《耶穌言行錄》

| | | 轉寄

Tē-21-chiuⁿ,Sat-má-lī-a ê hū-jîn-lâng

作者 Ko Kim-seng. 2008.08.31

（Iok-hān 4：1-42）
Iok-hān koaiⁿ-kaⁿ ê sî，Iâ-so͘ lī-khui Iû-thài，khì Ka-lī-lī.Lō͘ tùi Sat-má-lī-a keng-kè，in-ūi hit séng sī tī Iû-thài Ka-lī-lī nn̄g séng ê tiong-kan.Iâ-so͘ kiâⁿ kàu Sū-ka，seng-khu siān.Hit só͘-chāi ū chi̍t ê chíⁿ，sī Ngá-kok só͘ khui ê；Iâ-so͘ chē tī hia，ha̍k-seng ji̍p siâⁿ bóe chia̍h.

Ū chi̍t ê hū-jîn-lâng tùi Sat-má-lī-a siâⁿ-lāi chhut-lâi chhiūⁿ-chúi，Iâ-so͘ kóng，"Hō͘ góa lim. "Hū-jîn-lâng kónh，"Lí sī Iû-thài lâng，beh thài ōe kā goán Sat-má-lī-a lâng thó chúi？"In-ūi Iû-thài lâng kap Sat-má-lī-a ê lâng bô saⁿ óng-lâi.Káng-kiù Sèng-chheh chiū chai，chá Í-sek-lia̍t cha̍p ê chi-phài ê lâng hō͘ A-su̍t kok ê ông lia̍h-khì ê sî，A-su̍t kok ê ông chhe pún-kok ê peh-sìⁿ poaⁿ khì Sat-má-lī-a khiā.Só͘-í Sat-má-lī-a lâng m̄-sī chiàⁿ Í-sek-lia̍t ê lâng.Khí-thâu ê sî in sī pài pu̍t，āu-lâi sòa ū kèng-ùi Iâ-hô-hoa.Koh Í-su-la̍h kap Nî-hi-bi chhōa Iû-thài lâng tùi Pa-pí-lûn tò-lâi，ài tī Iâ-lō͘-sat-léng koh-chài khì chi̍t keng tiān，Sat-má-lī-a lâng ài kap in saⁿ-kap khí，Iû-thài lâng m̄ hō͘ i hūn，tùi án-ni nn̄g-pêng kiat-oàn.

Tiān khí hó，Sat-má-li-a ê lâng m̄ khéng khì hia pài Siōng-tè，sī tī Sat-má-lī-a Ki-lī-sim soaⁿ ū lēng-gōa khí chi̍t keng；chiū nn̄g-pêng saⁿ oàn-hūn koh-khah chhim.

Iâ-so͘ thiaⁿ-kìⁿ hū-jîn-lâng ê ōe，chiū kóng，"Lí nā chai kā lí thó chúi lim sī chī-chūi， lí tek-khak kiû góa，góa tek-khak ēng oa̍h ê chúi hō͘ lí；lâng nā lim chit ê chúi ōe koh chhùi-ta；lim góa só͘ hō͘ i ê chúi，éng-oán bōe chhùi-ta. "

Hū-jîn-lâng lóng bōe hiáu-tit Iâ-so͘ ê ì-sù，kan-ta thiaⁿ-kìⁿ Iâ-so͘ kóng，"Lim tio̍h góa ê chúi éng-oán bōe chhùi-ta，"chiū kóng，"Chú ah，kì-jiân lí ê chúi lim bōe chhùi-ta，chhiáⁿ lí hō͘ góa lim.

"Iâ-so͘ kóng chiah ê ōe sī phì-jū nā-tiāⁿ，si̍t-chāi m̄-sī kóng tōe-bīn-chiūⁿ ê chúi，sī kóng Sèng Sîn ēng tō-lí kám-hòa lâng ê sim.Sèng Sîn ōe iúⁿ-chhī lâng ê lêng-hûn，chhin-chhiūⁿ lâng chhùi-ta lim chúi ōe iúⁿ-chhī seng-khu.Lâng bô lim seng-khu ōe sí，nā bô siū tō-lí ê kám-hòa，lêng-hûn ōe tîm-lûn.Iâ-so͘ kā hū-jîn-lâng kóng，"Tio̍h khì kiò lí ê tiōng-hu lâi. "Ìn kóng，"Bô tiōng-hu. "Iâ-so͘ chiū kā i kóng i àm-chīⁿ só͘ kiâⁿ ê tāi-chì，hū-jîn-lâng chiah lia̍h Iâ-so͘ chòe sian-ti，chiū mn̄g Iâ-so͘ kóng，"Pài Siōng-tè ê só͘-chāi tio̍h tī tá-lo̍h？in-ūi Iû-thài lâng kóng tio̍h tī Iâ-lō͘-sat-léng，Sat-má-lī-a ê lâng kóng tio̍h tī Sat-má-lī-a. "Iâ-so͘ ìn kóng，"Tio̍h sìn góa，ji̍t beh kàu，lín kèng-pài Thiⁿ-pē put-lūn tī chit ê soaⁿ，put-lūn tī Iâ-lō͘-sat-léng.Chin kèng-pài ê lâng，ēng sîn ēng sêng-si̍t pài Thiⁿ-pē；in-ūi Thiⁿ-pē ài lâng án-ni pài I.Siōng-tè sī sîn，pài I ê lâng tio̍h ēng sêng-si̍t. "

Hū-jîn-lâng kóng，"Góa chai Bí-sài-a tit-beh lâi，I nā kàu tek-khak ēng chèng hāng ê tō-lí lâi kà-sī goán. "Iâ-so͘ kóng，"Chit-tia̍p kap lí kóng-ōe ê chiū-sī. "Hū-jîn-lâng thiaⁿ-kìⁿ chit kù hoaⁿ-hí，liâm-piⁿ pàng-sak chúi-pân ji̍p siâⁿ khì kā lâng kóng，"Lâi khòaⁿ chi̍t lâng，góa pêng-sò͘ só͘ kiâⁿ ê tāi-chì，I lóng-chóng chai，thang kóng，káⁿ sī Ki-tok. "Chèng-lâng chhut siâⁿ chiū-kūn Iâ-so͘.Tú-tú hit-tia̍p ha̍k-seng bóe mi̍h lâi，chhiáⁿ Iâ-so͘ chia̍h，Iâ-so͘ kóng，"Góa ū mi̍h thang chia̍h，lín m̄ chai. "Hit sî ha̍k-seng bōe bêng-pe̍k，saⁿ-kap kóng，"Thàn Siōng-tè ê chí-ì sī góa ê bí-niû. "Hit ji̍t sǹg sī Sat-má-lī-a lâng hok-khì ê ji̍t-chí，in-ūi chōe-chōe lâng sêng-si̍t sìn Iâ-so͘，sòa chhiáⁿ Iâ-so͘ kap in tòa.Iâ-so͘ tiàm hia nn̄g ji̍t tùi án-ni sìn ê lâng ke-thiⁿ it-hoat chōe.

Hiān-sî Iâ-so͘ chē tī Thiⁿ-pē ê chiàⁿ-chhiú pêng，ia̍h hoaⁿ-hí ēng oa̍h-miā ê chúi hō͘ kiû I ê lâng.Sèng-chheh kóng，"Chhùi-ta ê tio̍h lâi，ài tit-tio̍h oa̍h-miā ê chúi ōe pe̍h-pe̍h tit-tio̍h. "

思羅安台語點字網站