《草地囝仔做牧師》

 | | | 轉寄

群體動力

作者 林宗要 2010.10.31

馬可福音二章1～12節

咱tiāⁿ-tiāⁿ聽人講：「人生kah-ná teh poaⁿ戲」確實是án-ne，tī一齣戲中有各種無仝ê角色，各人演各人ê角色，有人演主角，有人演配角，有ê只是chiok細ê角色，雖然演ê角色無仝，soah lóng ài盡siōng大ê phah拼，án-ne人生chiah會有價值、有內容。M̄-koh人tī現實生活中，tiāⁿ-tiāⁿ怨嘆家己為啥bōe-sái演主角？是toh位輸--人？仝款是父母生ê，仝款受教育，仝款ê 工作機會，別人hiah-ni̍h有成就，為何家己是hiah-ni̍h仔卑微？當人有chit種無健全ê心態出現ê時，hit-ê人一定無法度扮好伊ê角色。因為伊ê人生一直teh kap別人比較，俗語講：「人比人，氣死人」，人生是bē-tàng用kap人比較來衡量伊ê價值--ê，若無就會活teh怨天怨地怨自己ê日子中，造成人生ê消極kap 不利，án-ne m̄-nā生活不如意，甚至無可能完成人生應該ài負ê責任，發揮伊ê特質，soah造成損失kap thó- chè ê人生現象。Chit種人生觀m̄是基督徒應該有--ê，基督徒必須ài了解，上帝照人ê才能hō͘ in無仝ê角色，只要有盡力完成應該有ê責任，tī上帝ê面前，你ê人生就會受tio̍h肯定。基督徒ê人生必須先建立tī chit-ê正確ê觀念上，chiah ē-tàng用喜樂，負責ê心態去面對上帝所交託ê人生。當一個人有正確ê人生觀ê時，伊就bōe kap用人比較來評價家己，án-ne mā chiah ē-tàng用伊所有ê能力去營造人生，成就一個有作為koh豐收ê性命，雖然無一定會成做總統或者其他重要職務，但是至少會有好ê表現，只要盡忠職守，就會有好ê人生結果。主耶穌tī馬太福音二十五章14～30節中ê比喻，有五千ê僕人koh thàn五千，有二千ê mā koh thàn二千，主人hō͘ in ê評語lóng是仝款——良善koh忠心ê僕人，但是人雖然有高尚ê職位，卻對職位不忠，iáu會hông棄絕，咱thang tùi歷史發現chit-ê真理，歷史是人生成敗siōng好ê註解，當咱思考tio̍h chit種情形ê時，就必須用嚴謹ê心態去面對家己ê人生。

Tī人生中，有時扮ê角色並m̄是家己所願意ê，是社會替咱決定--ê，譬如：男女結婚，雖然是當事人ê意願，但是婚了後ài完成夫、妻、老父、老母ê角色，人必須ài用完全負責ê態度去完成。一個完美ê人生應該是扮好所有ài扮ê角色，án-ne就會受tio̍h社會肯定，hō͘人看做成功ê人，因此咱ē-tàng了解正常ê人生to̍h是扮好家己ê人生角色，但是咱必須了解一件tāi-chì to̍h是正常ê定義是指tī社會規範以內來講。

人teh社會行踏，時空tiāⁿ-tiāⁿ會有變化，一千年、二百年、五十年前ê社會kap現代ê社會一定會有所差別，仝一個時空之間ê差別tī社會性頂koân mā有變遷，譬如：外國人當街相唚，tī台灣可能是妨害風化；細漢時庄腳婦女人m̄穿衫，但是若tī都市可能to̍h bōe通；美國家庭父母kap少年hit輩tòa作伙須要分擔tòa kap食ê開銷，tī台灣必定會hông看做忤逆不孝。因此，社會規範mā m̄是絕對--ê，tī台灣ē-tàng ê，tī外國有時可能bōe-tàng。咱見面ê時歡喜大聲吵鬧認為chē是熱情，tī美國soah會hō͘厝邊隔壁通知警察來警告、開單。聚會中若有臨時到ê人客，咱會講「什麼風kā你吹--來！」外國人soah kā伊看做真無禮貌ê行為。

