《耶穌言行錄》

| | | 轉寄

Tē-32-chiuⁿ,Iâ-so͘ tī soaⁿ-téng kóng tō-lí

作者 Ko Kim-seng. 2008.11.16

（Má-thài 5：1-6：4）
Ū chi̍t ji̍t，Iâ-so͘ chiūⁿ soaⁿ the chē，ha̍k-seng chū-chi̍p；Iâ-so͘ chiū khui-thiah thian-kok ê tō-lí kà-sī in.Thâu-chi̍t hāng sī kóng chin ê hok-khì sī cháiⁿ-iūⁿ：chiū kóng，"Khang-hu sim，ai-siong，un-jiû，him-bō͘ gī，kiâⁿ lîn-bín，sim chheng-khì，hô-pêng，in-ūi gī tú-tio̍h khún-tio̍h，ūi-tio̍h góa siū lâng lóe-mē khún-tio̍k，chit téng-hō ê lâng ū hok-khì. " Lâng ài tit-tio̍h thian-kok ê hok-khì tio̍h ū chit hō ê sim-chêng.Chit hō hok-khì kap sè-kan lâng só͘ phah-sǹg chòe hok-khì sī saⁿ tùi-hoán，to̍k-to̍k chit hō sī chin，pa̍t hō lóng sī ké，lō͘-bé bô hō͘ lâng ti-chiok ia̍h bô kú-tn̂g.Chit hō chiū-sī Sèng Sîn só͘ sù tī thian-kok ê peh-sìⁿ，sim-lāi chāi siⁿ ū，sí-āu koh-khah chhim. Lâng nā tit-tio̍h chit hō thian-kok ê khoán-sit chiū ōe chòe ū lō͘-ēng ê lâng，phì-jū chòe tōe-nih ê iâm，sè-kan ê kng， ín-chhōa lâng kui êng-kng tī Thiⁿ-pē.

Gī-lūn chit hō ê tō-lí bêng-pe̍k，Iâ-so͘ koh kà-sī lán tio̍h put-chí sòe-jī kiâⁿ hó，chim-chiok thàn Siōng-tè lóng-chóng ê kài-lu̍t，m̄-nā gōa-phôe tio̍h thàn，ia̍h tio̍h chīn khùi-la̍t hō͘ sim-koaⁿ lāi-bīn ê só͘ ái tú-tú ha̍p Siōng-tè ê kài-lu̍t，chhim-chhim ê ì-sù.M̄-nā m̄-thang khek-khui lâng，hoán-tńg tio̍h thiàⁿ lâng chhin-vhhiunn7 thiàⁿ ka-kī.M̄-nā tio̍h thiaⁿ pêng-iú，ia̍h tio̍h thiàⁿ tùi-te̍k.Lâng lóe-mē lán，lán tio̍h kā i chiok-hok；lâng oàn-hīn lán，lán tio̍h hó khoán-thāi i；lâng hām-hāi khún-tio̍h lán，lán tio̍h thòe i kî-tó；án-ni chiū chòe Thiⁿ-pē ê kiáⁿ-lūi；in-ūi Thiⁿ-pē ēng ji̍t chiò-kng hó ka[ m̄-hó ê lâng，ēng hō͘ lūn-te̍k gī-lâng kap put-gī ê lâng.Iâ-so͘ chiah koh kóng chi̍t kù chin pau-hâm，chiū-sī kóng，"Lín ê Thiⁿ-pē sī chiâu-chn̂g hó，lín tio̍h chiâu-chn̂g hó chhin-chhiūⁿ I. "

Iâ-so͘ ia̍h kéng-kài lán m̄-thang chin-chhiūⁿ Hoat-lī-sài lâng ké-iàⁿ ho̍k-sāi Siōng-tè，á-sī chòe hó sū tiâu-kò͘-ì lâng khòaⁿ-kìⁿ，thang tit-tio̍h êng-hián tī lâng.Chín-chè sī èng-kai tio̍h kiāⁿ ê tāi-chì，chóng-sī m̄-thang ēng chín-chè kiû kong-lô，á-sī hō͘ lâng o-ló lán chòe hó-sim；chín-chè èng-kai in-ūi lán sêng-si̍t ū chû-sim，lîn-bín lâng ê kan-khó͘，ài lī-ek lâng；án-ni chiū-sī ha̍p Siōng-tè ê ì-sū.Iâ-so͘ kóng，"Chín-chè ê sî，M̄-thang hō͘ tò-chhiú chai chiàⁿ-chhiú ê só͘ chòe，chiū ōe tit-tio̍h Thiⁿ-pē ê siúⁿ. "

思羅安台語點字網站