《台語家庭》

 | | | 轉寄

Ûi-lîm 台語Kó͘-chui話 (21)

作者 Teng Hongtin 2007.05.06

Ûi-lîm 台語Kó͘-chui話 (21)

58. Ûi-lîm chah椅á離家出走？ (2007.3.8)

Chit幾kang天氣chin寒，koh落雨。

透早媽媽beh chhoa7Chheng-chheng去讀冊，Ûi-lîm睏kah tng好睏，媽媽想講liâm-mi to̍h tńg 來，to̍h m̄甘叫Ûi-lîm起 來。Kā Ûi-lîm講：「媽媽liâm-mi tńg 來，你koh睏，我tńg來chiah kā你叫。」Ûi-lîm tìm頭，koh繼續睏。

Tī beh tńg lâi ê路 nih，媽媽ê手機á liang 起 來，是大樓ê管理員khà來 ê，講Ûi-lîm chi̍t-ê人走 落 來樓kha，無chah鎖匙。媽媽chhoa̍h chi̍t-ē，緊趕tńg 去。看tio̍h Ûi-lîm chah chi̍t隻細隻椅á坐tī管理室teh等媽媽。感覺chin m̄甘，koh chiâⁿ愛笑。Che是Ûi-lîm頭chi̍t pái家己chi̍t-ê人坐電梯出門。Ûi-lîm看tio̍h媽媽，giông beh哭 出 來。後pái媽媽m̄敢koh kā伊家己tàn tiàm厝nih lo͘h。

媽媽：「你nah會走出來？」
Ûi-lîm：「我家己tī厝nih會驚。」
媽媽：「你出來kám bōe驚？」
Ûi-lîm：「Bōe a。」
媽媽：「你家己坐電梯？你nah會chah椅á？」

Ûi-lîm：「Mh。我the̍h bōe tio̍h鎖匙，to̍h giâ椅á keh。M̄-koh，我鎖匙poe̍h-bōe 起 來，我to̍h走去樓kha ê便利商店，kā he店員講："鎖匙poe̍h-bōe 起 來。」

媽媽：「你nah會走去kā店員講？Ài chhōe管理室ê a伯tàu-saⁿ-kāng chiah tio̍h。」

Ûi-lîm：「我想beh買糖á，m̄-koh我m̄敢chah錢。我chiok想beh買mi̍h件，m̄-koh無錢。」

媽媽：「你想beh叫店員來kā你開門，thang the̍h錢去買mi̍h件？」

Ûi-lîm：「Mh。」

媽媽：「你kám真正lóng bōe驚？」

Ûi-lîm：「Bōe a。我會曉家己去店á。」

媽媽koh問Ûi-lîm：「你講你m̄敢chah錢，是m̄是講你本來想beh偷the̍h爸爸桌頂ê錢，m̄-koh你m̄敢？」

Ûi-lîm：「Mh!」

媽媽：「後pái bōe-sái家己chi̍t ê人偷走 出 去，án-ne你會hō͘人送去警察局，媽媽mā會hō͘警察lia̍h去關 o͘h。」

Ûi-lîm：「我後pái m̄敢 a。」

後來爸爸mā知影，連續3 kang，爸爸lóng án-ne kā Ûi-lîm教示：「你nah無chah錢，bōe-sái偷the̍h店á ê mi̍h件 o͘h。」

Ûi-lîm：「我知 lah。」

Chheng-chheng知影Ûi-lîm離家出走koh chah椅á，kan-nā一直笑一直笑，笑kah hō͘ Ûi-lîm感覺chiok受氣 ê。