《林茂生博士論文》

 | | | 轉寄

第五章 台灣教育令時期

作者 英語：林茂生, 華語：林詠梅, 台語：林俊育 2017.09.17

第五章 台灣教育令時期（1919年到1922年）

一）政治kah社會ê情況
1）武官總督統治ê結束 Tùi 1895年4月，清廷kā台灣chit-ê島嶼割讓hō͘日本，直到1919年9月末。Chit-ê島嶼連續由八位軍人總督統治，所有ê chiah-ê陸軍á是海軍將軍lóng由民政長官輔助。Tī chiah-ê年內，引進真chē教育方案ê改革，chiah-ê改革中間，siōng引人矚目ê是明石下村當政時期ê改革。經過24年長時期ê實驗，終其尾tī 1919年1月頒佈第一個教育令，具體編入對本地人確定ê教育方案，它ê發起人是明石總督，m̄-koh ，tī實行伊ê教育政策chìn前，伊tī仝hit年死tī任上。這是武官總督時期ê結束。

2）田總督劃時代ê行政改組
Tī 1919年10月1日，田健治郎男爵，是一個出身文官ê政治家，繼明石總督了後，出任台灣總督，這是台灣史上劃時代ê重要大事。當田男爵總督出任伊ê職務ê時，得tio̍h有自由作風ê總務長官下村宏博士ê幫助（註：1），實行行政制度ê全面改革，是chit-ê島嶼史無前例ê，伊減少到taⁿ iáu有主要影響力ê中央集權制度，來利益地方ê自治制度。 照chit-ê改革，台灣總督tī島上組成至koân無上ê政府機器，由總督執行，並由掌理總務局ê總務長官輔助。政府包括總督府官房kah四局：內務局、財務局、殖產局kah警務局。這以外，特別設立一個專賣局—遞信局—中央研究所kah稅關。以上chiah-ê機關lóng tī各自範圍內處理政府ê事務。

為tio̍h beh達成地方施政ê目的，全島分做五州（主要縣）kah兩廳（tī「州」之下，它ê地理範圍khah細）。該島ê西半部，人口siōng密集kah文明進步，設立五個州政府，to̍h是台北、新竹、台中、台南kah高雄，每一州設有州知事（首長）。東半部，包括文化落後、人口稀少ê地區，分做兩廳，to̍h是台東kah花蓮港（註：2），並各設一個廳長。五州koh分5市、47郡kah 260街kah庄。Chit兩廳koh再細分做7個郡、2街、1座kah 19區。

Tī每一州、市、街kah庄，lóng設有協議會（諮問性質之議會）；州kah市ê協議會員是由總督任命；街kah座協議會員由各地方首長tī各自地區ê賢達中挑選。 講tio̍h台灣總督，有一個附屬ê台灣評議會，這是siōng kôan ê顧問機關，它ê議員由總督委派。Chit-ê議會ê功用是，對政府諮詢ê問題表達公眾ê意見。

3）田總督對「六三法」ê解決辦法
Tī 1896年3月，文官統治代替武官統治。In認為台灣處tī一種特殊ê情況下，帝國政府當局認為需要授權hō͘ 總督，去發佈有法律效力ê命令。To̍h是tī仝hit年3月30日得tio̍h議院ê同意，帝國政府隨時頒佈有頂面所講ê功效ê法律第63號。Chit-ê法律有清楚ê附加條件：自生效日起三年有效，m̄-koh，一再繼續得tio̍h帝國議院第13屆議會、第16屆議會kah第21屆議會ê同意，得tio̍h延長。Tī 1909年1月，另外一法律「三一法」通過，tī議會ê下半屆，kā權限tùi三年延到五年。Tī第27屆kah第37屆，第四pái同意chit-ê法律期限ê延長。最後tī 1921年，第44屆議會中同意宣布一個新法律「第三號」，chit-ê法律實行到taⁿ。這是值得去概述實行中ê法律，kah 1896年ê「六三法」以及 1909年ê「三一法」重要ê無仝ê所在。直到1921年法律第3號宣布以前，所有tī台灣beh規定法律ê事務，原則上由總督以命令ê方式來公佈，只有一kóa個別ê日本法律，認為thang適用tī chit-ê島嶼殖民地，就án-ne以天皇敕（thek）令頒佈。1921年新法律第3號取消chit-ê原則，用敕令kā國內法律施行tī台灣，只有因為台灣ê特殊情況，一定tio̍h制定法律ê時，由總督頒佈法令。以往，法律ê期限限定三年到五年，m̄-koh，chit-má卻完全取消à（註：3）。

