《草地囝仔做牧師》

 | | | 轉寄

現實kap信仰

作者 林宗要 2010.10.24

馬太福音六章25～34節

Tī現實生活中，每一個人lóng會體驗tio̍h真chē無願意tú-tio̍h ê人生問題，chiah-ê問題對咱lóng有負面ê影響，譬如患難、痛苦、不幸、悲哀等等，比如聖詩三二二首「khiā世界各項大欠，koh-khah好ê好事mā有烏點」，實在是針對咱現實狀況siōng真實ê描寫。若看咱生存ê現象，就ē-tàng明白無論任何人，加減lóng有伊ê人生問題kap困擾，用台灣ê現實來講，hiah-ê有權ê大官或者家道豐富ê好額人，伊ê人生狀況mā有hō͘ in困擾ê tāi-chì，「Koh-khah好ê好事mā有烏點」，是值得咱去思考--ê。所謂ê「好事」是指hō͘人看做理想、完美、幸福kap有價值ê狀況，但是tī人生中，chiah-ê大好事，確實mā有「烏點」。烏點是什麼？是kap大好事倒反ê，伊是人生中ê缺憾、問題、患難、不幸等等負面ê現象，chit種有烏點ê人生狀況m̄是人所希望ê，每一個人lóng無佮意伊，soah無法度完全避免chit種缺陷，這形成社會上真chē ê問題。因為每一個人lóng期望伊ê人生會koh-khah完美、koh-khah理想，這to̍h是人ê現實課題。Tī án-ne狀況中，人tiāⁿ-tiāⁿ需要面對chiah-ê問題所帶來ê焦躁、掛慮ê生活，chit種焦煩kap憂慮，ē-sái講是現代人ê特質，無論你ê條件如何，lóng避免不了chit-ê事實。

耶穌基督tī馬太福音六章25～34節討論chit-ê問題，to̍h是針對人生現實ê情形。因為tī現實ê每一ê角落，咱lóng會看tio̍h人生ê焦煩kap憂慮，伊同時mā是人生ê整體性，雖然人了解，伊對咱不利，但是soah無法度超越，有人講「焦煩是人生ê慢性自殺」聖經kā信徒講，克服憂慮ê人生，beh建立tī真實ê信仰上。馬太福音十章29節「兩個粟鳥仔m̄是賣一分銀mah？若是lín父不准，一個mā bōe-sái落tī土腳」。這kā咱講，咱所奉侍ê主，連hia 細項ê事物，lóng teh祂眷顧ê行列，何況是有祂形象ê人類？主耶穌kā咱講，ài有完全信靠仰望ê生活，án-ne人生chiah ē-tàng體驗tio̍h喜樂kap平安。保羅tī伊ê書信中mā講，「應該做一ê無掛慮，只要藉tio̍h祈禱、祈求kap感謝，將lín所beh kā神講，神所賜hō͘咱出人意外ê平安，必定tī基督耶穌，保守lín ê心懷意念」（腓立比書四章6～7節），無掛慮ê生活是信徒交託上帝ê信仰生活，因為憂慮會吞蝕上帝所賜hō͘人ê平安kap喜樂，mā to̍h是人心受俗世狀況影響，引起生活上不安kap煩惱，tùi人ê立場來看，這是難免ê事實，tú-tio̍h問題就會bōe食bōe睏，若tùi信仰ê角度去觀察，是kap信仰有關，因為這是bōe-tàng學習「將萬事交託主」ê生活ê結果，心中充滿tio̍h焦煩kap不安。

主耶穌將十字架ê道路kā學生講了後，學生ê心情非常惡劣，主講：「Lín心內mài憂愁，lín信神，mā當信我」（約翰福音十四章1節），對信徒來講，teh tú-tio̍h人生真chē困擾，心情惡劣ê時，主ê話確實是siōng大ê安慰kap力量，咱ē-tàng tùi人生生活ê實況kap上帝ê話koh-khah了解聖經tī人經歷患難ê時重要ê功能，這mā是教會一直teh強調信徒必須親近上帝ê話ê主因。