因此咱必須了解咱ê正常性是用咱ê社會做標準，m̄是外國ê標準。只要你ê人生完成你tī現實境況中ê一切，你to̍h是一位正常ê人生。

一、 無正常ê人生
今á日咱tùi chit段聖經來思考伊ê教導，咱已經tī頂面大約說明人生ê正常性kap社會現實面ê關係。基督徒是活tī chit種正常ê人生中比別人koh-khah正常ê人，因為基督徒ê雙重身分，一方面ài tī社會ê規範中運作生活，演好家己ê人生角色；當做一個學生、一個工人、一個老師、或者公務員、生意人、事業家、主婦，事先ài好好--á扮好家己所負擔ê角色，然後tī屬靈ê工夫上，chiah有可能承擔一切屬於你範圍內ê屬靈事工！屬靈ê正常性是tī正常ê現實人生培養出來--ê。Mā to̍h是講，人若是bōe-sái盡家己ê本分，自然無法度完成屬靈應該有ê本分。這to̍h是約翰所講：「無愛伊看ê tio̍h兄弟，就bōe愛看袂著ê上帝！」Chit種信仰ê理解是基督徒人生siōng重要ê khang-khè——To̍h是實實知知了解正常性tī基督徒人生所佔ê位置。今á日咱看tio̍h chit位主角是一位ài四ê人來扛ê半遂病人，是半身不遂、四肢麻痺ê人，伊一切ê生活，lóng必須óa靠別人ê幫助，tùi人生ê立場來講，伊是一位無正常ê人，chit種生理上有欠點ê人生社會上tiāⁿ-tiāⁿ無法度kap正常人競爭，雖然社會上mā有一kóa 人雖然有缺陷，soah有了不起ê表現，但是大部分ê人lóng無法度kap正常ê人競爭，這是事實。

Chit種無正常ê人生會成做別人ê負擔，tī人生現象中是無理想--ê。人大漢了後就beh過ē-tàng獨立自主ê生活，若是iáu須別人輔助chiah ē-tàng過日子，m̄-nā會成做別人ê負擔，有時koh會卸世眾。理想ê人生是表現tī充實良好ê生活品質上，因此正常ê人生須時常小心避免表現出伊ê歹看hit一面，盡力達tio̍h人生ê完美。但是一個無法度自主ê人，有時難免會有缺失、漏氣、見笑ê狀況，chiah-ê是人所無願意見tio̍h ê現象，理想ê人生就是beh去除chiah-ê現象，無正常ê人生就無可能有chit種能力啊。喪失希望mā是chit種無正常人生ê心態之一，tī社會中就發生bē少chit種悲哀事件。確實，人若像chit位癱瘓者，伊ê人生是絕望殘敗--ê，無法度完成伊應該有ê人生角色是gōa ni̍h á使人同情，一般人lóng會盡量想辦法改變chit種絕望無奈ê困境。

二、 藉羣體動力來恢復人生ê正常性
Chit位可憐ê半遂者長年因為病疼倒tī眠床頂，無法度化解伊ê絕望kap悲哀。雖然伊人生ê境況是hiah-ni̍h-á不利，但是伊ê求生意志是人類共有--ê，伊可能聽tio̍h主耶穌所行ê神蹟kap救恩，但是因為無法度行動，mā只有聽人講ê份，佳哉伊有四位朋友向伊伸出援手，決定用in ê力量，幫助chit位不幸ê人，chit種力量to̍h是群體動力。群體動力必須由合一ê精神完成一致ê行動，bōe-sái有異心kap自私ê表現，雖然是四個人，但是必須成做一體，有完全ê行動配合，chiah ē-tàng完成使命。Chiah-ê人有心beh幫助朋友克服困難，m̄-koh in ê心意soah hông群眾阻擋，無法度扛病人來親近耶穌。Chit種現象有時mā會發生tī咱ê人生中，有時咱有一kóa理想kap美好ê異象，會hō͘現實狀況所阻隔，尤其teh屬靈ê事工上特別是án-ne。「因為人chōe bē-tàng近前」，若無法度到主耶穌面前，in ê目的就無法度達成。目的雖然hō͘群眾阻擋，難能可貴--ê是這四位朋友無因為阻礙放棄，chit種決定ê心志是完成人生目的ê主要動力。

Tī信仰ê世界，基督徒ài有chit種信心，tī屬靈ê tāi-chì 頂koân chiah有所利益。最後in ê辦法to̍h是「K ā厝頂拆掉」，chit-ê動作有可能有一kóa暴力，無合常理，但是soah ē-tàng看出in ê勇氣、決心kap絕對ê信心，che是完成人生目的bē-tàng欠ê要素。

