《耶穌言行錄》

| | | 轉寄

Tē-49-chiuⁿ,Iâ-so͘ i-hó hū-jîn-lâng ê pīⁿ，hō͘ cha-bó͘ gín-ná koh-oa̍h

作者 Ko Kim-seng. 2009.03.15

(Má-thài 9:18-26;Má-khó 5:21-43， 6:1-6;Lō͘-ka 8:41-56).
Ū chi̍t ê koán ho̍e-tn̂g ê，miâ Gâi-ló͘，i ū chi̍t ê ko͘-toaⁿ cha-bó͘-kiáⁿ，tú-á cha̍p-jī hè，phòa-pīⁿ put-chí siong-tiōng，pē-bú phah-sǹg i tek-khak sí.Gâi-ló͘ khì kiû Iâ-so͘ lâi kiù i.Iâ-so͘ kap i khì.Kiâⁿ tit-beh kàu，chōe-chōe lâng tè I，pek-kūn saⁿ-khoeh，sī ài khòaⁿ Iâ-so͘.Chiông-tiong ū chi̍t ê hū-jîn-lâng，í-keng phòaⁿ-pīⁿ cha̍p-jī nî kú，bat hō͘ chōe-chōe i-seng i，ke-hé phòa-liáu，nā-sī i ê pīⁿ ê sè-bīn hoán-tńg khah tāng.Thiaⁿ-kìⁿ Iâ-so͘ ê saⁿ-á-ku，ka-kī phah-sǹg nā bong chiū hó.Bong kiáu pīⁿ kó-jiân hó.Iâ-so͘ oa̍t-thâu kóng，"Chī-chūi-á bong góa ê saⁿ？
"Ha̍k-seng kóng，"Sian-siⁿ，chèng-lâng oe-khoeh lí，chiū mn̄g chī-chūi-á bong góa mah？"Iâ-so͘ sì-ûi khòaⁿ，ài khòaⁿ kiâⁿ án-ni ê hū-jîn-lâng.Hū-jîn-lâng chai i seng-khu só͘ keng-kè ê tāi-chì，bōe khǹg-ba̍t tit，chiū chìn-chêng phak-teh，lóng siông-sè kóng.Iâ-so͘ kā i kóng，"Lí sìn i-hó lí，an-jiân tò-khì，lí ê pīⁿ hó lah. "Lán ê chōe sī chhin-chhiūⁿ put-chí tāng ê pīⁿ，Iâ-so͘ í-góa bô lâng ōe I;só͘-í tio̍h o̍h chit ê hū-jîn-lâng ê sìn lâi chiū-kūn Iâ-so͘，chiah ōe tit-tio̍h thoat-lī chōe-ok ê kan-khó͘.Iâ-so͘ the kóng ê sî，lâng tùi Gâi-ló͘ ê chhù lâi pò kóng，"mi̍h-sái tio̍h-bôa sian-siⁿ，cha-bó͘ gín-ná í-keng sí lah. "Iâ-so͘ thiaⁿ-kìⁿ，chiū kā Gâi-ló͘ kóng，"Bo̍h-tit kiaⁿ，to̍k-to̍k tio̍h sìn. "

Iâ-so͘ chí-ū chún Pí-tek，Ngá-kok，Iok-hān chí saⁿ lâng tè I kiâⁿ.

Kàu chhù khòaⁿ lâng tōa siaⁿ thî-khàu，Iâ-so͘ kóng，"Siáⁿ-sū tōa siaⁿ thî-khàu？cha-bó͘-kiáⁿ m̄-sī sí，sī khùn nā-tiāⁿ. "Lâng chhiò I，in-ūi m̄-chai Iâ-so͘ ū koân-lêng ōe hō͘ i koh-oa̍h.Iâ-so͘ kah chèng-lâng chhut-khì，chiū chhōa gín-ná ê pē-bú kap tè I ê lâng ji̍p gín-ná ê pâng，chiū khan cha-bó͘ gín-ná ê chhiú kóng，"Cha-bó͘ gín-ná khí-lâi. "Hit ê gín-ná liâm-piⁿ khí-lâi，iû-goân hó-hó.Iâ-so͘ kah i ê pē-bú ēng mi̍h hō͘ i chia̍h.

Lán tio̍h o̍h Gâi-ló͘ ê khoán-sit，ke-lāi ê lâng kiám-chhái phòa-pīⁿ，á-sī sím-mi̍h hō ê kan-khó͘，tio̍h thòe i ê kî-tó.Tē-it iàu-kín tio̍h pek-chhait kiû Iâ-so͘ si-lo̍h un-tián，têng-thâu-siⁿ ke-lāi lâng ê sim chhin-chhiūⁿ hō͘ in tùi sí koh-oa̍h chi̍t-poaⁿ-iūⁿ.Iâ-so͘ hō͘ Gâi-ló͘ ê cha-bó͘-kiáⁿ koh-oa̍h，koh bô lōa-kú chiah khì Ná-sat-le̍k.Iân-lō͘ kiâⁿ koh-iūⁿ ê sîn-jiah，kóaⁿ siâ-sîn，i-pīⁿ，hō͘ chhiⁿ-mî ba̍k-chiu kng.Iâ-so͘ tī Ná-sat-le̍k ê sî ji̍p hōe-tn̂g kà-sī lâng，chiah ê lâng put-chí kî-koài kóng，"Chit ê lâng thai，2-thó ōe tit-tio̍h kàu chiah tì-hūi？chit ê kiám m̄-sī ba̍k-kang ê kiáⁿ mah？cháiⁿ-iūⁿ ōe kàu chiah chhang-miâ？"Hiah ê lâng lia̍h I chòe lâng nā-tiāⁿ，m̄-chai I ia̍h sī Siōng-tè ê Kiáⁿ，só͘-í kóng chit hō ōe.

思羅安台語點字網站