《耶穌言行錄》

| | | 轉寄

Tē-38-chiuⁿ,Thiaⁿ tō-lí ê koan-hē

作者 Ko Kim-seng. 2008.12.28

(Má-thai 11:20-28；Lō͘-ka 10:10-22)
Iâ-so͘ tī Ko-lia̍p-sìn，Pek-sài-tāi，Ka-pek-lông ta̍uh-ta̍uh kóng tō-lí，kiâⁿ sîn-jiah；kàu bé lâng bô hoán-hóe，Iâ-so͘ chiū chek-pī kóng in ū chai-ē，ia̍h sím-phòaⁿ ê ji̍t in ê hêng-hoa̍t pí Chhui-lô Se-tùn，Só͘-to-má tng koh-khah bōe khí.

Lán khòaⁿ Iâ-so͘ chek-pī chí kúi-nā ê siâⁿ，ū thang chòe lán ê kàm-kài，chiū-sī lán ū ki-hōe thang thiaⁿ tō-lí，ia̍h ū Sèng-chheh thang láng-kiù，làu-gia̍h thang chai Iâ-so͘ chin-chiàⁿ sī Kiù-chú；lán nā lia̍h chit ê tāi-chì chòe bô iàu-kín，lán ê koan-hē pí chōe-chōe bē siū tō-lí ê lâng khah tōa；chhin-chhiūⁿ Iâ-so͘ ū kóng，"Hoān-nā chōe-chōe hō͘ i，tek-khak tùi i thó chōe-chōe. "

Iâ-so͘ ū siat-li̍p chhit-cha̍p lâng，hō͘ in khì thoân tō-lí；hia ê lang5to2-lâi，sin put-chí joaⁿ-hí hê-hok Iâ-so͘，kóng，"Chú ah，óa-khò lí ê miâ，kúi ia̍h hâng-ho̍k goán. "Iâ-so͘ kóng，"Bo̍h-tit in-ūi án-ni lâi hoaⁿ-hí，tio̍h lia̍h lín ê miâ lì tī thiⁿ-nih chòe hoaⁿ-hí. "Iâ-so͘ án-ni kà-sī，hō͘ lán chai tē-it thang hoaⁿ-hí ê tāi-chì，chiū-sī hō͘ Siōng-tè kì lán ê miâ tī oa̍h-miā ê chheh.

Hit-sî Iâ-so͘ sim-lāi hoaⁿ-hí kóng，"Pē ah，thiⁿ-tōe ê Chú，góa o-ló Lí；in-ūi Lí chiong chit ê tō-lí tùi ū tì-hūi，ū châi-lêng ê lâng khǹg-ba̍t；nā-sī tùi sòe-kiáⁿ chiū hián-bêng；si̍t-chāi ah，Pē lí hó ê ì-sù chin-chiàⁿ án-ni. "Chit só͘-chāi só͘ kì-chài sī lán ê Chú Iâ-so͘ siūⁿ kàu Siōng-tè chàiu ka-kī hó ê ì-sù khoán-thāi lâng，lâi thòe siū-un ê lâng chhíⁿ-gō͘，m̄-thang óa-khò ka-kī ê tì-sek；tio̍h khiam-pi chin-chhiūⁿ sòe-hàn ê gín-ná，chiah thang ǹg-bāng Siōng-tè ê un-tián，chhin-chhiuⁿ Si-phian kóng，"Un-jiû ê lâng tek-khak ēng gī chhōa i，ēng tō-lí kà-sī i. "

思羅安台語點字網站