4）田總督ê統治政策
真chē研究殖民政策ê學者相信，田總督ê政治改革，是因為為伊ê統治方針ê結果，伊ê統治方針，換一句話講，to̍h是「內地延長」方針，講tio̍h教育方針，伊主張同化（註：4）。當1919年11月11日，伊以總督ê身分第一pái來到台灣，伊發表ê演講詞中，顯示伊ê教育kah政治意向如下:
伊講：「台灣是構成日本帝國領土實質ê一部分，當然是屬tī帝國憲法統治下ê版圖。無法度kah英國á是法國殖民地ê情況仝款看待，因為in kan-taⁿ是她ê本國政治ê策源地á是經濟ê利源地。所以，對台灣ê統治方針，應當以日本帝國憲法做基礎ê基本精神做出發點，所有ê施設經營，hō͘ 本島人民成做純粹ê帝國臣民；所有ê施設經營，是為tio̍h beh教化善導本島人民，對我朝廷忠誠、對國家有義務觀念。」伊koh khah進一步講：「Tāi先，一定tio̍h盡一切力量hō͘ 教育普及化，一方面啟發in ê智能kah德操。一方面hō͘ in感受tio̍h我朝廷ê撫育精神kah一視同仁ê聖旨。Hō͘ in醇化融合，ē-tàng直接kah日本本地ê人有社會接觸ê地步。最後教化善導in達tio̍h政治平等ê境界（註：5）。」

無thang懷疑ê，chit-ê統治方針kah實現伊ê前任總督明石將軍所發起並頒佈ê教育令，有真重要ê關係。

5）台灣人民民族意識ê醒起來
若是咱認為過去十年hit階段，是台灣人民對日本政府引進ê新文明表示敬意，咱thang講，chit-ê階段（1919年到1921年〉，當地人民ê民族意識已經被喚醒à，有展顯in ê個性kah特色，chit時期是續落來大戰ê結束。Chit-má想起來，固然台灣真孤立，新ê政治意義kah大戰後真chē ê改變，tùi真chē來源傳入chit-ê島嶼，並留落來深刻ê影響。台灣學生tùi歐洲、tùi美國、tùi其中國，kah大部分tùi日本本地，tńg來到in ê故鄉，in帶tńg來新ê民主精神。自1911年以來，中國一連串ê革命，對台灣人民有深遠ê影響，in ê民族意識受tio̍h振奮。

6）社會kah政治ê改革運動
社會環境改善時期結束了後，全島真chē運動紛紛起動，就是beh kā古老ê風俗現代化。早tī 1915年，cha-po͘人開始剪頭鬃尾（國語ê「頭鬃尾」），cha-bó͘-gín-á漸漸放棄縛腳ê習慣。到1919年。差不多所有ê cha-po͘人lóng已經剪掉頭鬃尾， cha-bó͘-gín-á已經大量tùi縛腳ê習慣解放出來（註：6）。

知識階級ê崛（ku̍t）起，主要包括留學tńg來ê學生，in無koh chheⁿ-mê跟tòe in祖先保守ê途徑。In自由開放、直言無隱瞞、勇敢批評。In覺察現今政治kah社會環境結構ê弊端（pè-toan），in渴望去除chiah-ê弊端，in無滿意田總督新政府ê結果，因為它無帶hō͘ 台灣人民kah日本人平等ê khiā腳點。In無滿意田總督努力設置ê地方議會，因為in ê議員m̄是由人民普選出來ê，所謂「自治」kan-taⁿ是徒有其名而已。所以，in開始政治平等運動，in tī東京議院前，為tio̍h自治á是「地方自治」提出請願。這以外，in要求文化上ê平等，mā to̍h是，對日本人chit pêng ê文化ê認知，卻m̄承認需要廢止in固有ê漢文化，來由純日本文化來代替，hō͘ 兩種文化lóng受tio̍h正當ê認知，並透過適當ê教育管道並肩發展。後來in要求第三種平等，to̍h是經濟上ê平等，hō͘ in ē-tàng kah日本人享受平等ê權利，去從事工業（註：7）。 就tī chit種情況下，tī 1919年，專為台灣人民制定ê「台灣教育令」頒佈。

