法度kap二千kho͘或者五千kho͘相比。但是主人要求受託ê人一定要忠心。這mā是上帝ài咱每一個人lóng ē-tàng有實績ê表現，chit種tī上帝面前ê實績，是決定基督徒存在ê價值。咱知影，聖經向咱要求ê真理是：「上帝beh照你ê行為來審判你」（以西結七：3,8）（彼得前書一：17），基督徒ê人生，必須ài有chit種認同。咱ê存在，是不斷khiā-tī上帝ê審判chìn前ê存在，mā to̍h是面對上帝審判ê人生生活。Chit種生活要求咱ài謹慎、自愛，同時koh-khah ài積極ê態度去展現人生ê實績tī審判者主耶穌ê面前，chiah-ê實績to̍h是謹慎、自愛、積極ê生活方式。基督徒ê人生必須是會結真chē果子ê人生。因為這是主ê命令，主耶穌tī約翰十五章講：「Tòa-tī我內面ê就加結果子，因為離開我，lín就/bōe-sái做什麼」（約翰十五：5）koh講「Lín加結果子，我老父就因此得tio̍h榮耀」（約翰十五：8），這是teh說明基督徒ê存在，必須ài有實績表現，mā to̍h是tī日常生活中，hō͘上帝有所收成。咱ê人生是tī chit種嚴肅ê上帝面前ê生活。彼得講：審判是tùi上帝ê厝開始，這說明了咱基督徒ê行為，是bōe-sái隨便chhìn-chhái ê，咱ê一舉一動lóng hō͘上帝看kah清清楚楚，chit種嚴謹ê生活方式to̍h是結果子ê人生。

咱ê存在就是beh榮耀上帝，伊是確立tī果子ê chē少，當一個基督徒有chit種共識ê時，伊會真坦然來面對上帝ê審判。信仰生活ê建立是基督徒信仰生活siōng偉大ê表現，m̄-nā是外表好看而已，koh ài有充實ê人生，表現出有價值ê人生實績，chit種人生實績是榮耀上帝siōng好ê禮物。舉一個實例：1995年10月，有三位女性基督徒共同生活，in看tio̍h世上一kóa 不法ê罪行來自責，用苦行約束家己ê方式贖罪，六年了後chiah hō͘家人發現，其中一人已經禁食過身。另外，台中有一位信徒，苦勸伊拜佛ê太太信主，無hō͘伊接納，所以用自殺來結束人生。Chiah-ê人ê死，動機lóng出自對信仰kap福音ê堅持，但是方法m̄-tio̍h，這是頇顢ê行為，bōe-sái榮耀上帝。

基督徒ê人生，必須建立teh用榮耀上帝為前提ê生活內容，這是咱phah拼ê方向kap目標。

結論： 藉tio̍h主耶穌對無花果樹ê比喻，咱基督徒一定ài認清信仰生活ê價值tī toh位，teh重視外表ê現實社會中，基督徒ài成做名符其實，榮耀主名ê真實信徒。