《耶穌言行錄》

| | | 轉寄

Tē-50-chiuⁿ,Iok-hān chhe ha̍k-seng，Hi-lu̍t thâi Iok-hān

作者 Ko Kim-seng. 2009.03.22

(Má-thài 11:2-6，14:1-12; Má-khó 6:14-29;Lō͘-ka 7:18-23).
Iâ-so͘ kóng tō-lí ê sî，Iok-hān iáu tī kaⁿ nih.Tùi i koaiⁿ-kaⁿ liáu-āu bē bat khòaⁿ-kìⁿ Iâ-so͘，put-kò ū thiaⁿ-kìⁿ I kóng tō-lí，kiâⁿ sîn-jiah ê tāi-chì;chiū chhe nn̄g ê ha̍k-seng khì mn̄g Iâ-so͘，I si̍t-chāi sī Ki-tok á m̄-sī.Iok-hān í-keng ū bêng-bêng ê pîn-kù koat-toàn kan-chèng Iâ-so͘ sī Ki-tok，taⁿ siáⁿ-sū koh-chài mn̄g chit ê tāi-chì？"Ū lâng phah-sǹg Iok-hān iàu-kín ê ì-sù beh kà-sī ha̍k-seng.Khah bêng-pe̍k ê ha̍k-seng í-keng siū i ê kan-chèng khì tè Iâ-so͘;nā-sī iáu ū ha̍k-seng bōe bêng-pe̍k，Iok-hān ēng chit hō ê hoat-tō͘ hō͘ in bêng Iâ-so͘ ê tāi-chì.Kiám-chhái Iok-hān lio̍h-lio̍h-á ū chit hō ì-sù，iáu-kú chiàu lán khòaⁿ，Iâ-so͘ só͘ ìn ê ōe m̄-nā chí ha̍k-seng，ia̍h sī chí Iok-hān pún-sin.Ū lâng phah-sǹg Iok-hān tú-tio̍h kan-khó͘，sim-koaⁿ khòa-lū siūⁿ kè-thâu，i ê sìn chiām-sî jia-pè，só͘-í chhe lâng khì mn̄g Iâ-so͘ chit ê tāi-chì，sī ài tit-tio̍h ka-kī ê sim koh-chài bêng-pe̍k.Kiám-chhái tāi-chì sī án-ni，iáu-kú khah tōa-pòaⁿ káⁿ m̄-sī.Koh ū lâng phah-sǹg Iok-hān ka-kī lóng bô gî-ngái Iâ-so͘ sī Ki-tok，to̍k-to̍k sī tiû-tû Iâ-so͘ ê só͘ kiâⁿ;m̄-chai in-ūi siáⁿ-sū iân-chhiân kàu chiah kú，bô liâm-piⁿ kā chèng-lâng kóng I sī Ki-tok.Iok-hān phah-sǹg Iâ-so͘ chū-khiam siūⁿ kè-thâu，ài pek I tio̍h khah kín hō͘ chèng-lâng chai I sī Ki-tok.Nā-sī án-ni，Iok-hān ê ì-sù sui-jiân ū thàiⁿ Iâ-so͘，ài lâng jīn I chòe Kiù-chú，iáu-kú ū ，chham hit ê chhiàm-koân ê m̄-tio̍h.Chhin-chhiūⁿ Iâ-so͘ ê lāu-bú，tī Ka-ná ê siann5ai3 Iâ-so͘ háin-bêng I ê tōa koân-lêng；án-ni Iâ-so͘ só͘ ìn Iok-hān ê ōe lō͘-bé kù kàⁿ ū lio̍h-hio̍h-á pau-hâm chek-pī ê ì-sù.Iâ-so͘ kā Iok-hān ê ha̍k-seng kóng，"Lín tio̍h chiong só͘ khòaⁿ-kìⁿ，só͘ thiaⁿ-kìⁿ ê，khì kā Iok-hān kóng，Chhiⁿ-mî ê khòaⁿ-kìⁿ，pái-kha ê ōe kiâⁿ，thái-ko-ê ōe chheng-khì，sí ê ōe koh-oa̍h，sòng-hiong ê ōe thiaⁿ hok-im ê tō-lí;hoān-nā bô khì-hiâm góa ê ū hok-khì. "Iok-hān ê ha̍k-seng tò-khì liáu，Iâ-so͘ chiū thê-khí Iok-hān ê tāi-chì，tōa o-ló í kóng.Sī Siōng-tè só͘ chhe ê lâng，koh chek-pī Hoat-lī-sài kap tha̍k-chheh lâng，in-ūi m̄-sìn Iok-hān só͘ kóng ê tō-lí.

