《耶穌言行錄》

| | | 轉寄

Tē-34-chiuⁿ,Iû-goân sī soaⁿ-téng só͘ kóng—ê

作者 Ko Kim-seng. 2008.11.30

（Má-thài 6：19-7：12）.
Iâ-so͘ khó͘-khǹg ha̍k-seng m̄-thang chek-chū gia̍p tī tōe-nih；sè-kan ê hù-kùi put-chí khoài sit-lo̍h.Tio̍h chek-chū gia̍p tī thiⁿ-nih，chiū éng-oán bōe sit-lo̍h，bōe pāi-hoāi.Lán ê gia̍p chek-chū tī tah-lo̍h，lán ê sim-koaⁿ ia̍h ǹg tī hia.Siat-sú lán ê sim bô ǹg tī thiam-tông，lâi ǹg tī sè-kan，sī chhin-chhiūⁿ ba̍k-chiu hoe，sim-lāi ê kng pìⁿ chòe àm.Iâ-so͘ ēng chit hō ê phì-jū sī kà-sī lán m̄-thang chhiò-gō͘ chin ê tō-lí，tio̍h sòe-jī chiàu-kò͘ sim-sèng phín-hēng，him-bō͘ éng-oán oa̍h ê tāi-chì.

Lán o̍h Iâ-so͘ ê só͘ kiâⁿ，kui êng-kng tī Siōng-tè，chiàu ki-hōe lī-ek lâng，chit ê thang kiò-chòe chek-chū gia̍p tī thiⁿ-nih.Chhin-chhiūⁿ Iâ-so͘ pa̍t só͘-chāi ê ōe，chiū-sī kóng，"Tio̍h ēng put-gī ê chîⁿ-châi kiat-kau hó ê pêng-iu2chiu7 lín sòng-sit ê sî。Ōe hō͘ i chiap-la̍p tī kú-tn̂g ê chhù. "Iâ-so͘ koh kóng，"Chi̍t lâng bōe-ōe ho̍k-sāi nn̄g ê chú-lâng；kiám-chhái oàn chit-ê，thiàⁿ hit-ê；kiám-chhái kèng-tiōng chit-ê，khòaⁿ-khin hit-ê；lín bōe-ōe ho̍k-sāi Siōng-tè，sòa ho̍k-sāi chîⁿ-châi. " Iâ-so͘ ia̍h beh hō͘ lán m̄-sái khòa-lū cháiⁿ-iūⁿ thang chia̍h，cháiⁿ-iūⁿ thang lim，cháiⁿ-iūⁿ thang chhēng，chiū kóng，"Tio̍h khòaⁿ pe ê chiáu，bô chèng bô choh，Siōng-tè ia̍h chiàu-kò͘，lín liám bô khah kùi-khì chiáu mah？koh tio̍h khòaⁿ pek-ha̍p-hoe cháiⁿ-iūⁿ tōa châng，bô tio̍h-bôa，bô pháng-cheh；ia̍h chá Só͘-lô-bûn hâng-ngó͘ kàu-ke̍k，i ê saⁿ ê súi bōe ta̍t-tio̍h chit ê hoe ê chi̍t-lúi.Siōng-tè siōng-chhiáⁿ hō͘ hoe súi kàu án-ni，hô-hòng beh chiàu-kò͘ lín sió-khóa sìn ê lâng mah？

Lán kiâⁿ lō͘ kiám-chhái khòaⁿ hoe，á-sī chiáu，tio̍h kì-tit sī Siōng-tè chhòng-chō，ia̍h sī Siōng-tè the chiàu-kò͘；koh èng-kai chai Siōng-tè m̄-nā chiàu-kò͘ chiah ê mi̍h nā-tiāⁿ，ia̍h put-sî koh-khah tì-ì the chiàu-kò͘ lán.Hoe，chiáu m̄-sī kùi-khì ê mi̍h，lóng bô sim-sîn ōe hiáu-tit o-ló Siōng-tè，ia̍h bô lêng-hûn thang tit-tio̍h kiù.Hoe hoat-siⁿ，bô kú chiū siā；chiáu káu sí ia̍h soah.Lán sí bōe kóng soah，ū lêng-hûn ōe éng-oán tī-the.Só͘-í lán iáu-kú tiàm sè-kan ê sî，tio̍h kiû Siōng-tè ê kok kap gī，sè-kan ê tāi-chì m̄-sái khòa-lū，chiū só͘ yio̍h ēng ê mi̍h，Siōng-tè chū-jiân hō͘ lán.

Lán ê lâng siông-siông gâu hiâm pa̍t-lâng ê m̄-tio̍h，kiám-chhái ka-kī ê m̄-tio̍h tōa，ia̍h lóng bōe hiáu-tit siūⁿ，Iâ-so͘ tāng-tāng chek-pī lán chit hō ê khoán-sit，kéng-kài lán m̄-thang gí-gī lâng，kiaⁿ-liáu ōe hō͘ Siōng-tè gí-gī lán；koh kóng，"Kè hó ê lâng ah，tio̍h tāi-seng tû-khì ka-kī ba̍k-chiu-lāi ê îⁿ-á-chhâ，chiah ōe bêng-bêng khòaⁿ-kìⁿ thang tû-khì hiaⁿ-tī ba̍k-chiū-lāi ê chháu-á-iù. "

Iáu-kú m̄-thang iông-ún pháiⁿ-tāi tī kàu-hōe lâi.Lâng chin-chiàⁿ ū pháiⁿ ê phín-heng，tio̍h kek i chhut.Kap chit hō ê lâng kau-pôe chòe hiaⁿ-ti，sī bô lī-ek in，ia̍h kiám-chhái ōe hāi ka-kī.Iâ-so͘ kóng，"Bo̍h-tit chiong sèng ê mi̍h hō͘ káu，bo̍h-tit chiong lín ê chin-chu hiat hō͘ ti. "Pháiⁿ phín-hēng si̍t-chāi khó-ò͘ⁿ tī Siōng-tè ê bīn-chêng.

Iâ-so͘ í-keng kah lán m̄-thang khòa-lū āu-ji̍t ê sū，koh chí-sī lán chai Siōng-tè put-chí oán-hūn pháiⁿ-tāi；kiám-chhái ū lâng siūⁿ ka-kī ê pîn-chiān，bô lâng thang óa-khò，á-sī kiám-chhái siūⁿ ka-kī ê tāng chōe put-chí thang hō͘ Siōng-tè m̄-ti̍h，taⁿ ū sím-mi̍h lō͘ thang bián-tit sit-chì，m̄-sái khòa-lū？

Chiū-sī tio̍h chiong lóng-chóng ê tāi-chì pâi-lia̍t tī Thiⁿ-pē ê bīn-chêng，tit-tio̍h óa-khò I，kì-tit I ê thiàⁿ lán sī bān-pē khah iâⁿ pē-bú ê thiàⁿ.Iâ-so͘ kóng，"Kiû chiū hō͘ lín，chhē chiū tú-tio̍h，phah-mn̂g chiū kā lín khui. "Ia̍h koh kóng，"Lín ài lâng khoán-thāi lín cháiⁿ-iūⁿ，ia̍h tio̍h án-ni khoán-thāi lâng. "

思羅安台語點字網站