二）1919年ê台灣教育令

1） 教育令內容

第一章 總則
第一條 Tī台灣對台灣人ê教育是根據本令。
第二條 教育ê本義是根據有關教育ê敕語ê主旨做基礎，來培養忠良ê國民。
第三條 教育一定tio̍h適合時代ê需要kah人民ê情況。
第四條 教育分做普通教育、實業教育、專門教育kah師範教育。

第二章 普通教育
第五條 普通教育注意身軀發育、施與德育、傳授普通知識kah技能、涵養國民性格並普及國語為目的。
第六條 普通教育施行ê學校分做三種，to̍h是公學校、高等普通學校，kah女子高等普通學校。
第七條 公學校是hō͘ 兒童實施普通教育，並傳授日常生活中必要ê知識kah技能ê所在。
第八條 公學校ê修業年限為六年，m̄-koh，根據學校所在地方ê情況，ē-tàng縮短年限。
第九條 公學校入學資格是七歲á是七歲以上者。
第十條 高等普通學校是施與男學生高等普通教育、傳授生活中有用ê知識kah技能ê所在。
第十一條 高等普通學校ê修業年限為四年。
第十二條 高等普通學校入學資格是修業年限六年ê公學校畢業生，á是cha-po͘人有同等á是以上學力者。
第十三條 女子高等普通學校，施與女子高等普通教育、養成婦德kah教授生活中有用ê知識kah技能ê所在。
第十四條 女子高等普通學校ê修業年限為三年。
第十五條 女子高等普通學校ê入學資格是，cha-bó͘-gín-á tùi公學校修業年限六年ê畢業生，或是有同等á是以上ê學力者。
第十六條 女子高等普通學校thang設置實科，女子高等普通學校mā ē-tàng kan-taⁿ設置實科。實科ê修業年限是三年以內。有關它ê入學資格是由台灣總督決定。

第三章 實業教育

第十七條 實業教育是傳授有關農業、工業、商業kah其它有關ê實業知識kah技能，並兼德性ê養成為目的。
第十八條 實業教育施行ê學校分做實業學校kah簡易實業學校。
第十九條 實業學校ê修業年限為三年á是四年。
第二十條 實業學校ê入學資格為修業年限六年ê公學校ê畢業生，或是有同等á是以上學力者。
第二十一條 簡易實業學校ê入學資格kah修業年限有關事務由台灣總督決定。

第四章 專門教育

第二十二條 專門教育是教授高等學術、技藝為目的，並注重德性ê涵養。
第二十三條 實施專門教育ê學校稱做專門學校
第二十四條 專門學校ê修業年限為三年á是四年。專門學校thang設預科。
第二＋五條 專門學校ê入學資格，是專門學校預科畢業生、高等普通學校畢業生，á是擁有同等á是以上學力者。專門學校預科ê入學資格，是修業年限六年ê公學校畢業生，或是有同等á是以上學力者。

第五章 師範教育

第二十六條 師範教育在tī培育特別有德性涵養ê公學校教員人才為目的。
第二十七條 師範教育施行ê學校稱做師範學校。
第二十八條 師範學校設有預科kah本科。預科修業年限為一年，本科為四年。師範學校設有修業年限一年ê公學校教員講習所
第二十九條 師範學校預科ê入學資格，一定tio̍h是修業年限六年ê公學校畢業生，或是有同等á是以上學力者。師範學校本科ê入學資格是師範學校預科畢業生，或是有同等á是以上ê學力資格者。公學校教員講習科ê入學資格有關事項由台灣總督決定。
第三十條 高等普通學校á是女子高等普通學校thang設有修業年限一年ê師範科，來培養自願成做公學校教員者。官立á是公立ê實業學校，lóng thang設有修業年限一年ê師範科，來培養願意成做簡易實用學校教員者。高等普通學校師範科á是女子高等普通學校師範科ê入學資格，是高等普通學校á是女子高等普通學校ê畢業生。實業學校師範科ê入學資格，是實業學校ê畢業生。

第六章 補則

第三十一條 公學校、高等普通學校、女子高等普通學校、實業學校、簡易實業學校、專門學校以及師範學校ê教科、編制、設備以及學費等有關規定，由台灣總督決定。
第三十二條 專門學校kah師範學校是官立；公學校、高等普通學校以及女子高等普通學校是官立á是公立。公立學校ê設立á是廢止，由台灣總督認可。本令所提以外之特殊教育學校kah其它教育設施，包括私立學校kah教育設施ê有關事項，由台灣總督決定。

