《台語家庭》

 | | | 轉寄

咱來去綠島chhit-thô (4-2)

作者 Lí Chheng-chheng 2006.10.08

咱來去綠島chhit-thô
──參加2006年7月「11th世界台語文化營」感想 (4-2)

台灣字原作：Lí Chheng-chheng , 2006.8
(台中教育大學實驗小學4年級生)
校對kap漢羅文改寫：Teng Hongtin , 2006.9.30

Ma-ma kap秀鳳a姨感覺chiok thiám ê，in to̍h睏去ah。我kap A-bín、Ûi-lîm to̍h tī房間sńg。暗頭á ê時chūn，ma-ma kap 秀鳳a姨to̍h醒來，講beh chhōa gún去海邊sńg，gún chiok歡喜ê。食飽了後，gún to̍h去海邊hia，m̄-koh，gún kàu海邊ê時chūn，已經看bōe tio̍h ah，因為天色變暗ah，m̄-koh，明á載ē-sái koh來，bōe要緊。Koh來ma-ma to̍h chhōa gún去se̍h街，我買chi̍t-ê螺á殼，nn̄g枝筆kap chi̍t-kóa星沙，了後gún to̍h tńg去飯店，身軀洗好to̍h睏去ah。因為明á載透早beh去洗溫泉。

透早，ma-ma chhōa gún去朝日溫泉，看日出、洗溫泉。溫泉洗起來chiok爽快ê，日出mā chiok súi ê。Chit-ê溫泉有nn̄g種：chi̍t種是SPA，chi̍t種是海底溫泉。Kàu 6點ê時chūn，gún to̍h離開溫泉，去食早頓。Gún食moâi，chin好食。

了後ma-ma kap秀鳳a姨 chhōa gún去sńg，gún先去人權紀念公園，chit-ê公園chiok súi ê，我chiok合意ê。Koh來，gún to̍h去綠島交監獄，看過in ê房間了後，我感覺tòa tī hia ê人chiok苦憐ê，因為房間內kan-nā有chi̍t-ê馬桶niâ。了後，gún to̍h去觀音洞，我kap A-bín入去內底拜拜，to̍h出來ah。Koh來，gún to̍h去海邊sńg，海邊ê沙á chiok súi ê，海內底iā有細隻ê魚kap螺á殼，chiok súi ê。了後，gún to̍h去食冰，我食海草薄荷冰，chiok好食ê。Koh來，gún to̍h去se̍h 街，我買chi̍t-ê玻璃罐á，chi̍t-kóa星沙，chi̍t-kóa螺á殼，kap nn̄g-tiuⁿ khah片。

(這篇文章 iáu-bōe soah,後禮拜歡迎繼續收看。)