基督徒ê人生必須自覺，因為tī人生境況中會不斷有阻礙存在tī上帝kap咱之間。若當時hit四人灰心，失去勇氣kap決心，就無法度突破困境完成使命，一定ài克服困境，chiah ē-tàng聽tio̍h主ê聲音，進一步完成目的。Tī人生ê旅程中，咱時常經歷chit種經驗，尤其是tī屬靈ê領域kap主耶穌ê關係上，當一個基督徒看khah遠ê眼光，有理想ê屬靈心態ê時，tiāⁿ-tiāⁿ因為生活中有siuⁿ-chē ê阻礙chiah無法度完成。Tú親像當時chit位半遂ê人hō͘四位好友扛來beh親近耶穌，但是人chē kā in擋tio̍h阿，因此用拆厝頂ê舉動解決。看起來好親像是粗魯無禮、無規矩ê行為，但是事實上咱soah tī chit件tāi-chì頂面看tio̍h in無比ê熱情kap信心，是真切實在ê信仰行動。Chit種心態kap行動，to̍h是咱教會siōng急siōng需要--ê，因為教會ê存在，是不斷帶領人親近上帝，接受上帝ê應允，ē-sái講是tī現實ê教會生活中一直存在真chē ê阻礙阻隔咱kap主耶穌之間ê正常關係，這是基督徒信仰生活需要深思ê問題。

三、 拯救ê完成
Chiah-ê人因為kā厝頂拆掉chiah完成心願，to̍h是為tio̍h ē-tàng hō͘所扛來ê不幸ê病人ē-sái khǹg tī主耶穌ê腳前，另gōa一方面，主耶穌mā深知in ê用心，主耶穌因為in ê信心醫治了chit位不幸ê人。Chit種群體動力，to̍h是hō͘ chit位不幸ê病人終其尾ē-tàng到主耶穌面前ê siōng大原因，不幸kap悲哀只要到主耶穌面前，就lóng會得tio̍h解決。今á日咱tùi chit件tāi-chì ē-tàng看出，in所付出ê心血得tio̍h回報，群體動力ê結果是得tio̍h主耶穌ê醫治，chit-ê過程mā to̍h是教會存在siōng真切ê內容，tī-chia咱ē-tàng看tio̍h拯救ê完成所必須付出ê過程是刻苦、犧牲、合作、甚至冒險，咱看chiah-ê人，in beh扛chit位行動不便ê病人到主耶穌面前，確實經過真chē困難，過分舒適ê教會生活是無好ê效果ê，因為教會生活是背十字架ê生活，所以基督徒有時生活tī/真chē患難中mā是ē-tàng理解--ê。日本ê賀川豐彥用上帝ê疼tī當時ê散赤人tòa ê所在內做工，經歷真chē人間ê苦難，hō͘流氓欺負、攻擊是tiāⁿ-tiāⁿ有ê tāi-chì，但是伊甘願承受，因為伊感受tio̍h無經過揹十字架ê過程是無法度完成上帝所託付ê事工。當然一個人ài有chit種心態，必須有koân度ê刻苦、犧牲ê自覺，同時咱mā知影chit款事工m̄是憑家己ê力量ē-tàng完成--ê，是ài靠群體ê動力，teh ê群體生活中，所要求ê to̍h是坐仝一隻船ê精神，比如保羅tī哥林多前書十二章中強調教會ê功能，咱ê教會存在tī世上，siōng大ê目的to̍h是teh發揮教會ê功能，因此建立愛ê共同體ê教會生活是教會siōng迫切需要ê，可惜ê是教會tiāⁿ-tiāⁿ有無仝心、無合作ê情況，hō͘主傷心。

Teh教會生活中，因為信仰本身to̍h是冒險，為tio̍h beh解決chit位半身不遂ê朋友，che四個人必須ài冒險去拆厝ê厝頂，（佳哉古早時ê建築無鋼筋混凝土），chit種舉動本身to̍h是冒險ê行為。Tī-chia咱mā ē-tàng發覺tio̍h今á日教會ê存在，有時mā 需要去冒險chiah ē-tàng完成主交託ê使命，譬如公元二千年福音運動ê宣教計畫，to̍h是一種冒險ê事實。為tio̍h救chit位絕望ê朋友，無顧一切，雖然是冒險也tio̍h完成。

結論：做一位符合上帝旨意ê基督徒，關心教會。今á日教會ê任務，beh領chhōa人到主ê面前，發揮群體動力去完成主所託付ê使命。