附則

1）本令實施日期由台灣總督決定。
本令施行ê時，已存在ê台灣公學校、台灣公立中學校、台灣總督府國語學校附屬女學校、台灣總督府醫學校，kah台灣總督府國語學校師範部乙科，根據本令，成做公學校、高等普通學校、女子高等普通學校、專門學校kah師範學校。

台灣總督府國語學校國語部，chit-má有學生在學期間繼續存在。 本令施行ê時，已存在ê私立學校，暫時照往例管理。

2）明石總督開拆ê教育令要旨（註：8）
「台灣ê教育分做四種，to̍h是普通教育、實業教育、專門教育kah師範教育。普通教育ê目的是beh傳授國語kah生活中bē-tàng欠缺ê知識kah技能。Tī女子教育方面，特別注重培養貞潔、順良、溫和ê美德。實業kah專門教育兩者lóng以傳授所必要ê學術kah技藝為主要目的。講tio̍h師範教育方面，特別piàⁿ落全力tī品性ê陶冶kah國語ê熟練，án-ne chiah ē-tàng穩固普通教育ê資源kah基礎。M̄-koh，對所有無仝教育ê根本大義iáu是tī德性ê涵養，因為án-ne，明確指示所有學校tio̍h以這做指標。･･･·為tio̍h beh hō͘ 師範kah普通教育成做國民性涵養ê來源，chiah-ê學校tio̍h完全khǹg tī政府ê管轄下。」

3) 總督府參事官鼓包美對教育令ê解釋（註：9）
鼓先生對本地人kah日本人分開教育ê理由，以及對將來教育令ê改革發展有彈性規定ê演變，有真好ê解釋。伊講：「教育令存在ê理由，就是beh tī日本本地kah島上ê日本人ê教育令（註：10）以外，特別為本島人發展一個教育學制，原因是國語對本島人是一個難關，新附民？洗身軀『皇化』ê時日iáu淺，因為án-ne，伊ê國民性ê涵養自然有koh樣。M̄-koh，根據本令第3條，真明顯顯示本令ê內容ē-tàng『因適合時代ê需要kah人民ê情況』來修改。教育ê基礎是道德教育，chit-ê方針tī普通教育尤其是女子教育上特別強調。同時，實業教育特別受tio̍h注重。」

三）1919無台灣教育令所引起ê改變

1）引言
事(tāi)先需要注意ê是，因為chit-ê教育令ê主力是針對本地人ê學校，日本人ê學校課程卻一屑á都無改變，對chit點以後iáu會討論。M̄-koh，根據chit-ê命令，自然有真chē為台灣人設立ê新學校，tī已經存在ê學校裡產生真chē變化。

2）初等教育ê重組
照新ê公學校規則，公學校固有ê實業科被取消，soah用簡易實業學校所代替，chit-ê簡易實業學校通常設khǹg tī公學校裡，卻是一個獨立個機構（註：11）。

3）中等教育ê重組
台灣教育令廢除國語學校國語部，而且為男生kah女生ê中等教育新設立高等普通學校。Chit-ê時期以前to̍h已經存在ê公立台中中學校，被改為cha-po͘人高等普通學校；國語學校附屬女學校變成女子高等普通學校。除了chiah-ê改變，兩間女子高等普通學校新設立，一間tī彰化，設tī 1919年。一間tī台南，設tī 1921年。

4）實業學校ê重組
1919年根據敕（thek）令第69號，設立台中工業學校，chit-ê工業學校kah新規則mā保持一致。Tī台中設立一間新ê商業學校，tī嘉義設立一間農林學校。

5）專門學校ê新創設
Chit時期以前，為本地人來設ê唯一專門教育學校是總督府醫學校。Chit-má chit間學校升級為醫學專門學校。1919年，tī台北設立農林專門學校，tī台南設立商業專門學校（註：12）。

6）師範教育ê重組
台灣教育令廢除國語學校，chit-ê學校bat是hō͘ 本地人師範kah中等教育唯一ê機構，tī台北設立師範學校實行師範教育。國語學校師範部乙科個課程成做chit間新師範學校ê主要課程；師範部甲科chit-má稱做公學師範部（註：13）。根據教育令，一間新ê師範學校設tī台南，事實上是國語學校分校ê轉型（註：14）。

