《耶穌言行錄》

| | | 轉寄

Tē-82-chiuⁿ,Chiú-kóaⁿ lâng la̍p-chîⁿ

作者 Ko Kim-seng. 2009.11.01

（Má-khó 12：41-44；Lō͘-ka 21：1-4）
Ū chi̍t ji̍t，Iâ-so͘ tī khò͘-pâng tùi-bīn teh chē，khòaⁿ-kìⁿ chèng-lâng ēng gûn la̍p-lo̍h khò͘-pâng，hó-gia̍h ê lâng la̍p chōe-chōe.Ū chi̍t ê sòng-hiong ê chiú-kóaⁿ lâng lâi la̍p chi̍t lî nā-tiāⁿ.Iâ-so͘ chiū kā ha̍k-seng kóng，"Chit ê sòng-hiong ê chiú-kóaⁿ lâng la̍p-lo̍h khò͘-pâng pí chèng-lâng khah-chōe.In-ūi chèng-lâng sī chiong ū chhun ê chîⁿ-châi lâi la̍p，chit ê chiú-kóaⁿ lâng chiū-sī chiong i só͘ ū ê lóng-chóng lâi la̍p，"án-ni sǹg sī choân ke-gia̍p.

Lūn tôe-iân la̍p hō͘ Siōng-tè，bô-lūn chōe-chió，iàu-kín tio̍h o̍h chit ê chiú-kóaⁿ lâng ê chīn-sim chhut-la̍t，án-ni Siōng-tè chiū hoaⁿ-hí，chhin-chhiūⁿ Sèng-keng kóng，"Lín tôe-gûn ta̍k lâng tio̍h chiàu sim só͘ hoaⁿ-hí—ê，m̄-sái iu-būn，m̄-sái bián-kióng，in-ūi Siōng-tè sī thiàⁿ hit hō hoaⁿ-hí tôe ê lâng. "

La̍p-chîⁿ hō͘ Siōng-tè tio̍h chiàu Siōng-tè só͘ hō͘ lán ê khùi-la̍t，Siōng-tè hō͘ lâng chōe-chōe，lâng hoán-tńg la̍p chió，Sèng-chheh sǹg sī chhin-chhiūⁿ chòe-chha̍t chhiúⁿ Siōng-tè ê chîⁿ-châi.Kiám-chhái Siōng-tè hō͘ lán ê khùi-la̍t chin sió-khóa，lán tio̍h la̍p sió-khóa；nā chīn khùi-la̍t，chiū m̄-sái kiàn-siàu，in-ūi Sèng-chheh kóng，"Lâng hoaⁿ-hí chòe，chiū tit-tio̍h chiap-la̍p，chiàu i só͘ ū，m̄-sī chiàu i só͘ bô. "

思羅安台語點字網站