《耶穌言行錄》

| | | 轉寄

Tē-35-chiuⁿ,Iû-goân soaⁿ-téng kóng

作者 Ko Kim-seng. 2008.12.07

（Má-thài 7：13-28）.
Iâ-so͘ só͘ kóng ê tō-lí，lâi kóe-bêng Siōng-tè ê kài-lu̍t，Ta̍k lâng ê liông-sim ōe o-ló sī ke̍k hó ê kà-sī；nā-sī ta̍k lâng pún ê sim-sèng loán-jio̍k，ǹg sè-kan，thiàⁿ ka-kī，chiū oh-tit kiâⁿ kàu ha̍p Siōng-tè ê ì-sù；só͘-í Iâ-so͘ ēng oe̍h kap khoah ê mn̂g-lō͘ chòe phì-jū，kiò lán chhíⁿ-gō͘，chiū-sī kóng，" Èng-kai tùi oe̍h-mn̂g ji̍p；in-ūi thâu kàu tîm-lûn ê mn̂g khoah-khoah，lō͘ khòaⁿ-khǹg，chōe-chōe lâng ji̍p tī hia；thàu kàu oa̍h，mn̂g oe̍h，lō͘ sòe-tiâu，chió-chió lâng chhē ū tio̍h. "Chit ê tāi-chì hō͘ lán chai lâng tîm-lûn sī put-chí khoài ê tāi-chì，nā-sái thàn ka-kī ê pún-sèng nā-tiāⁿ；só͘-í phì-jū chèng-lâng só͘ ài kiâⁿ sī khoah-tōa ê lō͘.To̍k-to̍k tit-tio̍h kiù sī put-chí oh，chiū-sī pún-sèng tio̍h ōaⁿ sin lâi ǹg Siōng-tè，tio̍h pàng-sak ka-kī ê ì-sù，hoán-hóe kóe-pìⁿ chim-chiok thàn tō-lí；só͘-í phì-jū mn̂g sī oe̍h，lō͘ sī sòe-tiâu，ji̍p-khì kiâⁿ ê lâng chio；chiū-sī lâng nā bô sìn-khò Kiù-chú，siū Sèng Sîn ê kám-hòa，chiū lóng bōe kiâⁿ éng-oán-oa̍h ê lō͘.
Iâ-so͘ m̄-ài lán chhò-gō͘ kiâⁿ m̄-tio̍h lō͘ sit-lo̍h lêng-hûn，chiū kah lán tio̍h tî-hông ká ê sian-siⁿ.In kiám-chhái gōa-phê put-chí hó chhin-chhiūⁿ iûⁿ，ia̍h kóng hó-thiaⁿ ê ōe，iáu-kú sim-lāi chhin-chhiuⁿ chhâi-lông，m̄-thang hō͘ i bê-he̍k.Ài chai sian-siⁿ chin á-sī ké，tio̍h khòaⁿ in ê phín-heng sī hó á-ssi7 pháiⁿ；ia̍h tio̍h khòaⁿ in ê kà-sī sī ín-chhōa lâng kiâⁿ hó ho̍k-sāi Siōng-tè lī-ek lâng á-bô.Iâ-so͘ kóng，"Hó chhiū kiat hó ké-chí，pháiⁿ ê chhiū kiat pháiⁿ ê ké-chí，khòaⁿ ké-chí chiū ōe bat chhiū. "

Lán ia̍h tio̍h séng-chhat ka-kī ê sim-sèng，phín-hēng；m̄-thang phiàn ka-kī，phah-sǹg gōa-phê pài Siōng-tè sī kàu-gia̍h.Iâ-so͘ kóng，"Lâng chheng-ho͘ góa kóng，"Chú ah，"bô lóng-chóng ōe ji̍p thian-kok；to̍k-to̍k thàn góa Thiⁿ-pē ê chí-ì ê lâng ōe ji̍p. "Kàu sím-phòaⁿ ê ji̍t，Iâ-so͘ ōe kā m̄ sín-thàn ê lâng kóng，"Chòe m̄-hó ê lâng，góa m̄-bat lín；tio̍h lī-khui góa，chòe lín khì. "

Iâ-so͘ gī-lūn tō-lí put-chí siông-sè，chiū ēng khí chhù chòe phì-jū，kiat-bé chiū-sī kóng，"Thiaⁿ góa ê ōe lâi kiâⁿ i ê lâng，phì-jū chhin-chhiūⁿ ū tì-sek ê lâng khí chhù tī chio̍h-pôaⁿ téng；hō͘ lo̍h，chúi lâu，hong chhe tōng-tio̍h chhù ia̍h bōe tó，in-ūi tōe-ki hē tī chio̍h-pôaⁿ téng.Thiaⁿ góa ê ōe chiū m̄ kiâⁿ i ê lâng，phì-jū chhin-chhiūⁿ gōng-lâng khí chhù tī thô͘-soa téng，hō͘ lo̍h，chúi lâu，hong chhe tōng-tio̍h chhù，liâm-puⁿ chiū tó，hit ê tó sī siong-tiōng. "

Sèng-chheh pa̍t só͘-chāi chheng-ho͘ Iâ-so͘ cgoe3 chio̍h-pôaⁿ，koh kóng，Iâ-so͘ í-gōa bô miâ thang óa-khò tit-tio̍h kiù；só͘-í lán tio̍h sìn，óa-khò Kiù-chú Iâ-so͘，chiah ōe chhin-chhiūⁿ tì-sek ê lâng，khí kian-kò͘ ê chhù，kàu sím-phòaⁿ ê ji̍t ia̍h m̄-sái kiàn-siàu.Taⁿ tùi tah-lo̍h ōe chai sī sêng-si̍t óa-khò Kiù-chú á bô？chiū-sī tio̍h séng-chhat ka-kī，khòaⁿ ū sêng-si̍t hâng-ho̍k Iâ-so͘，thàn I ê kà-sī á bô.Nā bô thàn Kiù-chú，khì óa-khò pa̍t-mi̍h，chiū-sī chhin-chhiūⁿ gōng ê lâng khí chhù tī soa-nih，lō͘-bé chiū kiàn-siàu.

思羅安台語點字網站