因為生活中，任何人lóng無法度避免受tio̍h人生患難hông困擾，mā難免心情憂愁不安，只有上帝ê話chiah ē-tàng趕走chiah-ê憂慮，賜hō͘人平安ê生活，因為只有hō͘憂慮離開，人chiah ē-tàng體驗喜樂kap滿足，這to̍h是人所追求ê人生理想kap幸福。

一、 現實ê人生（患難中ê人生）
有人講人生是tùi患難形成ê，因為無論人ê境況如何，lóng會體驗tio̍h真切實ê人生ê患難kap問題，有一個故事：古早時一位少年國王，chiah三十五歲，命令有智慧kap學識ê官員，限定tī一段時間內整理出人類重要ê人生內容，過了十年，寫成一大本冊呈現tī國王面前，但是國王無時間去讀chiah-ê作品，叫in koh再研究濃縮，koh過了十年，完成剩三大本，其中半數官員已經老啊無著是過身去，但是國王iáu命令koh再精簡，koh過十年，只chhun一位八、九十歲ê老臣，the̍h-tio̍h一本小冊tī國王面前，chit時國王已經倒tī眠床頂，伊講，chit-má我已經無時間，mā無氣力thang欣賞你ê作品，kám-ē-tàng真簡要ê kā我講人生實況？Chit-ê衰弱ê老臣向國王講：人生是生來受苦，受完苦to̍h是死。

Chit-ê故事kā咱講人生ê現實teh患難，若單純用人ê立場去看，人生確實是真諷刺、真矛盾、真空虛ê存在。Chiah tī chit種現狀中，人到底有什麼價值？這有可能是歷代聖賢所研究ê問題。Chiah tī基督教信仰中，基督徒ē-tàng用信仰配合，對人生問題khah有突出ê見解，因此基督徒雖然mā是生活tī真chē患難中，但是soah ē-tàng tī chit種現實狀況中表現出性命ê價值。耶穌ê主要khang-khè，是四處傳揚上帝國ê恩典，但是mā時常有醫治kap趕鬼ê神蹟，神蹟雖然m̄是耶穌ê主題，但是伊soah憐憫處tī患難中ê人。約翰福音五章記載耶穌醫治一個致病三十八年ê人，hit-ê情景to̍h是人生ê寫照，tī畢士大池邊kheh滿有各種病ê人，今á日咱若去大病院，就ē-tàng了解病痛ê人是hiah-ni̍h-á chē，這mā是現代人生ê現實，包括kui-ê人生ê全部——肉體、心靈、精神上ê病痛，咱ē-tàng説，人生ê現實是hō͘所有痛苦包圍。當咱看報紙社會版，又koh是另外一個人生ê現實，hō͘咱想起摩西ê祈禱：「咱一生ê年日是七十歲，若是勇壯thang到八十歲，但是其中所矜誇ê，不過是勞苦愁煩」（詩篇九十篇10節），摩西一生有豐富ê人生體驗，伊ê詩tú好說明伊體驗ê結果，是人生實在ê情形。Tī七、八十年性命中間，人ē-tàng爭取tio̍h什麼？ē-tàng誇口ê是什麼？是權力或者財富？伊ê結果通常lóng像摩西所講：不過是勞苦愁煩而已。咱若用摩西ê禱詞來看現實ê人生狀況，確實是各階層ê人lóng生活tī chit種勞苦愁煩ê景況中。舊約聖經約伯記針對人生痛苦ê問題提出相當深刻ê事實，「人生在世一定tú-tio̍h患難」，（約伯記五章7節），「人是婦人所生，日子短少，患難khah chē」（十四章1節），tī-chia完全說明人生ê情形，實在是揹重擔ê人生。

