《耶穌言行錄》

| | | 轉寄

Tē-37-chiuⁿ,Ná-in ê chiú-kóaⁿ lâng

作者 Ko Kim-seng. 2008.12.21

（Lō͘-ka 7:11-17）
Kè-ji̍t，Iâ-so͘ khì chi̍t ê siâⁿ miâ Ná-in，I ê Ha̍k-seng chham chōe-chōe lâng kap I saⁿ-kap khì.Kūn siâⁿ-mn̂g tú-tio̍h lâng kng sí-lâng chhut；sí-lâng ê lāu-bú sī chiú-kóaⁿ lâng，ko͘-toaⁿ siⁿ chi̍t ê kiáⁿ nā-tiaⁿ；siâⁿ-nih ê peh-sìⁿ chōe-chōe sàng-chòng.Chú khòaⁿ-kìⁿ sí-lâng ê lāu-bú lîn-bín i，kā i kóng，"Bo̍h-tit thî-khàu. "Chiū kūn-óa lâi kóng，"Siàu-liân lâng ah，góa kā lí kóng，Tio̍h khí—lâi. "Hit ê sí-lâng chiū khí-lâi chē，koh kóng-ōe；Iâ-so͘ chiong i kau hō͘ i ê lāu-bú.Chèng-lâng kiaⁿ-hiâⁿ kui êng-kng tī SIōng-tè kóng，"Tōa ê sian-ti lâng ū heng-khí tī lán ê tiong-kan. "In o-ló Siōng-tè，chit hāng put-chí tio̍h，iáu-kú ū khiàm-kheh，in-ūi put-kò sī lia̍h Kiù-chú chòe sian-ti.Kî-si̍t Kiù-chú sian-ti cheng-choa̍h put-chí hn̄g.Peh-sìⁿ hit-sî káⁿ bat siūⁿ Í-lī-a，Í-lī-sa só͘ kiâⁿ.In sui-bóng bat hō͘ lâng tùi sí koh-oa̍h，m̄-sī tùi ka-kī ê koân-lêng，sī tùi pek-chhiat kî-tó.Iâ-so͘ tok8tok8 chhut ka-kī ê bēng-lēng，thang chai Iâ-so͘ chin-chiàⁿ sī Siōng-tè.

Lán khòaⁿ chāi-chá Kiù-chú hō͘ Ná-in ê siàu-liân lâng koh-oa̍h，si̍t-chāi sī kî-īⁿ ê sū，ia̍h sī chhut tī lâng ǹg-bāng ê í-gōa.Taⁿ lán chit-tia̍p hoān-chōe khoán-sit chin-chhiūⁿ sí，to̍k-to̍k thiaⁿ Kiù-chú ê siaⁿ，tit-tio̍h I têng-thâu-siⁿ lán ê sim，ia̍h ōe sǹg chòe sī tit-tio̍h koh-oa̍h ê lâng.Lán nā chai ka-kī tit-tio̍h chit hō ê un-tián，ēng-kai tio̍h chhim kám Siōng-tè ê un，chhin-chhiūⁿ hit-sî peh-sìⁿ ū kui êng-kng tī Siōng-tè.

思羅安台語點字網站