《台語家庭》

 | | | 轉寄

愛哭青kap Hô͘-lin豆chiaⁿ ê故事(6-3)

作者 Teng Hongtin 2006.02.26

Ài-khàu-chheng kap Hô͘-lin-tāu-chiaⁿ ê kò͘-sū
愛哭青kap Hô͘-lin豆chiaⁿ ê故事(6-3)

「你kám無聽古早人講--過： “人無千日好，蝶無百日súi。”」Ia̍h-á氣kah頭頂ê chhiu kńg做1 oân。

Hô͘-lin豆chiaⁿ趕緊講： 「失禮--lah！你m̄-thang siūⁿ氣--lah！Nā無，你面頂ê jiâu痕ē jú來jú明顯--o͘。我想beh請教你，kám知影青青thàu早nah ē倒tiàm我ê hô͘-lin豆田--nih睏--leh？」

Ia̍h-á ê chhiu koh chhun tn̂g--去，i飛過來hioh tī青青ê手盤--nih，koh整理chi̍t下á i ê chhiu。I 講： 「青青，你chiâⁿ愛súi tio̍h--無？你感覺我khah súi，ah是你khah美麗？」青青ná笑ná講：「青青khah súi，你 khah 美麗。」

「青青，a姨ê話你to̍h-ài聽--o͘。你nā是愛súi，to̍h-ài照三頓乖乖食飯，ta̍k項菜lóng ài食，án-ne營養chiah有夠，面肉chiah ē膨皮，皮膚chiah ē白phau-phau koh 幼mī-mī，你chiah ē jú來jú súi，jú來jú tit人thiàⁿ惜--o͘。我問你，你是m̄是tiāⁿ-tiāⁿ lóng m̄肯好好á食飯？時常lóng無愛食菜？」

Ia̍h-á用柔軟ê眼神看tio̍h青青，青青tiām-tiām m̄講話，面色結kui丸，ia̍h-á koh講：「你昨暗食暗tǹg ê時chūn，飯kám有食完？」

「M̄-koh，青青食bōe落--去-a，無好食--a。青青感覺糖á khah好食--a。」青青感覺chiok委khut--ê，i ê嘴唇khiàu kah ē-tàng掛5斤豬肉。

Ia̍h-á koh講：「你昨暗食飯ê時chūn，m̄-nā無kā飯食完，koh phak tiàm桌á頂哭kah chiâⁿ委曲，koh thàn ma-ma kap pa-pa無注意ê時chūn，偷偷á kā埔鹽ê a媽kap a公種ê hô͘-lin豆倒落去pùn-sò桶內底，koh騙ma-ma，講你食liáu--去-a，soah去hō͘ ma-ma發現，tio̍h--無？」

「Siáⁿ-mi̍h！Kā我chhiⁿ-gèng-gèng ê兄弟姊妹偷倒掉，苦憐ê hô͘-lin豆，悲哀ê hô͘-lin豆--o͘！」Hô͘-lin豆chiaⁿ ná唱哭調á，ná chhit i ê目sái，i頭殼頂ê花m̂ koh khàm tī i ê目chiu前--a。

Ia̍h-á nah ē chiah厲害，siáⁿ-mi̍h代誌 lóng知--neh？青青想tio̍h昨暗ma-ma siūⁿ氣ê話：「你實在chiok thó-chè--ê，koh講pe̍h-chha̍t，ta̍k kang食飯lóng to̍h-ài食2、3點鐘，chiok顧人怨--ê！Ma-ma kap pa-pa無ài ti̍h--你-a，beh kā你tàn tiàm路邊，送hō͘別人做kiáⁿ。」

結果，青青kāng款sûi大聲mà-mà-háu，ná哭ná睏--去，想bōe kàu thàu早chi̍t醒--來，ka-kī soah無倒tiàm房間內ê眠床頂，soah倒tī chit個chhiⁿ-hūn ê田園，kám講ma-ma真正無ài ti̍h--i-a？青青chhoah-chi̍t-tiô，koh大聲háu--出-來-a。

(這篇文章 iáu-bōe soah,後禮拜歡迎繼續收看。)