7）「共學」教育ê試行（註：15）
Tī台灣，日本人kah本地人ê教育是分開ê，mā是有差別ê。總是，chit時期以前，隔離á是差別是理所當然ê，m̄-koh，自從教育令頒佈以後，隔離成做正式ê，所以，tī法律上是無法度共學教育。雖然是án-ne，政府想beh看漢人學生kah日本人學生tī仝一個教室接受教育ê後果án怎。Tī 1920年1月8日，所頒佈ê府令陳述：「若是學校ê教育措施無受改變，本島人學生ē-tàng符合內地人兒童ê條件，thang許可in進入日本人學校來讀（註：16）。」就án-ne，所謂「共學制」tī chit階段開始實行（註：17）。

8）學校經費ê重組
因為教育令hō͘ 地方行政發生變化，致使學校ê經費重新分配。1919年以後，無論是日本人á是本地人ê公立中等教育學校，lóng由州政府設立kah掌管。除了教員薪水由國庫供給外，所有ê教育費用由州稅擔當。日本人kah本地人ê初等教育學校由in各自ê市、街，á是庄掌管kah維持，chiah-ê學校教員ê薪水來自州政府ê財庫。師範學校kah專門學校就án-ne kah以前仝款，完全由總督府掌管kah維持，國庫負責所有ê支出。

四）Chit階段日本人教育ê發展概況

1）初等教育ê發展
Tī 1918年，初等學校包括分校總共有120間；tī 1919年數目增到128間；tī 1920年為131間，下一年為132間，兒童ê入學數目kah出席率不斷teh增加（註：18）。

2）中等教育ê發展
Chit時期有兩間中學校，一間tī台北，一間tī台南。Tī chia值得提起ê是，台北中學校第一部tī 1920年完全廢除，chit兩間學校ê學生總共有1千2百30人。

3）女子中等教育ê發展
Tī chit階段有四間日本人teh讀ê高等女學校。1921年，chiah-ê學校有1千2百27名學生。跟tòe控制權由總督府轉移到州政府，chiah-ê學校ê發展卻無重大ê改變。

4）實業教育ê發展
Tùi頂階段既有ê兩間學校以外，現階段並無koh再設chit類ê新學校。

5）日本人專門教育ê發展
Tī 1918年，為日本人設立醫學專門部。成做tī台北既有ê本地人醫學校ê一個單位。Chit-ê醫學專門部有學院ê程度，它ê程度比本地人醫學校課程小khóa khah koân。

Tī 1919年，tī台北新設立高等商業學校。Chit間高等商業學校是根據1919年敕（thek）令第61號kah仝hit年府令第62號設立ê。成立chit間學校ê目的是為tio̍h beh培養日本學生積極參與商業，修業年限為三年。中學校畢業生、台灣商業學校畢業生、日本ê甲種商業學校畢業生，á是有同等學力者chiah有資格入學。課程包括修身、商業文、英語、支那語á是馬來語、商業地理、商品學、經濟kah財政、南支那kah南洋經濟事情、法律kah工業大意。

6）日本人ê師範教育
1919年教育令有關師範學校ê規則，只影響本地人ê師範訓練，1919年3月24日特別頒佈一個府令，制定內地人教員養成規則。根據法令成立兩個師範部，一個是小學師範部，一個是公學師範部，chiah-ê師範部是台北師範學校ê單位，提供修業年限一年ê課程。中學校畢業生個年齡tī 17歲到25歲之間ê日本人，thang申請入學。小學師範部課程，在tī培養日本人成做小學校教員，教科目包括修身、教育、國語、歷史、地理、數學、理科、圖畫、音樂、實業·體操kah台灣語。公學師範部ê課程，為tio̍h訓練日本人tī台灣人teh讀ê學校服務，伊ê教科目歷史受刪除以外，kah小學師範部個課程類似，m̄-koh，每一禮拜加三點鐘ê台灣語課程（註：19）。

