《耶穌言行錄》

| | | 轉寄

Tē-41-chiuⁿ,Hoat-lī-sài lâng húi-pòng Iâ-so͘ óa-khò kúi-ông

作者 Ko Kim-seng. 2009.01.18

(Má-thài 12:22-45;Lō͘-ka 11:14-26).
Ia-so͘ tī sè-kan ê sî，kiâⁿ chōe-chōe sîn-jiah，i-piⁿ，kóaⁿ-kúi，páiu-bêng I sī Siōng-tè ê Kiáⁿ.Hoat-lī-sài lâng sui-jiân khòaⁿ-kìⁿ，kò͘-ì m̄-sìn，húi-pòng Iâ-so͘ kóng，"I sī óa-khò kúi-ông，chiah kóaⁿ-kúi. "Iâ-so͘ ēng put-chí tāng ê ōe kéng-kài，koh mn̄g，"Siat-sú Sat-tàn kóaⁿ Sat-tàn，chiū-sī ka-kī saⁿ oan-ke，i ê kok thái-thó khiā ōe tiâu？"Iâ-so͘ koh siat phì-jū kóng，"Siâ-sîn lī-khui lâng，kiâⁿ-iû khòng-hān ê tōe，chhē an-hioh ê só͘-chāi，bōe tit-tio̍h，kóng，"góa beh tò-khì só͘ chhut-lâi ê chhù；kàu，chiū khòaⁿ-kìⁿ í-keng piàⁿ-sàu chôe-chéng；sûi-sî khì koh chhōa chhit ê sîn pí ka-kī khah pháiⁿ，ji̍p-lâi khiā-khí；hit ê lâng lō͘-bé hoān-tio̍h，pí tāi-seng koh-khah chhám. "Iâ-so͘ koh kóng，"Chit ê pháiⁿ sè-tāi ia̍h chhin-chhiūⁿ án-ni. "

Iû-thài lâng kú-kú hō͘ Mô͘-kúi tī-lí，kàu Iâ-so͘ lâi kóng tō-lí，kiâⁿ sîn-jiah，khǹg in tio̍h hoán-hóe；hit-sî Mô͘-kúi sit-lo̍h koân，phì-jū chhin-chhiūⁿ hit ê siâ-kúi lī-khui lâng ê seng-khu.Iû-thài cho̍k nā thàn ki-hōe hoán-hóe chōe，sêng-siū Iâ-so͘ ê kà-sī，sêng-si̍t jīn I cgoe3 Kiù-chú，chiū tit-tio̍h ke̍k tōa ê hok-khì；khó-sioh m̄ chiap-la̍p I，hoán-tńg kū-choa̍t I，chiū lō͘-bé chhám kàu-ke̍k.Lâng nā sêng-si̍t chiap-la̍p Iâ-so͘ chiū bô koh hō͘ Mô͘-kúi tī-lí；nā m̄-khéng chiap-la̍p，Mô͘-kúi ōe koh-chài lâi pé-pa̍k hit ê lâng koh-khah tiâu.

Lán tha̍k chit ê phì-jū èng-kai tio̍h chai ka-kī pún ia̍h sī án-ni hō͘ Mô͘-kúi koán-hat；nā bô tit-tio̍h Iâ-so͘ chín-kiù，chiū bōe thoat-lī tī i ê chhiú.Ū chōe-chōe lâng bat thiaⁿ Iâ-so͘ ê hok-im，bêng-bêng chai tio̍h cháiⁿ-iūⁿ chòe，koh ài chòe，to̍k-to̍k sū óa-khò ka-kī ê khùi-la̍t，bô óa-khò Iâ-so͘，sui-jiân ū iok-sok ka-kī bián-lē kiâⁿ hó，ia̍h bōe kú-tn̂g.Chit hō lâng chin-chiàⁿ chhin-chhiūⁿ phì-jū só͘ kóng：Mô͘-kúi sui-bóng chiām-sî lī-khui，sim bē bat ōaⁿ-sin，Mô͘-kúi ōe koh-chài kàu，in-ūi chai lâng nā bô óa-khò Iâ-so͘ bōe iâⁿ i.

Lán tio̍h pek-chhiat kiû Sèng Sîn tiàm tī lán ê sim，chiū bián-tit hō͘ Mô͘-kúi bê-he̍k，hām-lo̍h chōe.

思羅安台語點字網站