《耶穌言行錄》

| | | 轉寄

Tē-40-chiuⁿ,Pháiⁿ ê hū-jîn-lâng siū sià-bián

作者 Ko Kim-seng. 2009.01.11

(Lō͘-ka 7:36-50)
Ū chi̍t ê Hoat-lī-sài lâng miâ Se-bûn，chhiáⁿ Iâ-so͘ kap i saⁿ- kap chia̍h.Iâ-so͘ chiū ji̍p i ê chhù chē-toh.Siâⁿ-lāi ū chi̍t ê hū-jîn-lâng pêng-sò͘ sī hoān-chōe ê lâng，i chai Iâ-so͘ chē toh tī Hoat-lī-sài lâng ê chhù，chiū chiong chi̍t ge̍k-koàn ê hiuⁿ-iû tòa lâi，khiā tī Iâ-so͘ ê ka-chiah-āu，the thî-khàu lâu ba̍k-sái tih-tâm Iâ-so͘ ê kha，ēng thâu-mn̂g lâi chhit，koh chim I ê kha，ēng hiuⁿ-iû lâi boah.

Hit sî Iû-thài lâng chē toh ê khoán-sit sī pòaⁿ-chhiâ-goa̍t，kha khiau tī āu-bīn；só͘-í lâng tī āu-bīn ōe-tit óa i ê kha.

Só͘ chhiáⁿ Iâ-so͘ ê Hoat-lī-sài lâng khòaⁿ-kìⁿ chit ê tāi-chì，sim-lāi siūⁿ kóng，"Chit ê lâng nā-sī sian-ti lâng tek-khak ōe chai bong I ê hū-jîn-lâng sī chī-chūi，ia̍h sī sím-mi̍h hō ê lâng，in-ūi i pêng-só͘ sī hoān-chōe ê lâng. "Iâ-so͘ chiū kā hit ê Hoat-lī-sài lâng kóng，"Se-bûn ah，góa ū chi̍t kù ōe ài kā lí kóng.”Ìn kóng，"Chhiáⁿ Sian-siⁿ kóng.”Iâ-so͘ chiū kóng，"Ū chi̍t ê chè-chú，nn̄g lâng khiàm i gûn，chi̍t lâng khiàm sì gō͘-cha̍p niú，chi̍t lâng gō͘ niú；nn̄g lâng lóng bô gûn thang hêng，gûn-chú chiū chòe chi̍t-ē sià-bián in ê chè；taⁿ chhiáⁿ lí kóng chí nn̄g lâng tah-lo̍h chi̍t ê khah thiàⁿ chè-chú？"Se-bûn ìn kóng，"Góa phah-sǹg bô chhò. "Iâ-so͘ oa̍t thâu chí hit ê hū-jîn-lâng kóng，"Góa ji̍p lí ê chhù，lí lóng bô ēng chúi hō͘ góa sóe kha，nā-sī chit ê hū-jîn-lâng ēng ba̍k-sái lâi sóe góa ê kha，ēng thâu-mn̂g lâi chhit；lí lóng bô kā góa chim-chhùi，nā-sī nā-sī chit ê hū-jîn-lâng tùi góa ji̍p-lâi ê sî，chim góa ê kha bô soah；lí lóng bô ēng iû lâi boah góa ê thâu-khak，nā-sī chit ê hū-jîn-lâng ēng hiuⁿ-iû lâi boah góa ê kha.Só͘-í góa kā lí kóng，i ê chōe-kòa chōe-chōe sià-bián，in-ūi i put-chí thiàⁿ góa，lâng nā tit-tio̍h sió-khóa ê sià-bián，i ê thiàⁿ-thàng ia̍h sī sió-khóa. "

Chit ê hū-jîn-lâng tit-tio̍h tōa ê sià-bián，só͘-í i ê thiàⁿ-thàng ia̍h tōa.Iâ-so͘ chiū tùi hū-jîn-lâng kóng，"Lí ê chōe sià-bián lah. " Tâng chē toh ê lâng saⁿ-kap gī-lūn kóng，"Chit ê sū sím-mi̍h lâng ōe sià-bián chōe？"Iâ-so͘ koh kā hit ê hū-jîn-lâng kóng，"Lí ū sìn，chiah ū tit-tio̍h kiù；taⁿ thang pêng-an tò-khì. "

Lán khòaⁿ chit ê hū-jîn-lâng pí chhiáⁿ Iâ-so͘ ê Se-bûn kap tâng chē toh ê lâng khah-iâⁿ，in-ūi i ōe chai ka-kī ê m̄-tio̍h，ia̍h ū chhim-chhim hoán-hóe；koh chai Iâ-so͘ ōe sià-bián chōe，só͘-í ēng khiam-sùn ê sim lâi chiū-kūn I.Koh i ，thiàⁿ Chú ê sim ia̍h khah-iâⁿ tī Se-bûn，in-ūi Se-bûn sui-bóng chhiáⁿ Iâ-so͘，nā-sī hū-jîn-lâng si̍t-chāi ū hián-bêng i ê chīn-sim.In-ūi m̄ tān-nā chòe chhin-chhiūⁿ lô͘-po̍k lâi sóe Iâ-so͘ ê kha，ia̍h koh chhin-chhiūⁿ chim I，ēng put-chí kùi ê hiuⁿ-ko boah I；chiok-kiàn i ê thiàⁿ-Chú，m̄-sī Se-bûn só͘ ōe pí-phēng tit.I kì-jiân ū hián-bêng sêng-si̍t thiàⁿ Chú ê pîn-kù，chiū tit-tio̍h Chú ê o-ló pí chèng-lâng ia̍h khah tōa，chhin-chhiūⁿ chit só͘-chāi Chú chí-ū tùi i chi̍t lâng kóng，"Lí ê sìn kiù lí，an-jiân tò-khì. "

Chit chiuⁿ só͘ kì-chài ê tāi-chì sī kà-sī lán kúi-hnag7 ê tō-lí.chi̍t hāng，put-chí tāng chōe ê lâng m̄-sái sit-chì，Iâ-so͘ ōe kiù i.Koh chi̍t hāng，ài Iâ-so͘ kiù lán，tio̍h chai ka-kī ê chōe，chhim-chhim hoán-hóe lâi óa-khò Iâ-so͘.Iū chi̍t hāng，lán kì-jiân hō͘ Iâ-so͘ kiù，tio̍h hián-bêng kám-un ê sim put-chí thiàⁿ Iâ-so͘.

思羅安台語點字網站