五）Chit階段本地人ê學校發展概況

1）引言
因為新教育令ê影響，致使組織kah內容改變以外，為本地人來設ê種種學校，tī量方面有可觀ê發展。

2）初等教育ê發展
因為台灣人父母chit方面渴望koh khah chē ê教育，以及因為in本身財力提高，tī chit階段初等教育ê設施有明顯ê增加。Tī 1918年年底，公學校包括分校，總共有394間，tī 1921年，數目增到531間。1918年入學學童數目為10萬8千5百87名，tī 1921年chit-ê數目增到17萬3千7百95名。學齡兒童ê入學率，tùi 1918年ê百分之15.71增加到1921年為百分之27.22，tī台灣教育史上，從來m̄-bat有過hiah-ni̍h緊ê成長（註：20）。

3）中等教育ê發展
Kah chit時期ê公學校緊捷（chia̍p）發展ê情況相對照，除了kā台中中學校ê名稱改為公立高等普通學校以外，對台灣cha-po͘人ê中等教育差不多無進展thang講。台中高等普通學校，tùi頂一時期to̍h已經存在，是唯一本地cha-po͘人teh讀ê中學校，而且課程kah學生人數lóng無真大ê改變。另外一方面，女子ê中等教育卻有大進步，tī 1921年年底，女子高等普通學校有三間，入學學生有605人。

4）本地人實業教育ê發展
本地人ê實業教育是由1919年5月所頒佈ê府令第66號管理，根據chit-ê府令，修業年限延到三年。以嘉義農林學校為例，tī它專業方面ê科目以外，教科目iáu包括修身、國語、數學、物理kah化學、博物、英語、地理、體操。兩門選修科目，to̍h是農業科kah林業科。由三年級ê男學生選修。1921 chit年，有177位入學學生。

台北工業學校，它ê前身是工業講習所，它有六門科系，修業年限為三年。每一個學生tùi其中選一科，這包括機械科、電氣科、土木建築科、應用化學科、傢具科kah金屬細工科。1921年，有185位學生入學。 台中商業學校，它ê修業年限為三年，提供ê教科目包括修身、國語kah漢文、英語、數學、理科、歷史、地理、商品、商業要項kah商業實踐、簿記、經濟、法規、圖畫kah體操。除了頂面所講課程以外，iáu需要第二外國語言（支那語á是馬來語）。1921年，學生ê人數為197名。根據1919年府令第48號，簡易實業學校ê修業年限無超過兩年。除了一般教科目如修身、國語、算術以外，實業科tī課程中真受重視。照各地方ê情況，tī下面個科目：農業、商業、工業kah水產中強調其中一項（註：21）。

5）專門教育ê發展
Chit-ê時期對本地人專門教育ê進展是真hō͘人注目ê，tī這以前只有一間學校，to̍h是台北ê醫學校。Tī仝一個時期，成立兩間短命（註：22）ê專門學校，he to̍h是台南商業專門學校kah台北農林專門學校。 根據1919年台灣教育令kah仝hit年ê敕（thek）令第62號，台北醫學校高升為學院程度，koh為日本人設一間醫學專門部。為本地人來設ê醫科分做預科kah本科，修業年限為每一科各修四年。預科ê教科目包括倫理、國語kah漢文、英語、歷史、地理、數學、博物、物理kah化學、圖畫、唱歌、體操（註：23）。本科ê教科目提供醫學上ê專門科目。根據1919年府令第58號，新成立為期一年ê熱帶醫學專攻科kah為期三年ê研究科，前者招收已經有醫生執照ê學生；後者只提供hō͘ 本科ê畢業生（註：24）。

根據1919年教育令kah 1919年敕（thek）令第63號，來設立台南商業專門學校，這koh受1919年6月府令第84號ê制定。Chit間學校提供兩種課程，預科kah本科，預科ê修業年限為三年。預科所組成ê教科目包括修身、國語kah漢文、英語、歷史、地理、數學、理科、圖畫、唱歌kah體操。本科ê學科目包括修身、國語kah漢文、商業作文、商業算術、簿記kah計理、商業地理、商業歷史、東洋經濟事情、商品、商業要項kah商業實踐、經濟財政、統計、法律、工業大意、英語、支那語á是馬來語、體操（註：25）。

依照1919年所頒佈ê敕（thek）令第127號kah府令第83號，設立台北農林專門學校。它仝款有三年預科kah三年本科ê課程。預科教科目提供修身、國語kah漢文、英語、歷史、地理、數學、理科、實科、圖畫、唱歌、體操。本科分做農業科kah林業科，專門科目只提供hō͘ 本科學生（註：26）。