二、 看顧雀鳥ê上帝（馬太福音十章29～31節）
若beh了解人生現象，必須tùi人類起初ê歷史開始，起初始祖犯罪是認為食了善惡果會帶hō͘人類智慧，破壞了上帝kap人ê立約，人無遵守上帝ê命令，雖然in ê目chiu開啊，soah發現家己褪腹澈無體面ê現實，當in面對上帝ê時，in聽見上帝ê咒懺，「你必定終身勞苦，chiah ē-tàng tùi土腳得tio̍h食--ê……你必定汗流滿面chiah ē-tàng食飽，一直到你歸土」（創世記三章17～19節），然後始祖hông趕出本來上帝賜hō͘人ê樂園，這to̍h是聖經提出人類ê生活情形kap真實ê問題。雖然人用家己ê方法，用葉仔做衫褲來遮蓋家己ê身軀，結果是上帝用皮衣hō͘人穿，chit-ê問題説明，解決犯罪ê方法m̄是靠人ê方法，是tī上帝ê救贖，所以tī基督教信仰中beh化解人生患難kap痛苦ê問題，是tī上帝ê拯救，這是基督教。

信仰ê真理，tī基督教信仰中khah m̄是óa靠自身ê修為或者道德生活去克服人性ê患難，是tī信徒kap上帝建立關係，mā to̍h是tī現實人生ê狀況中去體驗kap上帝同在ê人生，只要咱ê人生，體驗tio̍h「神若幫助咱，siáng 擋咱會tiâu neh？」（羅馬人書八章31節），tī信仰者ê世界內底，真chē人體會tio̍h上帝同在ê事實。

舊約時代，約瑟ê人生，先知以利亞tī強權哈亞王下ê生活，但是以理ê獅穴，或者是新約時代保羅ê傳道生活中所經歷ê患難，初代教會所受ê迫害，lóng teh說明保羅所講ê chit句話，這to̍h是主tī馬太福音十章29～31節所講ê，咱ê主上帝是看顧雀鳥ê上帝，連chit種siōng小，無什麼價值ê粟鳥仔，lóng tī上帝ê看顧中，koh-khah免講咱chiah-ê有祂形象ê人類，kiám m̄是上帝koh-khah ài看顧ê對象mah？主耶穌teh說明，上帝對kui-ê宇宙ê關心是非常完全--ê，猶太人ê拉比有一句俗話説「上帝坐teh養飼世界，tùi水牛ê角到虱母ê卵」。信徒應該有ê心態，to̍h是建立kap上帝ê關係tī美好ê基礎上，因為確信「伊是咱teh患難中隨時ê幫助」（詩篇一四六篇1節，一三八篇7節），主耶穌mā向學生宣示，應允學生「Tī世上lín有苦難，但是lín thang好放心，我已經贏世界」（約翰福音十六章33節），先知尼西米向以色列人講：「Lín mài憂愁，因為靠耶和華得tio̍h ê喜樂是lín ê力量」（尼希米記八章10節），問題ê重心是tī kap chit位看顧粟鳥仔ê上帝建立堅固ê信仰關係，因為「伊ài救伊ê人民脫離一切ê患難」（詩篇三十四篇6，17節）。焦煩kap憂愁是現實人生ê病態，雖然人時常beh用家己ê方法來解決，其中siōng具代表性ê tio̍h是酒，中國俗語講：Án怎會解憂？只有杜康（Hō͘中國人看做造酒始祖ê人），但是chit種刺激kap麻醉忘憂，只是暫時性，而且惡性循環，人類歷史kā咱講一個事實：愛食酒ê人永遠無法度化解伊ê憂愁，顛倒是增加人生ê苦楚，koh-khah墮落，若親像箴言二十三章29～30節，「Siáng有禍患，siáng有鬥爭，siáng有哀嘆，siáng無故受傷，siáng目空充滿赤紅色，to̍h是he流連lim酒，tiāⁿ-tiāⁿ去chhōe調酒ê人」，相信chit種人生狀況，咱mā thang tùi人生實際生活去了解。

基督徒tī人生中mā有可能像一般人ê經歷，有真chē焦煩kap憂愁，信仰kā咱講，咱ē-tàng完全交託主上帝，因為伊關心咱，連he siōng細，無什麼價值ê粟鳥仔，伊lóng看顧。何況是咱chiah-ê hō͘伊救贖ê人？

三、 現實kap信仰（基督徒ê人生道路）
俗語講：「人生bōe滿百，常懷千歲憂」，伊teh說明現實ê人生狀況，chit種焦煩kap憂慮ê人生，往往是成做真chē人生問題ê主因。

