《耶穌言行錄》

| | | 轉寄

Tē-53-chiuⁿ,Īⁿ-pang ê hū-jîn-lâng

作者 Ko Kim-seng. 2009.04.12

（Má-thài 15：21-28；Má-khó 7：）
Iâ-so͘ khì Chhui-lô Se-tùn ê kéng-lāi.Ū chi̍t ji̍t kap ha̍k-seng the kiâⁿ lō͘，tú-tio̍h chit ê Ka-lâm hū-jîn-lâng kiû Iâ-so͘ kóng，"Chú ah，Tāi-pi̍t ê hō͘-è，khó-lîn góa；góa ê cha-bó͘-kiáⁿ hoān-tio̍h siâ-sîn，put-chí kan-khó͘. " Iâ-so͘ m̄ ìn i. Ha̍k-seng kóng，"Hū-jîn-lâng tī āu-bin the kiò，thang kah I khì. " Iâ-so͘ kóng，"Góa hōng-chhe sī beh kiù Í-sek-lia̍t ke sit-lo̍h ê iûⁿ. " Hit ê jū-jîn-lâng thiaⁿ-kìⁿ Iâ-so͘ kóng án-ni，koh chìn-chêng lâi pài Iâ-so͘，kiû kóng，"Chú tio̍h pang-chān góa. " Iâ-so͘ in kóng，"The̍h sòe-kiáⁿ ê piáⁿ，hiat hō͘ káu sī m̄-tio̍k. "

Iû-thài lâng lia̍h īⁿ-pang chhin-chhiūⁿ káu，só͘-í Iâ-so͘ ēng hit kù ōe lâi chhì hū-jîn-lâng ê sim.

Hū-jîn-lâng thiaⁿ-kìⁿ Iâ-so͘ kóng án-ni，bô siū-khì，i kam-goān jīn ka-kī sī pi-chiān，Iû-thài lâng sī chun-kùi；koh chai Iâ-so͘ ū tōa koân-lêng，ū lîn-bín lâng ê sim，só͘-í kóng，"Chú án-ni tio̍h；chóng-sī sòe-kiáⁿ chia̍h-liáu，toh-ê ka-la̍uh ê piáⁿ-sut，káu ia̍h ōe-tit-thang chia̍h. " Iâ-so͘ thiaⁿ-kìⁿ hū-jîn-lâng kóng chit kù ōe，chiū kóng，"Hū-jîn-lâng，lí ê sin tōa，chiàu lí ê ì-ài thang tit-tio̍h. " Tùi hit-tia̍p cha-bó͘-kiáⁿ hó.

Hū-jîn-lâng tò-khì，khòaⁿ-kìⁿ cha-bó͘-kiáⁿ an-jiân tó tī bîn-chhn̂g--nih，chai kúi í-keng chhut.

Lán khòaⁿ chit ê só͘-chāi só͘ kì-chài，tio̍h chai lán ū sím-mi̍h khiàm-kheh，beh kiû Iâ-so͘，eng-kai tio̍h o̍h chit ê hū-jîn-lâng ê sin，thun-lún，pek-chhiat. Lâng siat-sú ōe án-ni，tek-khak ōe tit-tio̍h Chú ê lîn-bín si-un.

思羅安台語點字網站