Bô jōa-kú tú-tio̍h Hi-lu̍t ông siⁿ-ji̍t，siat iân chhiáⁿ lóng-chóng ê koaⁿ kap chun-kùi ê lâng.

Hi-lu̍t ê hū-jîn-lâng miâ kiò Hi-lô-tí，ū chi̍t ê cha-bó͘-kiáⁿ，jip8lai5 thiàu-bú hō͘ lâng khòaⁿ.Hit sî ，Hi-lu̍t ông chin hoaⁿ-hí，kiò cha-bó͘-kiáⁿ lâi，beh siúⁿ i，kóng，"Hoān lí só͘ kiû，góa hō͘ lí，"koh chiù-chōa kóng，"Góa tio̍h cháiⁿ-iūⁿ kiû？"Hi-lô-tí chá loān-lûn kè i ê peh，āu-lâi pàng-sak tiōng-hu kè sió-chek，hō͘ Iok-hān chek-pī.Hi-lô-tí chiū put-chí oàn-hūn Iok-hān，ài hō͘ i sí;taⁿ thiaⁿ-kìⁿ i ê cha-bó͘-kiáⁿ só͘ kóng ê ōe，chiū sēng ki-hōe，kah i tùi Hi-lu̍t kóng，"Kiû Iok-hān ê thâu. "Cha-bó͘-kiáⁿ thaiⁿ-kìⁿ lāu-bú ê ōe lóng bô kiaⁿ，hoán-tńg hoaⁿ-hí，án-ni thang chai sī o̍h i lāu-bú ê khoán-sit.Cha-bó͘-kiáⁿ kín-kín khì kā ông kóng，"Góa ài kiâⁿ sóe-lé Iok-hān ê thâu-khak，pôaⁿ-téng chek-sî siúⁿ-sù.
"Ông hoân-ló，nā-sī í-keng chiù-chōa，koh in-ūi tâng toh ê lâng tī-teh，chiah hoan-hù hō͘ i，chhe lâng khì kaⁿ Iok-hān chám-siú，hē thâu-khak tī pôaⁿ nih，lâi hō͘ cha-bó͘ gín-á liâm-piⁿ hō͘ lāu-bú.

Iok-hān ê ha̍k-seng kàu，siu sin-si chong i，chiū khì kā Iâ-so͘ kóng.

Hi-lu̍t chòe chit ê tāi-chì liáu-āu，sim lóng bōe pêng-an；thiaⁿ-kìⁿ Iâ-so͘ kiâⁿ chōe-chōe sîn-jiah chiū kóng，"Che sī kiâⁿ sóe-lé Iok-hān sí lâi koh-oa̍h，chiah ū kiâⁿ koh-iūⁿ ê koân-lêng. "
Chhin-chhiūⁿ Sèng-chheh só kóng，"Kiâⁿ pháiⁿ ê lâng sui-bóng bô lâng ji̍p，ia̍h ka-kī the cháu. "

Tùi chit ê tāi-chì lán tio̍h chai khǹg oàn-hūn lâng ê sim，sī hō͘ Mô͘-kúi ū phāng thang bê-he̍k;hit hō lâng ná hoān-chōe ná siong-tiōng，só͘-í Sèng-chheh kóng，"Oàn-hūn hiaⁿ-tī ê lâng，chōe kap thâi lâng pîⁿ-pîⁿ. "

思羅安台語點字網站