這to̍h是咱teh強調無論任何人，lóng免不了chit種人生ê憂患，基督徒只有tī上帝ê恩典中，chiah ē-tàng完成上帝旨意ê生活，tī現實生活中，必須用真誠ê信仰去體會信仰ê siōng koân境界——上帝國ê真理，因為伊是上帝hō͘信祂ê人siōng大ê祝福，當一個人現實生活中tú-tio̍h真chē憂慮ê時，上帝國ê信仰的確會帶hō͘ in真chē喜樂kap ǹg望。假使hiah-ê憂慮無霸佔伊ê人生，生存會hō͘希望kap喜樂ê心情取代，就算有真chē困境，mā ē-tàng突破，tú親像保羅tī羅馬書五章1～5節，「咱既然因信稱義，就藉tio̍h咱ê主耶穌基督，ē-tàng kap神相隨。咱koh藉tio̍h伊，因為信chiah ē-tàng進入現在所khiā ê恩典中，而且歡歡喜喜ǹg望神ê榮耀。M̄-nā án-ne，to̍h是teh患難中mā是歡歡喜喜--ê，因為知影患難生忍耐，忍耐生熟手，老練生ǹg望，ǹg望koh bē致使見笑」，bē致使見笑ê人生to̍h是人生ê理想kap期待ê目標。

基督徒面對現實生活中ê狀況ê時，tio̍h-ài靠信心來生活，建立「Bē致使見笑」ê人生，這是siōng koân信仰，mā是咱信仰生活應該phah拼ê方向。上帝人民ê現實生活，kap普通人仝款，有真chē困境，好親像出埃及記二章24節，三章7、9節，hiah-ê以色列人生活tī水深火熱中，上帝有看見，mā知影in ê苦情，但是有時選民mā是koh生活tī痛苦中，chit時需要有信仰ê功課：學習忍耐，thèng等候上帝ê救贖，這是信仰生活中一項重要ê過程。

既然基督徒已經了解咱ê主知影一切情形，mā確信伊會救咱脫離一切ê患難，因此雖然tī現實人生有真chē困擾kap問題，但是mā m̄ mài hō͘伊成做生活上ê憂慮，因為對一個基督徒來講，chiah-ê困擾有bái無好，主耶穌kā咱講ài向自然界學習，hiah-ê粟鳥仔無煩無惱，安然自在ê生活，山中ê野花，in ê境況無法度kap人類相比，但是in soah lóng無憂慮、無煩惱ê生活。

所以一個真誠確信上帝大能ê人，tī伊ê生活中應該是bōe為tio̍h生活憂慮，一方面信徒ài學習認bat，另外一方面ài交託hō͘主，彼得前書五章7節「 Lín beh將一切ê憂慮囥hō͘神，因為伊顧念lín」，因為憂慮是m̄信ê表現，確信上帝ê人永遠bōe憂慮，生活中難免有問題，但是藉tio̍h信仰ê引chhōa，咱將萬事交託hō͘主。基督徒已經體會「一天ê難處一天當就有夠」（馬太福音六章34節），所以主教咱二個生活方式：
（A） 先求上帝ê國kap伊ê義
（B） Mài替明á載憂慮

因為掛慮明á載是m̄信ê行為，明á載m̄是屬於咱ê，咱只有今á日，主耶穌m̄是ài咱pîn-tōaⁿ或者無負責任，是ài咱完全盡今á日ê責任，chit種生活方式to̍h是信仰生活，基督徒ê信仰生活to̍h是盡伊chit-má ê狀況來榮耀主，這是現實生活中siōng根本ê問題，這mā是基督徒ê人生道路，盡siōng大ê phah拼去完成做人應該做ê事工，通常tī人生中真chē悲劇是人無想beh去做人應該ài做ê tāi-chì，tī-chia就有真chē人生ê問題。

結論：基督徒ê現實生活kap一般人仝款，mā會tú-tio̍h真chē困擾kap問題，必須teh信仰上建立家己，將一切交託hō͘主，因為主關心屬於伊ê人民，「Siáng ē-tàng hō͘咱kap基督ê疼隔開neh…….」（羅馬人書八章35節）