6）本地人師範教育ê發展
1919年教育令kah仝hit年3月府令第23號，設定本地人ê師範學校ê宗旨kah規則。Tī chit時期有兩間師範學校，一間tī台北，一間tī台南。修業年限延為預科一年kah本科四年。預科教科目包括修身、國語kah漢文、數學、圖畫、音樂、實科、體操。本科是修身、教育、國語、漢文、歷史、地理、數學、理科、圖畫·音樂、實科、體操。有關統計請看第23表。

1919年教育令mā tī 女子高等普通學校裡提供師範教育，為tio̍h án-ne，四年高等普通課程koh再加一年ê課程。M̄-koh，chit-ê師範課程只提供hō͘ 台北女子高等普通學校。教科目包括修身、教育、國語、漢文、地理、算術、理科、家事、裁縫、手藝、圖畫、音樂、體操。有關chit時期ê發展統計參閱第24表。
1919年到1922年之間教育制度

註釋
（1）總務首長，通常稱做「總務長官」，是代替以前ê「民政長官」名稱。
（2）以前澎湖是屬tī高雄州轄ê一個「郡」，chit-má成做一個獨立「廳」，kah其他兩「廳」同格。
（3）見台灣總督府，《進步中の台灣》（台北，1926年〉，頁25-27。
（4）矢內原忠雄，《帝國主義下の台灣》，「國家協會」第42卷第9號，東京帝國大學，1929年9月。
（5）抄譯自吉野秀公，頁369,370。
（6）Chit-ê風俗ê改變起因tī大陸發生變化ê影響，比同化教育ê影響khah大。比較阿諾（Arnold)ê描述（1908年）án-ne講：「講tio̍h接受日本人ê習慣，本地ê學生是有往chit-ê方向ê明顯表現。M̄-koh，因為家庭ê影響，一定會強烈堅持，尤其像漢人有強烈ê家族意識ê人，iáu-koh留頭鬃尾，穿漢式衫褲。本地gín-á因為家庭kah周圍環境是正港漢式ê影響，而且本地學生mā m̄ kah日本gín-á往來，因為日本人有為in特別設立ê學校，這hō͘人bē-tàng懷疑ê是，這需要真chē年以後，chiah會有任何接受同族以外ê習慣ê影跡。」（見·Arnold,p.40.)
（7）見矢內原忠雄，《帝國主義下の台灣》，第五章。以及山川均，《殖民政策下の台灣》，束京：Prebus，1919年1月4日。
（8）引自1919年2月1日明石總督ê諭告第1號，見吉野秀公，《台灣教育史》，頁385、386。
（9）見吉野秀公，《台灣教育史》，頁383一385。
（10）Chiah-ê法令是為tio̍h日本本地ê日本人教育來頒佈ê，因此來影響tī台灣ê日本人教育。
（11）見表19。
（12）Chiah-ê學校hông稱做「專門」，它ê標準kah美國ê初級學院（the junior cohlege）仝款。
（13）見第四章第三節。
（14）見第四章第三節。
（15）「共學教育」tī chit篇論文裡並無意思beh講是兩性合校教育，卻是兩個民族ê教育，mā to̍h是日本人kah台灣本地人tī仝一個學校受教育。若是tī日本kah台灣有男女合校，情況真少。Tī極偏僻ê庄腳低年級班上可能有，m̄-koh，iáu是真少。
（16）統計請見第19表。
（17）見第五章第三節。「共學教育」ê實際後果，田總督描述如下：「我hō͘符合日語條件ê台灣人ē-tàng進入純日本人ê小學校，已經得tio̍h非常真好ê後果，對咱ê同化政策有phah算bē到ê好ê影響。」(Hayden, pp.471, 478.)
（18）見表1。
（19）見表23。
（20）統計見表2。
（21）統計見表19。
（22）講in短命是因為為in只繼續三年to̍h hō͘ 1922年頒佈ê教育令所廢除。
（23）為本地人設立ê chiah-ê專門學校ê預科課程ê內容kah程度，kah高等普通學校相差無幾。
（24）統計見表20。
（25）統計見表21。Chit-ê學校主要是收預科ê畢業生以及高等普通學校畢業生。
（26）統計見表22。Chit-ê學校主要是收預科ê畢業生以及高等普通學校畢業生。